କରଞ୍ଜିଆ, ୧୯/୧୨: ଠାକୁରମୁଣ୍ଡା ଥାନା କେନ୍ଦୁଜୁଆଣି ହାଟ ପଡ଼ିଆରେ ଜଡ଼ିବିଲ ଗାଁର ଭଦ୍ରୁ ମହାନ୍ତଙ୍କୁ ମାରି ପୋଡ଼ିଦେବା ଘଟଣାର ପର୍ଦ୍ଦାଫାଶ କରିଛି ପୋଲିସ । ପୂର୍ବ ଶତ୍ରୁତାକୁ କେନ୍ଦ୍ରକରି ଜଡ଼ିବିଲ୍ ଗାଁର ରଞ୍ଜିତ ମହାନ୍ତ ଓ ଘନ ଜାମୁଦା ତାଙ୍କୁ ହତ୍ୟା କରିଥିଲେ । ମାଡ଼ ମାରି ତଳେ ପଡିଗଲା ପରେ ଭଦ୍ରୁ ମହାନ୍ତ ଉପରେ ନଡ଼ା ପକାଇ ନିଆଁ ଲଗାଇ ଦେଇଥିଲେ ୨ ଅଭିଯୁକ୍ତ । ଏହି ମାମଲାରେ ଉକ୍ତ ୨ ଜଣ ଅଭିଯୁକ୍ତଙ୍କୁ ଗିରଫ କରିଛି ପୋଲିସ । ସେମାନଙ୍କୁ ଗୁରୁବାର କୋର୍ଟ ଚାଲାଣ କରିବ ପୋଲିସ । ଏ ନେଇ ପ୍ରେସ୍ ମିଟ କରି ସୂଚନା ଦେଇଛନ୍ତି କରଞ୍ଜିଆ ଏସଡିପିଓ ସୁବ୍ରତ କୁମାର ।
ଡିସେମ୍ୱର ୧୬ ତାରିଖରେ ମୟୂରଭଞ୍ଜ ଜିଲ୍ଲା ଠାକୁରମୁଣ୍ଡା ଥାନା କେନ୍ଦୁଜୁଆଣୀଠାରେ ସାପ୍ତାହିକ ହାଟ ବସିଥିଲା । ହାଟ ସରିଯିବା ପରେ ହାଟର ଗୋଟିଏ ପାର୍ଶ୍ୱରେ ଯେଉଁଠି ହାଣ୍ଡିଆ ହାଟ ବସେ ସେଠାରେ ଗୋଟିଏ ଅର୍ଦ୍ଧଦଗ୍ଧ ମୃତଦେହ ପଡିଥିବା ଦେଖିବାକୁ ମିଳିଥିଲା। ସ୍ଥାନୀୟ ଲୋକ ରାତିରେ ଥାନାକୁ ଖବର ଦେବାପରେ ଠାକୁରମୁଣ୍ଡା ପୋଲିସ ରାତି ସାରା ଘଟଣା ସ୍ଥଳରେ ଜଗି ରହିଥିଲା । ପରେ ବ୍ୟକ୍ତିଙ୍କ ପରିଚୟ ମିଳିଥିଲା । ପରିଚୟ ମିଳିବା ପରେ ଘଟଣାର ତଦନ୍ତ ଆରମ୍ଭ କରିଥିଲା ପୋଲିସ । ଘଟଣାର ତଦନ୍ତ କରି ଏଥିରେ ସମ୍ପୃକ୍ତ ଥିବା ୨ ଜଣ ଯୁବକଙ୍କୁ ଗିରଫ କରି କରିଛି ପୋଲିସ । ସେମାନଙ୍କୁ ଗୁରୁବାର କୋର୍ଟ ଚାଲାଣ କରାଯିବ ବୋଲି କରଞ୍ଜିଆ ଏସଡିପିଓ ସୁବ୍ରତ କୁମାର ସୂଚନା ଦେଇଛନ୍ତି ।
