ନୂଆଦିଲ୍ଲୀ: ଆମେରିକା ପୁଣି ଥରେ ଚୀନ୍ ବିରୋଧରେ ଚକ୍ରବ୍ୟୁହ ରଚିବା ଆରମ୍ଭ କରିଛି । ଚୀନ୍କୁ ଆମେରିକା ତାଇୱାନ ପରେ ଏବେ ତିବ୍ଦତ ପ୍ରସଙ୍ଗରେ ଘେରିବାକୁ ଯାଉଛି । ଏଥିପାଇଁ ଆମେରିକା କଂଗ୍ରେସର ଏକ ପ୍ରତିନିଧୀମଣ୍ଡଳ ଭାରତ ଆସିଛନ୍ତି, ଯାହା ଦଲାଇ ଲାମାଙ୍କୁ ଭେଟିବ। ଆମେରିକା ସଦନର ହାଉସର ପୂର୍ବତନ ବାଚସ୍ପତି ନାନସୀ ପେଲୋସି ଧର୍ମଶାଳାରେ ଦଲାଇଲାମାଙ୍କୁ ଭେଟିବା ପାଇଁ ହିମାଚଳ ପ୍ରଦେଶର କାଙ୍ଗଡା ବିମାନବନ୍ଦରରେ ପହଂଚିଛନ୍ତି । ପେଲୋସିଙ୍କ ସହିତ ୬ ଜଣିଆ ଆମେରିକୀୟ ପ୍ରତିନିଧୀ ଅଛନ୍ତି, ଯେଉଁମାନେ ଦଲାଇ ଲାମାଙ୍କୁ ଭେଟିବାକୁ ଭାରତ ଆସିଛନ୍ତି । ବିମାନ ବନ୍ଦରରୁ ବାହାରି ପେଲୋସି କହିଛନ୍ତି, ଭାରତ ଆସିବା ଅତ୍ୟନ୍ତ ଉତ୍ସାହଜନକ । ଏହି ପ୍ରତିନିଧୀ ଦଳ ଧର୍ମଶାଳା ଯାତ୍ରା କରିବେ, ଯେଉଁଠାରେ ଦଲାଇ ଲାମା ନିର୍ବାସନରେ ରୁହନ୍ତି । ଏହି ସାକ୍ଷାତ ଏପରି ଏକ ସମୟରେ ଅନୁଷ୍ଠିତ ହେଉଛି ଯେତେବେଳେ ଦଲାଇ ଲାମା ନିଜେ ଆଣ୍ଠୁ ଚିକିତ୍ସା ପାଇଁ ଆମେରିକା ଯିବାକୁ ଯୋଜନା କରୁଛନ୍ତି ।
ସୂଚନାଥାଉକି, ଦଲାଇ ଲାମା ୧୯୫୯ ମସିହାରେ ତିବ୍ଦତରେ ଚୀନ୍ ଶାସନ ବିରୁଦ୍ଧରେ ବିଦ୍ରୋହ ଆରମ୍ଭ କରିବା ପରେ ଭାରତ ଆସିଥିଲେ । ଆଉ ଯେତେବେଳେ ଅନ୍ୟ କୌଣସି ଦେଶର ଅଧିକାରୀ ତାଙ୍କ ସହ ଯୋଗାଯୋଗ କରନ୍ତି, ଚୀନ୍ ରାଗିଯାଏ । ଚଳିତ ମାସ ଆରମ୍ଭରେ ଚୀନ୍ର ୱାଶିଂଟନ୍ ଦୂତାବାସର ମୁଖପାତ୍ର ଲିୟୁ ପେଙ୍ଗୁ କହିଥିଲେ ଯେ ଚୀନ୍ ବିରୋଧୀ ବିଚ୍ଛିନ୍ନତାବାଦୀ କାର୍ଯ୍ୟକଳାପକୁ ବିରୋଧ କରୁଛି ଏବଂ କୌଣସି ଦେଶର ଅଧିକାରୀଙ୍କ ଦ୍ୱାରା ଦଲାଇ ଲାମାଙ୍କ ସହ ଯୋଗାଯୋଗକୁ ବିରୋଧ କରୁଛି।
ଆମେରିକାର ପ୍ରତିନିଧୀ ଦଳରେ ଅନ୍ତର୍ଭୁକ୍ତ ନାନସୀ ପେଲୋସି ହେଉଛନ୍ତି ସେହି ରାଜନେତା ଯିଏ ଯୁଦ୍ଧ ବିଷୟରେ ଚେତାବନୀ ଦେଇଥିଲେ, ଯେତେବେଳେକି ଚୀନ୍ ତାଇୱାନ ଗସ୍ତକୁ ବିରୋଧ କରିଥିଲା । ତେବେ ସେହି ସମୟରେ ଆମେରିକା ଏବଂ ଚୀନ୍ ମଧ୍ୟରେ ତିକ୍ତତା ବଢିଥିଲା । ତାଇୱାନ ପରେ ନାନସୀ ପେଲୋସି ବର୍ତ୍ତମାନ ଦଲାଇ ଲାମାଙ୍କୁ ଭେଟିବାକୁ ଭାରତ ଆସିଛନ୍ତି । ତେବେ ନାନସୀଙ୍କ ଧର୍ମଶାଳା ଗସ୍ତ ଆମେରିକା ଏବଂ ଚୀନ୍ ମଧ୍ୟରେ ତିକ୍ତତାକୁ ଆହୁରି ବଢାଇପାରେ ।
ଏଥି ସହିତ ଆମେରିକାର ସଂସଦ ମଧ୍ୟ ତିବ୍ଦତ ସହ ଜଡିତ ଏକ ବିଲ୍ ପାରିତ କରିଛି, ଯାହାର ନାମ ରିଜୋଲଭ୍ ତିବ୍ଦତ ଆକ୍ଟ। ଏହି ବିଲ୍ ବୁଧବାର ଅର୍ଥାତ୍ ୧୨ ଜୁନ୍ ରେ ପାରିତ ହୋଇଛି । ଏହାକୁ ଆମେରିକା ସଂସଦର ଉଭୟ ଗୃହ ଅନୁମୋଦନ କରିଛି।
