ନୂଆଦିଲ୍ଲୀ: ଆଇସିସିର ଆଗାମୀ ଟୁର୍ଣ୍ଣାମେଣ୍ଟ ଚାମ୍ପିୟନ୍ସ ଟ୍ରଫି ୨୦୨୫ର ଆୟୋଜକ ପାକିସ୍ତାନ । କିନ୍ତୁ ଭାରତୀୟ ଟିମ୍ ଏହି ଟୁର୍ଣ୍ଣାମେଣ୍ଟ ପାଇଁ ପାକିସ୍ତାନ ଗସ୍ତ କରିବ ନା ନାହିଁ ତାହା ସ୍ପଷ୍ଟ ହୋଇନାହିଁ । ସେପଟେ ପାକିସ୍ତାନ ଏହି ଟୁର୍ଣ୍ଣାମେଣ୍ଟ ପାଇଁ ପ୍ରସ୍ତୁତି ଜୋରଦାର କରିଛି । ଚାମ୍ପିୟନ୍ସ ଟ୍ରଫିରେ ଭାରତ ବନାମ ପାକିସ୍ତାନ ମ୍ୟାଚକୁ ନେଇ ସସପେନ୍ସ ଜାରି ରହିଛି । ଏହି ମ୍ୟାଚ୍ କେବେ ଏବଂ କେଉଁଠି ଖେଳାଯିବ ତାକୁ ନେଇ ଏକ ବଡ଼ ଖବର ସାମନାକୁ ଆସିଛି । ପାକିସ୍ତାନ କ୍ରିକେଟ୍ ବୋର୍ଡ, ଚାମ୍ପିୟନ୍ସ ଟ୍ରଫି ୨୦୨୫ ରେ ଭାରତ ଏବଂ ପାକିସ୍ତାନ ମ୍ୟାଚ୍ ପାଇଁ ମାର୍ଚ୍ଚ ୧ ତାରିଖ ସ୍ଥିର କରିଛି ।
ପିଟିଆଇର ରିପୋର୍ଟ ଅନୁସାରେ, ଆଇସିସି ବୋର୍ଡର ଜଣେ ବରିଷ୍ଠ ସଦସ୍ୟ ସୂଚନା ଦେଇଛନ୍ତି ଯେ ଭାରତ ଏବଂ ପାକିସ୍ତାନ ଟିମ୍ ମଧ୍ୟରେ ମ୍ୟାଚ୍ ମାର୍ଚ୍ଚ ୧ରେ ଲାହୋରରେ ଖେଳାଯିବ । କିନ୍ତୁ ବିସିସିଆଇ ଏବେ ସୁଦ୍ଧା ମ୍ୟାଚ ସଂପର୍କରେ କୌଣସି ସୂଚନା ଦେଇ ନାହିଁ । ଚାମ୍ପିୟନ୍ସ ଟ୍ରଫି ୨୦୨୫ ଫେବ୍ରୁଆରି ୧୯ରୁ ମାର୍ଚ୍ଚ ୯ ଯାଏ ଖେଳାଯିବ । ମାର୍ଚ୍ଚ ୧୦କୁ ରିଜର୍ଭ ଡେ ଭାବରେ ରଖାଯାଇଛି । ରିପୋର୍ଟ ଅନୁସାରେ ଭାରତକୁ ଗ୍ରୁପ ଏରେ ପାକିସ୍ତାନ, ବାଂଲାଦେଶ ଏବଂ ନ୍ୟୁଜିଲାଣ୍ଡ ସହ ରଖାଯାଇଛି । ଗ୍ରୁପ୍ ବିରେ ଅଷ୍ଟ୍ରେଲିଆ, ସାଉଥ୍ ଆଫ୍ରିକା, ଇଂଲଣ୍ଡ ଏବଂ ଆଫଗାନିସ୍ତାନ ସାମିଲ ଅଛନ୍ତି ।
ଆଇସିସି ବୋର୍ଡର ଏକ ସଦସ୍ୟଙ୍କ ସୂଚନା ଅନୁସାରେ, ୧୫ ମ୍ୟାଚ୍ ବିଶିଷ୍ଟ ଚାମ୍ପିୟନ୍ସ ଟ୍ରଫି ପାଇଁ ଡ୍ରାଫ୍ଟ ଜମା କରିସାରିସାରିଛି ପାକିସ୍ତାନ କ୍ରିକେଟ ବୋର୍ଡ (ପିସିବି) । ଲାହୋରରେ ୭ଟି ମ୍ୟାଚ୍ ହେବାକୁ ଥିବା ବେଳେ କରାଚିରେ ୩ ଏବଂ ରାଓ୍ବଲପିଣ୍ଡିରେ ୫ଟି ମ୍ୟାଚ୍ ଖେଳାଯିବ । କିନ୍ତୁ ସୁରକ୍ଷା ଦୃଷ୍ଟିରୁ ଭାରତର ସବୁ ମ୍ୟାଚ୍ ଲାହୋରରେ ହେବାକୁ ଯାଉଛି । ଚାମ୍ପିୟନ୍ସ ଟ୍ରଫିର ଉଦଘାଟନୀ ମ୍ୟାଚ କରାଚିରେ ଖେଳାଯିବ । ଦୁଇଟି ସେମିଫାଇନାଲ୍ ମ୍ୟାଚ୍ କରାଚି ଏବଂ ରାଓ୍ବଲପିଣ୍ଡିରେ ହେବାକୁ ଥିବା ବେଳେ ଫାଇନାଲ୍ ମ୍ୟାଚ୍ ଲାହୋରରେ ଖେଳାଯିବ ବୋଲି କୁହାଯାଉଛି ।
