ମୟୂରଭଞ୍ଜ,୦୫/୧୦: ମୟୂରଭଞ୍ଜ ଜିଲ୍ଲା ରାସଗୋବିନ୍ଦପୁର ଥାନା ଅଞ୍ଚଳରେ ଜଣେ ଗର୍ଭବତୀ ମହିଳାଙ୍କ ସନ୍ଦେହ ଜନକ ମୃତ୍ୟୁ ଘଟିଛି । ମୃତକ ଜ୍ୟୋତିରେଖା ଦାସ ଏବଂ ତାଙ୍କ ସ୍ୱାମୀ ପ୍ରହରାଜପୁର ଗ୍ରାମର ରଞ୍ଜନ ଦାସ ବୋଲି ଜଣାପଡ଼ିଛି । ଏହି ଘଟଣାରେ ମହିଳାଙ୍କ ବାପଘର ଲୋକେ ଶାଶୁଘର ଲୋକଙ୍କ ବିରୁଦ୍ଧରେ ହତ୍ୟା ଅଭିଯୋଗ କରିଛନ୍ତି । 

ସୂଚନା ମୁତାବକ, ଜ୍ୟୋତି ଗାଁଅମର୍ଦା ପଞ୍ଚାୟତ ଅନ୍ତର୍ଗତ ପ୍ରହରାଜପୁର ଗ୍ରାମର ରଞ୍ଜନ ଦାସଙ୍କୁ ବିବାହ କରିଥିଲେ । ତେବେ ଗତ କିଛି ଦିନ ଜ୍ୟୋତିଙ୍କ ଶ୍ୱଶୁର ଘରେ ପାରିବାରିକ କଳହ ଲାଗି ରହୁଥିଲା । ଗତ ଅକ୍ଟୋବର ତିନି ତାରିଖରେ ଜ୍ୟୋତିଙ୍କ ବାପା ବଂଶୀଧର ଦାସ ପ୍ରହରାଜପୁରକୁ ଯାଇ ଜ୍ୟୋତିଙ୍କ ଶ୍ୱଶୁର ଓ ତାଙ୍କ ଘର ଲୋକଙ୍କ ସହିତ ବୁଝାମଣା କରି ଫେରି ଆସିଥିଲେ । ତେବେ ପୂର୍ବରୁ ପାରିବାରିକ କଳହକୁ ନେଇ ଗାଁ ରେ ଆଲୋଚନା ହେବା ସହ ଫାଣ୍ଡିରେ ଅଭିଯୋଗ ହୋଇଥିବା କହିଛନ୍ତି ପରିବାର ଲୋକେ । ତେବେ ଶୁକ୍ରବାର ସନ୍ଧ୍ୟାରେ ଜ୍ୟୋତିଙ୍କ ବାପ ଘର ଲୋକେ ତାଙ୍କୁ ଫୋନ ଯୋଗେ ଯୋଗାଯୋଗ କରିବାକୁ ଚେଷ୍ଟା କରିବାରୁ ଜ୍ୟୋତି ଫୋନ ଗ୍ରହଣ କରିଥିଲେ । କିଛି ସମୟ ପରେ ପୁଣି କଲ୍‌ କରିବାରୁ ଜ୍ୟୋତିଙ୍କ ଚାରି ବର୍ଷର ଝିଅ କଲ ରିସିଭ କରି କାନ୍ଦିଥିଲା । ଏହା ଶୁଣି ଜ୍ୟୋତିଙ୍କ ବାପା ମା ପ୍ରହରାଜପୁରକୁ ଯାଇଥିଲେ । ସେଠାରେ ପହଞ୍ଚି ତାଙ୍କ ଝିଅ ଜ୍ୟୋତ ଫାଶୀ ହୋଇ ଆତ୍ମହତ୍ୟା କରିଥିବାର କଥା ଜାଣିବାକୁ ପାଇଥିଲେ ।

ପରେ ଜ୍ୟୋତିଙ୍କ ମରଶରୀରକୁ ଏକ ଖଟରେ ତାଙ୍କ ଶ୍ୱଶୁର ଘର ଲୋକେ ଶୁଆଇ ଦେଇଥିବାର ଦେଖିଥିଲେ । କିନ୍ତୁ ଶ୍ୱଶୁରଘର ଲୋକେ ମେଡିକାଲ ଆଣିନଥିବା ଅଭିଯୋଗ କରିଛନ୍ତି ଝିଅର ବାପା । ଏହା ଦେଖି ଜ୍ୟୋତିଙ୍କୁ ତାଙ୍କ ବାପ ମା ରାସଗୋବିନ୍ଦପୁରସ୍ଥିତ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆଣିଥିଲେ । ପରେ ଜ୍ୟୋତିଙ୍କୁ ହତ୍ୟା କରି ମାରିଦେଇଥିବାର ଅଭିଯୋଗ କରିଛନ୍ତି ଜ୍ୟୋତିଙ୍କ ବାପଘର ଲୋକେ । ତେବେ ଜ୍ୟୋତି ଚାରି ମାସର ଗର୍ଭବତୀ ଥିବା କହିଛନ୍ତି ବାପଘର ଲୋକେ । ପରେ ଉକ୍ତ ଅଭିଯୋଗ ଆଧାରରେ ମୃତଦେହକୁ ପୋଲିସ ଜବତ କରି ଘଟଣାର ତଦନ୍ତ କରୁଥିବାର ଜଣାପଡିଛି । 

ଜ୍ୟୋତିଙ୍କ ସ୍ୱାମୀ ରଞ୍ଜନ ଭୁବନେଶ୍ୱରରେ ମିସ୍ତ୍ରୀ ଭାବରେ କାର୍ଯ୍ୟ କରୁଥିବା ବେଳେ ଶନିବାର ସକାଳୁ ପହଞ୍ଚି ଜ୍ୟୋତିଙ୍କ ହତ୍ୟାକୁ ସେ ଖଣ୍ଡନ କରିଥିବା ବେଳେ ପାରିବାରିକ କଳହ ଥିବା ପରୋକ୍ଷରେ ସ୍ୱୀକାର କରିଥିଲେ । ତେବେ ପୋଲିସର ତଦନ୍ତ ପରେ ପ୍ରକୃତ କାରଣ ଜଣାପଡିବ ।