ନୂଆଦିଲ୍ଲୀ,୧୫।୬: ଛୋଟ ପିଲାମାନେ କଞ୍ଚା ମାଟି ଭଳି। ତାଙ୍କ ଭିତରେ ଶିକ୍ଷା ଓ ସଂସ୍କାର ଭରିବା ପ୍ରତ୍ୟେକ ବାପା-ମା’ଙ୍କର ହେଉଛି କର୍ତ୍ତବ୍ୟ। ଆମ ଦେଶରେ ପିଲାମାନେ ଯଦି କିଛି ଭୁଲ କରନ୍ତି, ତାଙ୍କୁ ବାପା-ମା’ମାନେ ଗାଳି କରି ଓ ମାଡ଼ ମାରି ସୁଧାରିବାକୁ ଚେଷ୍ଟା କରନ୍ତି। କିନ୍ତୁ ଏଭଳି କିଛି ଦେଶ ଅଛି ପିଲାଙ୍କୁ ବାପା-ମା ଚାପୁଡାଏ ମାରିଲେ ତାହା ହୋଇଯାଏ ବେଆଇନ୍।
ଦୁନିଆର ୫୩ ଦେଶ ଏଭଳି ରହିଛି, ଯେଉଁଠି ଘରେ କିମ୍ବା ସ୍କୁଲରେ ପିଲାଙ୍କ ଦଣ୍ଡ ଉପରେ ସମ୍ପୂର୍ଣ୍ଣ ଭାବରେ କଟକଣା ଲାଗୁ ହୋଇଛି। ସେଭଳି କେବଳ ସ୍କୁଲ ବିଷୟରେ ଯଦି କଥା ହେବା ତେବେ ୧୧୭ ଦେଶରେ ପିଲାଙ୍କୁ ଦିଆଯାଉଥିବା ସଜା ଉପରେ ସମ୍ପୂର୍ଣ୍ଣ ଭାବରେ କଟକଣା ଲଗାଯାଇଛି। ଏହି ଦେଶର ଶିକ୍ଷକ ପିଲାଙ୍କ ଉପରେ ହାତ ଉଠାଇ ପାରିବେନି। ଏଭଳି ଏକ ଦେଶ ରହିଛି ଯେଉଁଠି ବାପା-ମା’ ମଧ୍ୟ ପିଲାଙ୍କୁ ମାଡ଼ ମାରି ପାରିବେନି।
ଆମେ କଥା ହେଉଛେ ସ୍ବୀଡେନ ବିଷୟରେ। ଏହି ଦେଶ ହେଉଛି ବିଶ୍ବର ଏଭଳି ପ୍ରଥମ ଦେଶ ଯେଉଁଠି ପିଲାଙ୍କ ଅଧିକାରକୁ ପ୍ରୋତ୍ସାହନ ଦେବାର କାମ ଆରମ୍ଭ କରାଯାଇଥିଲା। ୧୯୫୦ ରୁ ସ୍ବିଡେନ୍ରେ ଶିକ୍ଷକଙ୍କ ଦ୍ବାରା ଛାତ୍ରଙ୍କୁ ମାରିବା ଉପରେ କଟକଣା ଲଗାଯାଇଛି। ୧୯୭୯ ରେ ତିଆରି ହୋଇଥିବା ଆଇନ ଅନୁସାରେ, ବାପା-ମା ସମ୍ପର୍କୀୟ ମଧ୍ୟ ପିଲାଙ୍କ ଉପରେ ହାତ ଉଠାଇ ପାରିବେନି। ପିଲାଙ୍କ ଉପରେ ହାତ ଉଠାଇବା ବେଆଇନ। ପିଲାମାନେ ଯଦି ତାଙ୍କୁ ମାଡ ମରାଯାଉଥିବାର ଅଭିଯୋଗ କରନ୍ତି ତେବେ ପୋଲିସ ବାପା-ମା’ଙ୍କୁ ଗିରଫ କରିଥାଏ। ଏହି ଦେଶରେ ପିଲାମାନେ ଯଦି କିଛି ଭୁଲ କରନ୍ତି ତେବେ ବାପା-ମା’ତାକୁ ସ୍ନେହରେ ବୁଝାଇଥାନ୍ତି।