ନ୍ୟୁୟର୍କ,୧୦/୦୬: ଦକ୍ଷିଣ ଆଫ୍ରିକା ବାଂଲାଦେଶକୁ ୪ ରନରେ ପରାସ୍ତ କରିଛି। ଶେଷ ୫ ଓଭରରେ ଦକ୍ଷିଣ ଆଫ୍ରିକା ପକ୍ଷରୁ ଦ୍ରୁତ ବୋଲିଂ ଦେଖିବାକୁ ମିଳିଥିଲା, ଯେଉଁଥିରେ ଦଳ କେବଳ ୩୦ ରନ୍ ଦେଇଥିଲା। ପ୍ରଥମେ ଖେଳି ଦକ୍ଷିଣ ଆଫ୍ରିକା ୨୦ ଓଭରରେ ୧୧୩ ରନ୍ ସଂଗ୍ରହ କରିଥିଲା। ଆଫ୍ରିକୀୟ ଦଳ ପାଇଁ ହେନ୍ରିଚ୍ କ୍ଲାସେନ୍ ଏବଂ ଡେଭିଡ ମିଲର ୭୯ ରନର ପାର୍ଟନରସିପ୍ କରିଥିଲେ। କ୍ଲାସେନ୍ ୪୬ ରନ୍ ସଂଗ୍ରହ କରିଥିଲେ ଏବଂ ମିଲର୍ ୨୯ ରନ୍ ସଂଗ୍ରହ କରି ଦଳକୁ ଏକ ସମ୍ମାନଜନକ ସ୍କୋ ଦେଇଥିଲେ। ଯେତେବେଳେ ବାଂଲାଦେଶ ଟାର୍ଗେଟକୁ ଗୋଡ଼ାଇବାକୁ ମଇଦାନକୁ ଓହ୍ଲାଇଲା, ସେତେବେଳେ ଦଳର ଆରମ୍ଭ ଅତ୍ୟନ୍ତ ନୈରାଶ୍ୟଜନକ ଥିଲା। ତାହିଦ୍ ହ୍ରିଦୟ ଏବଂ ମହମ୍ମଦୁଲ୍ଲାଙ୍କ ମଧ୍ୟରେ ୪୪ ରନ୍ ର ଏକ ଗୁରୁତ୍ୱପୂର୍ଣ୍ଣ ଭାଗିଦାରୀ ହୋଇଥିଲା। ବାଂଲାଦେଶ ପାଇଁ ସର୍ବାଧିକ ୩୪ ବଲ୍ରେ ୩୭ ରନ୍ କରିଥିଲେ ହ୍ରିଦୟ । କିନ୍ତୁ ଶେଷ ଓଭର ବେଳକୁ ଦକ୍ଷିଣ ଆଫ୍ରିକାର ଦ୍ରୁତ ବୋଲିଂ ଦଳକୁ ୪ ରନ୍ରେ ଜିତାଇଥିଲା।
ବାଂଲାଦେଶ ଆଗରେ ୧୧୪ ରନ୍ର ବିଜୟଲକ୍ଷ୍ୟ ଥିଲା, କିନ୍ତୁ ଦ୍ୱିତୀୟ ଓଭରରେ ଦଳ ୯ ରନ୍ ସଂଗ୍ରହ କରିଥିବା ବେଳେ ତନଜିଦ ହାସନ ଆଉଟ ହୋଇଥିଲେ। ଦକ୍ଷିଣ ଆଫ୍ରିକା ଦ୍ରୁତ ବୋଲିଂ କରିଥିଲା, ତେଣୁ ବାଂଲାଦେଶ ପାୱାରପ୍ଲେ ଓଭରରେ ମାତ୍ର ୨୯ ରନ୍ କରିପାରିଥିଲା। କିନ୍ତୁ ସପ୍ତମ ଓଭରର ପ୍ରଥମ ବଲରେ ୯ ରନ୍ କରି ଲିଟନ୍ ଦାସ ମଧ୍ୟ ଆଉଟ୍ ହୋଇଥିଲେ। ରନ୍ ସ୍ପିଡ୍ ମନ୍ଥର ହୋଇଯାଇଥିଲା। ଶାକିବ ହାସନ ୩ ରନ୍ ଏବଂ ଅଧିନାୟକ ନଜମୁଲ ହୁସେନ୍ ଶାଣ୍ଟୋ ୧୪ ରନ୍ ସଂଗ୍ରହ କରିଥିଲେ। ଏହିପରି ଦଳ ୫୦ ରନ୍ ମଧ୍ୟରେ ୪ ୱିକେଟ୍ ହରାଇସାରିଲା। ୧୦ ଓଭରରେ ୪ ୱିକେଟ୍ ହରାଇବା ପରେ ବାଂଲାଦେଶ ୫୦ ରନ୍ ସଂଗ୍ରହ କରିଥିଲା। ତାହିଦ୍ ହ୍ରିଦୟ ଏବଂ ମହମ୍ମଦୁଲ୍ଲାଙ୍କ ମଧ୍ୟରେ ଭଲ ଭାଗିଦାରୀ ହୋଇଥିଲା ଏବଂ ସେମାନେ ମିଳିତ ଭାବେ ଦଳର ସ୍କୋରକୁ ୧୫ ଓଭରରେ ୮୩ ରନ୍ରେ ପହଞ୍ଚାଇଥିଲେ।
ଏହାରି ଭିତରେ, ୧୭ ତମ ଓଭରରେ ମହମୁଦୁଲ୍ଲାଙ୍କ ବିରୋଧରେ ଏଲ୍ବିଡବ୍ଳୁ ପାଇଁ ଏକ ଆବେଦନ କରାଯାଇଥିଲା, କିନ୍ତୁ ଡିଆର୍ଏସ୍ ପରେ ତାଙ୍କୁ ଆଉଟ୍ ହୋଇନଥିବା ଘୋଷଣା କରାଯାଇଥିଲା। ଏହି ମ୍ୟାଚ୍ ମୁଖ୍ୟତଃ ବାଂଲାଦେଶର ନିୟନ୍ତ୍ରଣରେ ଥିଲା, କିନ୍ତୁ ୧୮ ତମ ଓଭରରେ ରାବଡା, ହ୍ରିଦୟଙ୍କ ୱିକେଟ୍ ନେଇ ପାଭିଲିୟନ ପଠାଇଥିଲେ। ତେବେ ଦଳକୁ ୨ ଓଭରରେ ଜିତିବା ପାଇଁ ୧୮ ରନ୍ର ଆବଶ୍ୟକ ଥିଲା। ଶେଷ ଓଭରରେ ବାଂଲାଦେଶକୁ ୧୧ ରନ୍ କରିବାର ଥିଲା, କିନ୍ତୁ ଜାକିର ଅଲି ଆଉଟ୍ ହେବା ପରେ ଫସିଥିଲା ବାଂଲାଦେଶ। ଯେତେବେଳେ ଶେଷ ଓଭରର ୫ମ ବଲ୍ରେ ମହମ୍ମଦୁଲ୍ଲା ଆଉଟ୍ ହୋଇଥିଲେ ଦକ୍ଷିଣ ଆଫ୍ରିକାର ବିଜୟ ପ୍ରାୟ ନିଶ୍ଚିତ ଥିଲା। ଶେଷ ବଲରେ କୌଣସି ହିଟ୍ ହୋଇନଥିଲା ଯେଉଁଥିପାଇଁ ଦକ୍ଷିଣ ଆଫ୍ରିକା ମ୍ୟାଚ୍କୁ ୪ ରନ୍ରେ ଜିତିଥିଲା।
