ଠାକୁରମୁଣ୍ଡା -୧୯।୧୨ ଠାକୁରମୁଣ୍ଡା ଥାନା ଅନ୍ତର୍ଗତ କେନ୍ଦୁଜିଆଣୀ ହାଟରେ ସୋମବାର ରାତି ହତ୍ୟା କରି ପୋଡ଼ିଦେବା ଘଟଣାରେ ପୋଲିସ ୨ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ  ରଣଜିତ ମହାନ୍ତ (୨୯) ଓ ଘନଶ୍ୟାମ ଜାମୁଦା (୨୩) ।  ଅଭିଯୁକ୍ତମାନଙ୍କୁ ଧରି ପୋଲିସ ହତ୍ୟା ଘଟଣାର ସିନ ରିକ୍ରିଏସନ କରିଛି l 

ଗତ ୧୬ ତାରିଖରେ କେନ୍ଦୁଜିଆଣୀସ୍ଥିତ ସାପ୍ତାହିକ ହାଟରେ  ଭଦ୍ରୁ ମହାନ୍ତଙ୍କୁ ହତ୍ୟା ପରେ ସନ୍ଧ୍ୟାରେ ନିଆଁ ଲଗାଇ ପୋଡି ଦେଇଥିଲେ। ଭଦ୍ରୁ ମହାନ୍ତଙ୍କ ଝିଅ ଲଷ୍ମୀ ମହାନ୍ତ ୧୭ ତାରିଖରେ ଏତଲା ଦେବା ପରେ ଠାକୁରମୁଣ୍ଡା ପୋଲିସ ତଦନ୍ତ ଜାରି ରଖିଥିଲା l ହାଣ୍ଡିଆ ହାଟରେ ଘଟଣା ଘଟିଥିବାରୁ ମଦ ବିକୁଥିବା ଲୋକଙ୍କୁ ଟାର୍ଗେଟ କରିଥିଲା ପୋଲିସ l ରଣଜିତ ଏବଂ ଘନଶ୍ୟାମ ସହିତ ଭଦ୍ରୁମହାନ୍ତର ଗଣ୍ଡଗୋଳ ହୋଇଥିବା ଜାଣିବାକୁ ପାଇଥିଲା ପୋଲିସ l ଘନଶ୍ୟାମ ସହିତ ମଧ୍ୟ ପୁର୍ବରୁ କ୍ରିକେଟ ଖେଳ ସମୟରେ ଭଦ୍ରୁ ଗାଳି ଦେଇଥିଲା। ଏହାକୁ ନେଇ  ଘନଶ୍ୟାମର ରାଗ ଥିଲା l ଭଦ୍ରୁ ପୁର୍ବରୁ ରଣଜିତ ପାଖରୁ ଚଣା ଖାଇ ୨୦ ଟଙ୍କା ଦେଇନଥିବାରୁ ଉଭୟଙ୍କ ମଧ୍ୟରେ ଝଗଡା ହୋଇଥିଲା l ରଣଜିତ ରାଗରେ ତଣ୍ଟି ଚିପି ଦେବାରୁ  ଭଦ୍ରୁ ଜୀବନ ଚାଲିଯାଇଥିଲା l ପରେ ରଣଜିତ ଓ ଘନଶ୍ୟାମ ମିଶି ହାଟ ପାଖ ଧାନ ବିଲରେ ଥିବା ନଡା ସାହାଯ୍ୟରେ ପୋଡି ଦେଇଥିଲେ l ସମସ୍ତଙ୍କ ଘର କେନ୍ଦୁଜିଆଣୀ ନିକଟସ୍ଥ ଜଡିବିଲ ଗ୍ରାମରେ l