ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଟେସଲା କାର କିଣିଛନ୍ତି । ଆମେରିକାର ରାଷ୍ଟ୍ରପତି ଏକ ଚମକଦାର ଲାଲ ରଙ୍ଗର ଟେସଲା ମଡେଲ ଏକ୍ସ କ୍ରୟ କରିଛନ୍ତି । କମ୍ପାନୀର ସିଇଓ ଏଲନ ମସ୍କ ଏହି କାର ବାଛିବାରେ ଡୋନାଲ୍ଡ ଟ୍ରମ୍ପଙ୍କୁ ସାହାଯ୍ୟ କରିଛନ୍ତି । ଏଲନ ମସ୍କଙ୍କ ଇଲେକ୍ଟ୍ରିକ୍ ଯାନ କମ୍ପାନୀକୁ ସମର୍ଥନ କରିବା ପାଇଁ ଆମେରିକା ରାଷ୍ଟ୍ରପତି ଏହି କାରଟି କିଣିଥିବା କୁହାଯାଉଛି । ଡୋନାଲ୍ଡ ଟ୍ରମ୍ପ୍ ନିକଟରେ ତାଙ୍କ ସୋସିଆଲ ମିଡିଆ ଆକାଉଣ୍ଟରେ ଘୋଷଣା କରିଥିଲେ ଯେ, ସେ ଏକ ଟେସଲା କାର କିଣିବାକୁ ଯାଉଛନ୍ତି । ଏହି ପୋଷ୍ଟରେ ଏଲନ୍ ମସ୍କ ଆମେରିକା ରାଷ୍ଟ୍ରପତିଙ୍କ ପ୍ରତି କୃତଜ୍ଞତା ପ୍ରକାଶ କରିଥିଲେ । 

Thank you, President @realDonaldTrump! pic.twitter.com/3kqZObTixi

— Elon Musk (@elonmusk) March 11, 2025

ଏଲନ ମସ୍କ ଡୋନାଲ୍ଡ ଟ୍ରମ୍ପଙ୍କ ସହିତ ଏକ ଟେସଲା କାରରେ ଟେଷ୍ଟ ଡ୍ରାଇଭ୍ କରୁଥିବାର ଏକ ଫଟୋ ମଧ୍ୟ ସେୟାର କରିଛନ୍ତି । ଡୋନାଲ୍ଡ ଟ୍ରମ୍ପ କହିଛନ୍ତି ଯେ, ସେ ଏହି କାରକୁ ୮୦ ହଜାର ଆମେରିକୀୟ ଡଲାରରେ କିଣିଛନ୍ତି, ଯେଉଁଥିରେ ତାଙ୍କୁ କୌଣସି ରିହାତି ମିଳିନାହିଁ । ଡୋନାଲ୍ଡ ଟ୍ରମ୍ପ ଆହୁରି କହିଛନ୍ତି ଯେ, 'ମସ୍କ ମୋତେ ରିହାତି ଦେବା ଉଚିତ ଥିଲା।’ 

ଆମେରିକୀୟ ରାଷ୍ଟ୍ରପତି ଗଣମାଧ୍ୟମ ସାମ୍ନାରେ ଏହି କାରଟି କିଣିଛନ୍ତି । ଏଲନ୍ ମସ୍କ ଡୋନାଲ୍ଡ ଟ୍ରମ୍ପଙ୍କ ସାମ୍ନାକୁ ୪ଟି ଟେସଲା କାର ଆଣିଥିଲେ । ଡୋନାଲ୍ଡ ଟ୍ରମ୍ପ ଏଲନ ମସ୍କଙ୍କୁ ଜଣେ ଦେଶପ୍ରେମୀ ବୋଲି କହିଛନ୍ତି । ଆମେରିକା ରାଷ୍ଟ୍ରପତି ଆହୁରି କହିଛନ୍ତି, ‘ବେଳେ ବେଳେ ମୁଁ ଜାଣିପାରେ ନାହିଁ ତାଙ୍କର ଉଦ୍ଦେଶ୍ୟ କ'ଣ, କିନ୍ତୁ ମୁଁ କହିପାରିବି ଯେ ସେ ଜଣେ ମହାନ ବ୍ୟକ୍ତି।’ 

🇺🇸 President Trump
🇺🇸 @ElonMusk
🇺🇸 Lil X
🇺🇸 Tesla pic.twitter.com/LvKpkGlYDz

— The White House (@WhiteHouse) March 12, 2025

ଡୋନାଲ୍ଡ ଟ୍ରମ୍ପ ଆମେରିକାର ରାଷ୍ଟ୍ରପତି ହେବା ପରେ, ସେ ମସ୍କଙ୍କୁ ସରକାରୀ ଦକ୍ଷତା ବିଭାଗ (DOGE) ର ଦାୟିତ୍ୱ ଦେଇଥିଲେ । ଗଣମାଧ୍ୟମ ରିପୋର୍ଟ ଅନୁସାରେ, ସେବେଠାରୁ ଏହି ବିଭାଗ ସରକାରୀ ଖର୍ଚ୍ଚ ହ୍ରାସ କରିବା ପାଇଁ କାମ କରୁଛି । ଏଥି ପାଇଁ ହଜାର ହଜାର ସରକାରୀ କର୍ମଚାରୀ ଚାକିରି ହରାଇଛନ୍ତି । ଏଲନ ମସ୍କଙ୍କ ବିରୋଧରେ ପ୍ରତିବାଦ ସ୍ୱରୂପ ଆମେରିକାର ମାସାଚୁସେଟ୍ସରେ ୭ଟି ଟେସଲା ଚାର୍ଜିଂ ଷ୍ଟେସନ ପୋଡ଼ି ଦିଆଯାଇଥିଲା ଏବଂ ଫ୍ରାନ୍ସର ଟୁଲୁସରେ ଏକ ଡିଲରସିପ୍‌ରେ ଥିବା ୧୨ଟି ଟେସଲା ଗାଡ଼ି ମଧ୍ୟ ପୋଡ଼ି ଦିଆଯାଇଥିଲା । ଏହି କାରଣରୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏଲନ ମସ୍କଙ୍କ ସମର୍ଥନରେ ବାହାରି ଟେସଲା କାର କିଣିଛନ୍ତି।