ନୂଆଦିଲ୍ଲୀ,୧୮/୦୬: ବିଶ୍ୱବ୍ୟାପୀ ଦ୍ରୁତ ଗତିରେ ବାର୍ଡ ଫ୍ଲୁ ମାମଲା ସାମ୍ନାକୁ ଆସୁଛି । ଆମେରିକାର ୪୮ ପ୍ରଦେଶରେ ୯ କୋଟିରୁ ଅଧିକ କୁକୁଡ଼ାଙ୍କୁ ଏହି ରୋଗ ହୋଇସାରିଲାଣି । ବର୍ତ୍ତମାନ ଏହା ଗାଈମାନଙ୍କ ପର୍ଯ୍ୟନ୍ତ ପହଞ୍ଚିଲାଣି । ଭାରତରେ ବି ଏହାର ମାମଲା ସାମ୍ନାକୁ ଆସୁଛି । ଏ ସବୁ ଦୃଷ୍ଟିରୁ ବାର୍ଡ ଫ୍ଲୁ ଯୋଗୁ ପରବର୍ତ୍ତୀ ମହାମାରୀ ଆସିପାରେ ବୋଲି ଆମେରିକାର ସେଣ୍ଟର ଫର୍ ଡିଜିଜ୍ କଣ୍ଟ୍ରୋଲ୍ ଆଣ୍ଡ୍ ପ୍ରିଭେନ୍ସନ୍ (ସିଡିସି)ର ପୂର୍ବତନ ନିର୍ଦ୍ଦେଶକ ରବର୍ଟ ରେଡ୍ଫିଲ୍ଡ ଦାବି କରିଛନ୍ତି ।
ବ୍ରିଟିଶ ଗଣମାଧ୍ୟମ ମୁତାବକ, ଏକ ଟିଭି ଚ୍ୟାନେଲକୁ ଦେଇଥିବା ସାକ୍ଷାତକାରରେ ରେଡ୍ଫିଲ୍ଡ କହିଛନ୍ତି, କରୋନା ତୁଳନାରେ ବାର୍ଡ ଫ୍ଲୁରେ ମୃତ୍ୟୁ ହାର ଅଧିକ ରହିଛି । କରୋନାରେ ମୃତ୍ୟୁ ହାର ୦.୬% ଥିଲା । କିନ୍ତୁ ବାର୍ଡ ଫ୍ଲୁ କ୍ଷେତ୍ରରେ ଏହା ୨୫ରୁ ୫୦% । ଡାକ୍ତରଙ୍କ ମୁତାବକ, ବାର୍ଡ ଫ୍ଲୁର ଏଚ୍୫ଏନ୍୧ ଭୂତାଣୁ ମଣିଷଙ୍କ ମଧ୍ୟରେ ବ୍ୟାପୁଛି । ଏଚ୍୫ଏନ୍୧ ଦ୍ୱାରା ୧୦ ଜଣଙ୍କ ମଧ୍ୟରୁ ୬ ଜଣଙ୍କ ମୃତ୍ୟୁ ହେଉଛି। କିନ୍ତୁ କେବେ ସୁଦ୍ଧା ବାର୍ଡ ମହାମାରୀର ରୂପ ନେବ, ତାହା ବାବଦରେ ରବର୍ଟ ରେଡ୍ଫିଲ୍ଡ କିଛି କହିନାହାନ୍ତି । ବାର୍ଡ ଫ୍ଲୁ ଇନ୍ଫ୍ଲୁଏଞ୍ଜା ଭୂତାଣଠାରୁ ହେଉଥିବା ଏକ ସଂକ୍ରମଣ । ଏହା ସାଧାରଣତଃ ପକ୍ଷୀ ଓ ପଶୁଙ୍କ ମଧ୍ୟରେ ବ୍ୟାପିଥାଏ । ବାର୍ଡ ଫ୍ଲୁର କିଛି ଭାରିଆଣ୍ଟ ଅତ୍ୟନ୍ତ ଘାତକ । ତେବେ ଏଚ୍୯ଏନ୍୨ ମାମଲାରେ ଅଧିକ ଗମ୍ଭୀର ସମସ୍ୟା ଦେଖିବାକୁ ମିଳିନାହିଁ ।