ଠାକୁରମୁଣ୍ଡା, ୧୭/୧୨: ଠାକୁରମୁଣ୍ଡା ଥାନା କେନ୍ଦୁଜିଆଣୀ ସାପ୍ତାହିକ ହାଟରୁ ଅର୍ଦ୍ଧଦଗ୍ଧ ଶବ ଉଦ୍ଧାର। କେହି ଦୁର୍ବୃତ୍ତ ହତ୍ୟା ପରେ ପୋଡି ଦେଇଥିବା ସନ୍ଦେହ କରାଯାଉଛି। ଘଟଣାସ୍ଥଳରେ ଠାକୁରମୁଣ୍ଡା ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ସୂଚନାନୁଯାୟୀ, ମୟୂରଭଞ୍ଜ ଜିଲ୍ଲା ଠାକୁରମୁଣ୍ଡା ଥାନା କେନ୍ଦୁଜିଆଣୀଠାରେ ଗତକାଲି ସାପ୍ତାହିକ ହାଟ ବସିଥିଲା। ହାଟ ସରିଯିବା ପରେ ହାଟର ଗୋଟିଏ ପାର୍ଶ୍ୱରେ ଯେଉଁଠି ହାଣ୍ଡିଆ ହାଟ ବସେ ସେଠାରେ ଗୋଟିଏ ଅର୍ଦ୍ଧଦଗ୍ଧ ମୃତଦେହ ପଡିଥିବା ଦେଖିବାକୁ ମିଳିଥିଲା। ସ୍ଥାନୀୟ ଲୋକ ରାତିରେ ଥାନାକୁ ଖବର ଦେବାପରେ ଠାକୁରମୁଣ୍ଡା ପୋଲିସ ରାତି ସାରା ଘଟଣାସ୍ଥଳରେ ଜଗି ରହିଥିଲା। ଆଜି ସକାଳି ମୃତ ବ୍ୟକ୍ତିଙ୍କ ପରିଚୟ ମିଳିଥିଲା। ମୃତକ ଜଣକ କେନ୍ଦୁଜିଆଣୀ ନିକଟସ୍ଥ ଜଡଵିଲ ଗ୍ରାମର ଭଦ୍ରୁ ମହାନ୍ତ ବୋଲି ଜଣାପଡ଼ିଛି। ତାଙ୍କୁ ହତ୍ୟା କରିଵା ପରେ କେହି ବିଲରେ ଥିବା ଧାନ ନଡ଼ା ଦେଇ ପୋଡି ଦେଇଛି।
ଆଡିସନାଲ ଏସପି ନାରାୟଣ ନାୟକ ଘଟଣାସ୍ଥଳରେ ପହଞ୍ଚି ଅନୁଧ୍ୟାନ କରିଥିବା ବେଳେ ଅଧିକ ତଦନ୍ତ ପାଇଁ ବାରିପଦାରୁ ସାଇଣ୍ଟିଫିକ୍ ଟିମ୍ ପହଞ୍ଚି ତଦନ୍ତ କରିବା ପରେ ମୃତଦେହକୁ ବ୍ୟବଚ୍ଛେଦ ପାଇଁ ପଠାଯାଇଛି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି। ଆଜି ସକାଳୁ ଭଦୁରୁ ମହାନ୍ତଙ୍କ ବଡ଼ଭାଇ ଶିବ ମହାନ୍ତ ଘଟଣାସ୍ଥଳକୁ ଆସି ଶବକୁ ଚିହ୍ନଟ କରିଛନ୍ତି। ଭଦ୍ରୁର ସ୍ତ୍ରୀ ଝିଅ ଅନ୍ୟତ୍ର ରହୁଥିବାରୁ ପୋଲିସ ଖବର ପରେ ଝିଅ ପହଞ୍ଚି ଠାକୁରମୁଣ୍ଡା ଥାନାରେ ତାଙ୍କ ବାପାଙ୍କୁ ହତ୍ୟା କରାଯାଇଥିବା ଏତଲା ଦାଏର କରିଛନ୍ତି। ହତ୍ୟାକାରୀକୁ ବାହାର କରିବା ପୋଲିସ ପାଇଁ ବଡ଼ ଚ୍ୟାଲେଞ୍ଜ୍ ପାଲଟିଛି।
