ନୂଆଦିଲ୍ଲୀ,୦୪/୦୭: ଟି-ଟ୍ୱେଣ୍ଟି ବିଶ୍ୱକପ ଶେଷ ହୋଇଛି । ବର୍ତ୍ତମାନ ଆଉ ଏକ ଆଇସିସି ଟୁର୍ଣ୍ଣାମେଣ୍ଟ ଚାମ୍ପିଅନ୍ସ ଟ୍ରଫି ପାଇଁ ପ୍ରସ୍ତୁତି ଆରମ୍ଭ ହୋଇଛି। ଆସନ୍ତା ବର୍ଷ ଚାମ୍ପିଅନ୍ସ ଟ୍ରଫି ଖେଳାଯିବ । ଆୟୋଜନ ଅଧିକାର ପାଇଥିବା ପାକିସ୍ତାନ ଇତି ମଧ୍ୟରେ କ୍ରୀଡ଼ାସୂଚୀ ପ୍ରସ୍ତୁତ କରି ସାରିଛି। କେବଳ ଏହି କ୍ରୀଡ଼ାସୂଚୀରେ ଆଇସିସିର ମୋହର ଲାଗିବା ବାକି ଅଛି । ବହୁ ପ୍ରତୀକ୍ଷିତ ଭାରତ-ପାକିସ୍ତାନ ମୁକାବିଲା ପାଇଁ ତାରିଖ ଚୂଡ଼ାନ୍ତ କରାଯାଇଛି ।
ପ୍ରସ୍ତାବିତ କ୍ରୀଡ଼ାସୂଚୀ ଅନୁଯାୟୀ ମାର୍ଚ୍ଚ ମାସ ୧ ତାରିଖରେ ଏହି ମ୍ୟାଚ୍ ଆୟୋଜନ ଖେଳାଯିବ । ଲାହୋର ସହରରେ ଏହି ମ୍ୟାଚ୍କୁ ଆୟୋଜନ କରିବାକୁ ପାକିସ୍ତାନ କ୍ରିକେଟ୍ ବୋର୍ଡ ନିଷ୍ପତ୍ତି ନେଇଛି । ସୂଚନାଯୋଗ୍ୟ, ଆସନ୍ତା ବର୍ଷ ଫେବ୍ରୁଆରୀ ୧୯ରୁ ମାର୍ଚ୍ଚ ୯ ତାରିଖ ମଧ୍ୟରେ ଚାମ୍ପିଅନ୍ସ ଟ୍ରଫି ଆୟୋଜିତ ହେବ । ମାର୍ଚ୍ଚ ୧୦ ତାରିଖକୁ ରିଜର୍ଭ ଦିବସ ରୂପେ ଚୟନ କରାଯାଇଛି ।
ସୂଚନାଯୋଗ୍ୟ, ପାକିସ୍ତାନ କ୍ରିକେଟ୍ ବୋର୍ଡ ଅଧ୍ୟକ୍ଷ ମହସିନ ନକଭୀ ଆଇସିସିର ନିମନ୍ତ୍ରିତ ଅତିଥି ଭାବେ ଗତ ଟି-ଟ୍ୱେଣ୍ଟି ବିଶ୍ୱକପ୍ ଫାଇନାଲ୍ ମ୍ୟାଚ୍ ଦେଖିବା ପାଇଁ ୱେଷ୍ଟ ଇଣ୍ଡିଜ ଯାତ୍ରା କରିଥିଲେ । ଏହି ଅବସରରେ ସେ ଚାମ୍ପିଅନ୍ସ ଟ୍ରଫିର କ୍ରୀଡ଼ାସୂଚୀ ଆଇସିସିକୁ ପ୍ରଦାନ କରିଛନ୍ତି ।
ଆଇସିସିକୁ ପ୍ରଦାନ କରାଯାଥିବା କ୍ରୀଡ଼ାସୂଚୀ ଅନୁଯାୟୀ ଚାମ୍ପିଅନ୍ସ ଟ୍ରଫିରେ ମୋଟ୍ ୧୫ଟି ମ୍ୟାଚ୍ ଖେଳାଯିବ। ଭାରତର ସମସ୍ତ ମ୍ୟାଚ୍ ଲାହୋରରେ ଅନୁଷ୍ଠିତ ହେବ। ଲାହୋରରେ ମୋଟ୍ ୭ଟି ମ୍ୟାଚ୍ ଖେଳାଯିବ । ଏହା ବ୍ୟତୀତ କରାଚୀରେ ୩ଟି ଓ ରାୱଲପିଣ୍ଡିରେ ୫ଟି ମ୍ୟାଚ ଆୟୋଜନ କରିବା ପାଇଁ ପ୍ରସ୍ତାବ ରହିଛି । କରାଚୀରେ ଉଦ୍ଘାଟନୀ ମୁକାବିଲା ଓ ୨ଟି ସେମି ଫାଇନାଲ୍ ଖେଳାଯିବ । ଭାରତ ସେମି ଫାଇନାଲ୍କୁ ଗଲେ ଉକ୍ତ ମ୍ୟାଚ୍ ଲାହୋରକୁ ସ୍ଥାନାନ୍ତରିତ ହେବ । ଫାଇନାଲ୍ ମ୍ୟାଚ୍ ଲାହୋରରେ ଅନୁଷ୍ଠିତ ହେବ।
ମୋଟ୍ ୮ଟି ଦଳ ଚାମ୍ପିଅନ୍ସ ଟ୍ରଫି ଖେଳିବେ। ସମସ୍ତ ଦଳକୁ ୨ଟି ଗ୍ରୁପ୍ରେ ଭାଗ କରାଯାଇଛି । ଭାରତ ଗ୍ରୁପ୍ ଏ’ରେ ସ୍ଥାନ ପାଇଛି । ଏହି ଗ୍ରୁପ୍ରେ ପାକିସ୍ତାନ,ବାଂଲାଦେଶ ଓ ନ୍ୟୁଜିଲାଣ୍ଡ ସ୍ଥାନ ପାଇଛନ୍ତି । ସେହିପରି ଗ୍ରୁପ୍ ବି’ରେ ଅଷ୍ଟ୍ରେଲିଆ, ଦକ୍ଷିଣ ଆଫ୍ରିକା, ଇଂଲଣ୍ଡ ଓ ଆଫଗାନିସ୍ତାନ ରହିଛନ୍ତି।
