ଯାଜପୁର,୦୭/୦୩: ଯାଜପୁର ବ୍ଲକ ବାସୁଦେବପୁର ପଞ୍ଚାୟତ ଜାଲପୁର ଗ୍ରାମରେ ଚାଲିଥିବା ବେଆଇନ ବାଣ କାରଖାନାରେ ଗୁରୁବାର ମଧ୍ୟାହ୍ନରେ ଭୟଙ୍କର ବିସ୍ଫୋରଣ ଘଟିଛି । ଏଥିରେ ଜଣେ ବାଣ ଭିଡ଼ାଳିଙ୍କର ଶୋଚନୀୟ ମୃତ୍ୟୁ ହୋଇଥିବା ବେଳେ ୩ଜଣ ଗୁରୁତର ହୋଇଛନ୍ତି । ପ୍ରଚଣ୍ଡ ଶବ୍ଦ ଯୋଗୁ ଦୁଇ ଜଣ ପଡ଼ୋଶୀ ଶିଶୁ ଅସୁସ୍ଥ ହୋଇ ପଡ଼ିଛନ୍ତି । ୬ଟି ଘର କ୍ଷତିଗ୍ରସ୍ତ ହୋଇଥିବା ସୂଚନା ମିଳିଛି ।
ଜାଲପୁର ଗ୍ରାମରେ ଦୀର୍ଘଦିନ ଧରି ବେଆଇନ ଭାବେ ବାଣ କାରଖାନା ଚାଲିଛି । ବାଣ କାରଖାନା ପାଇଁ ପୂର୍ବରୁ ବହୁବାର ଦୁର୍ଘଟଣା ଘଟିବା ସହ ଯାଜପୁର ଥାନାରେ ଏ ସମ୍ପର୍କରେ ୫ଟି ମାମଲା ମଧ୍ୟ ରୁଜୁ ହୋଇଛି । ପୁଲିସର ନଜର ସତ୍ତେ୍ୱ କିଛି ବାଣ ବେପାରି ବେଆଇନ ଭାବେ ବାଣ ତିଆରି ଚଳାଇଛନ୍ତି । ଗ୍ରାମର ନିଶିକାନ୍ତ ପତି ନିଜ ଘରେ ଦୀର୍ଘ ଦିନ ହେବ କିଛି ଲୋକଙ୍କୁ ନେଇ ବାଣ କାରଖାନା ଚଲେଇ ଆସୁଥିଲେ । ଗୁରୁବାର ଅପରାହ୍ଣରେ ତାଙ୍କ ଘରେ ସେହି ଗ୍ରାମର ବାଦଲ ପାତ୍ର (୨୧) ଓ ନାରାୟଣ ବେହେରା (୪୦) ବାଣ ତିଆରି କରୁଥିଲେ । ହଠାତ୍ ବାଣଗୁଡ଼ିକ ବିସ୍ଫୋରଣ ହୋଇଥିଲା । ବିସ୍ଫୋରଣରେ ବାଦଲଙ୍କର ଗୋଟିଏ ଗୋଡ଼ ଶରୀରଠାରୁ ବିଚ୍ଛିନ୍ନ ହୋଇଯାଇଥିଲା । ନିଶିକାନ୍ତ ଓ ନାରାୟଣ ଗୁରୁତର ଆହତ ହୋଇଥିଲେ । ପଡ଼ୋଶୀ ଘରେ ସଣ୍ଟ୍ରିଂ କାମ କରୁଥିବା ଦୁଇ ଜଣ ଶ୍ରମିକ ମାର୍କଣ୍ଡପୁର ଗ୍ରାମର ଅଜୟ କୁମାର ଜେନା (୪୫), ଜାଲପୁର ଗ୍ରାମର ବ୍ରହ୍ମା ଜେନା (୬୦) ବିସ୍ଫୋରଣରେ ଆହତ ହୋଇଥିଲେ ।
ଦମକଳବାହିନୀ ଓ ଯାଜପୁର ପୁଲିସ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ସେମାନଙ୍କୁ ଯାଜପୁର ମୁଖ୍ୟ ଚିକିତ୍ସାଳୟକୁ ଅଣାଯାଇଥିଲା । ବାଦଲ ଗୁରୁତର ଥିବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପରେ ଗୁରୁତର ନିଶିକାନ୍ତଙ୍କୁ କଟକ ସ୍ଥାନାନ୍ତର କରାଯାଇଛି । ଅନ୍ୟମାନେ ଯାଜପୁର ମୁଖ୍ୟ ଚିକିତ୍ସାଳୟରେ ଚିକିତ୍ସା ହେଉଛନ୍ତି । ବାଣର ପ୍ରଚଣ୍ଡ ଶବ୍ଦରେ ପଡ଼ୋଶୀ ଘରେ ରହୁଥିବା ଦୁଇଜଣ ଶିଶୁ ଅଚେତ ହୋଇ ପଡ଼ିଥିଲେ । ସେମାନେ ଚିକିତ୍ସା ପରେ ସୁସ୍ଥ ହୋଇଛନ୍ତି । ସେଠାରେ ଏତେ ମାତ୍ରାରେ ବାଣ ଥିଲା ଯେ, ଦୀର୍ଘ ସମୟ ଧରି ଫୁଟିଥିଲା । ଯାହାର ପ୍ରଚଣ୍ଡ ଶବ୍ଦ ଆଖପାଖ ୨-୩ କିମି ପର୍ଯ୍ୟନ୍ତ ଶୁଭିଥିଲା । ଏହା ସହିତ ଘର ପାଖରେ ଥିବା ୬ଟି ଘର ବ୍ୟାପକ କ୍ଷୟକ୍ଷତି ହୋଇଛି । ବାଣଗୁଡ଼ିକ ସବୁ ଫୁଟିଯାଇଥିବା ବେଳେ ଖବର ଲେଖା ହେବା ପର୍ଯ୍ୟନ୍ତ ପୁଲିସ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ।
