ନୂଆଦିଲ୍ଲୀ, ୩/୭: ଆସନ୍ତାକାଲି ସକାଳ ୬ଟା ସମୟରେ ଦିଲ୍ଲୀରେ ପହଞ୍ଚିବେ ବିଶ୍ବବିଜୟୀ । ସ୍ବତନ୍ତ୍ର ବିମାନରେ ଆସୁଛନ୍ତି ଟି-୨୦ ବିଶ୍ବକପ୍ ଚମ୍ପିଆନ୍ ଟିମର ଖେଳାଳି । ସ୍ବଦେଶ ଫେରୁଛନ୍ତି  ଓ୍ବେଷ୍ଟ ଇଣ୍ଡିଜ ବାରବାଡସରେ ଫସିଥିବା ଟିମ୍ ଇଣ୍ଡିଆ ଖେଳାଳି । ପ୍ରବଳ ଝଡ ତୁଫାନ ପାଇଁ ବରଲିରେ ଫସିଥିଲା ଟିମ୍ ଇଣ୍ଡିଆ ।ତେବେ ବିସିସିଆଇ ସମ୍ପାଦକ ଜୟ ଶାହଙ୍କ ପ୍ରୟାସ ପରେ ସ୍ବତନ୍ତ୍ର ଚାର୍ଟାଡ ବିମାନରେ ଆସୁଛନ୍ତି ଖେଳାଳି। 

ସୂଚନା ମୁତାବକ, ଝଡ ପାଇଁ ଟିମ୍ ଇଣ୍ଡିଆର ଉଡାଣରେ ବିଳମ୍ବ ହୋଇଥିଲା । ଏପଟେ ଟିମ୍ ସହିତ ଫସିଥିବା ଭାରତୀୟ ସାମ୍ବାଦିକଗଣଙ୍କୁ ମଧ୍ୟ ଫେରିବାର ସୁଯୋଗ ପ୍ରଦାନ କରିଛନ୍ତି ଜୟ ଶାହ । ସମାନ ବିମାନରେ ଉଭୟ ଖେଳାଳି ଏବଂ ଦେଶର ବିଭିନ୍ନ ଗଣମାଧ୍ୟମର କ୍ରୀଡା ସାମ୍ବାଦିକ ମଧ୍ୟ ଭାରତ ଫେରିବେ ।

୧୭ ବର୍ଷ ଅପେକ୍ଷାର ଅନ୍ତ ଘଟିଛି । ଆଇସିସି ଟି-୨୦ ବିଶ୍ବକପରେ ଚମ୍ପିଆନ ହୋଇଛି ଟିମ୍ ଇଣ୍ଡିଆ । ଗତ ଶନିବାର ହାଇଭୋଲଟେଜ ଫାଇନାଲ ମ୍ୟାଚରେ ଦକ୍ଷିଣ ଆଫ୍ରିକାକୁ ହରାଇ ବିଶ୍ବ ବିଜୟୀ ହୋଇଛି ଟିମ୍ ଇଣ୍ଡିଆ । ଏହାପରେ ଝଡ ତୁଫାନ ପାଇଁ ଫସିଥିଲା ରୋହିତ ବ୍ରିଗେଡ୍ । ତେବେ ଆଜି ବିସିସିଆଇ ସୋସିଆଲ ମିଡିଆ ଏକ୍ସରେ ଘରକୁ ଆସୁଛି ଟ୍ରଫି ଲେଖି ଟି-୨୦ ଆଇସିସି ଟ୍ରଫି ଭିଡିଓ ପୋଷ୍ଟ କରୁଛି । ଭାରତ ଫେରିବା ପରେ ଜୋରଦାର ସେଲିବ୍ରେସନ ହେବ ବୋଲି ଏହା ସୂଚନା ଦେଉଛି ।