ଧର୍ମଶାଳା, ୦୬/୦୩: କାଏମା ଗୋପନଘର ଘାଟରୁ ରାତିଅଧିଆ ବେଆଇନ୍ ବାଲି ଚୋରା ଚାଲାଣ ବେଳେ ଅଘଟଣ । ବାଇକ୍କୁ ପିଟିଲା ଟ୍ରାକ୍ଟର । ଦୁର୍ଘଟଣାରେ ଜଣେ ପ୍ରାଣ ହରାଇଥିବା ବେଳେ ଆଉ ଜଣେ ଯୁବକ ଗୁରୁତର ହୋଇଛନ୍ତି । ଯୁବକ ଦ୍ୱୟ ରବିନ୍ଦ୍ର ମଲିକଙ୍କ ପୁଅ ଦେବା ସିସ ମଲିକ (୨୬) ଏବଂ ନୁଆପାଟଣା ଗ୍ରାମର ନିଧିଆ ମଲିକଙ୍କ ପୁଅ ସାଗର ମଲିକ (୨୫) ବୋଲି ଜଣାପଡ଼ିଛି । ଯାଜପୁରୁ ଜିଲ୍ଲା ଧର୍ମଶାଳା ବ୍ଲକ ଅନ୍ତର୍ଗତ ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ବାଲି ମାଫିଆମାନେ ଆଜକୁ ଦୁଇ ମାସ ହେବ ପ୍ରତ୍ୟେକ ଦିନ ରାତି ଅଧିଆ ହଜାର ହଜାର ଟ୍ରିପ୍ ବାଲି ଉଠାଉଥିଲେ । ପ୍ରଶାସନ ସବୁ ଦେଖି ଜେମିତି ଆଖିରେ ଅନ୍ଧ ପୁଟୁଳି ବାନ୍ଦି ଚୁପ୍ ହୋଇ ବସିଛି । ତେବେ ସ୍ଥାନୀୟ ଲୋକଙ୍କ କହିବା ମୁତାବକ, ସାଗର ବର୍ଷେ ହେବ ବିବାହ କରିଥିଲେ । ଉଭୟ ଯୁବକ ଏକ ବାଇକ୍ ଯୋଗେ ଯାଉଥିଲେ । ଏତିକି ବେଳେ ବାଲି ଚୋରା ଚାଲାଣ କରୁଥିବା ଏକ ଟ୍ରାକ୍ଟର ଉକ୍ତ ବାଇକ୍କୁ ଧକ୍କା ଦେଇଥିଲା । ଫଳରେ ଘଟଣା ସ୍ଥଳରେ ଉଭୟ ଗୁରୁତର ହୋଇଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ପହଞ୍ଚି ଉଭୟଙ୍କୁ ଉଦ୍ଧାର କରି ଧର୍ମଶାଳା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲା ପୋଲିସ । ସେଠାରେ ଡାକ୍ତର ଜଣଙ୍କୁ ମୃତ ଘୋଷଣା କରିଥିଲେ । ସେପଟେ ଯୁବକଙ୍କ ମୃତ୍ୟୁ ପରେ ଘଟଣାସ୍ଥଳରେ ଉତ୍ତେଜନା ଦେଖିବାକୁ ମିଳିଥିଲା । ଗ୍ରାମବାସୀ ଓ ମୃତକଙ୍କ ପରିବାରଲୋକେ ରାସ୍ତା ଉପରେ ବସି ରହିଥିଲେ । କିଛି ସମୟ ପରେ ଘଟଣା ସ୍ଥଳରେ ଧର୍ମଶାଳା ପୋଲିସ ପହଞ୍ଚି ଲୋକମାନଙ୍କୁ ବୁଝାସୁଝା କରିଛି । ଏଥି ସହିତ ବାଲି ଉଠୁଥିବା ସ୍ଥାନକୁ ଜେସିବି ସାହାଯ୍ୟରେ ରାସ୍ତା ଖୋଳା ହେବା ସହିତ ଅଘଟଣ ଘଟାଇଥିବା ଟ୍ରାକ୍ଟରଟିକୁ ଧର୍ମଶାଳା ପୋଲିସ ଜବତ କରିଛି ।
