ଭୁବନେଶ୍ୱର,୧୦/୦୬: ପାଳନ ହେବ ସ୍କୁଲ ସୁରକ୍ଷା ସପ୍ତାହ । ଆସନ୍ତା ୧୯ରୁ ୨୫ ତାରିଖ ପର୍ଯ୍ୟନ୍ତ ଏହା ପାଳନ କରାଯିବ । ଏ ନେଇ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ସମସ୍ତ ଜିଲ୍ଲା ଶିକ୍ଷା ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି । ଏହି ସପ୍ତାହ ପାଳନ ହେଉଛି କି ନାହିଁ ତାହାର ତଦାରଖ କରାଯିବ । ଏଥିପାଇଁ ଅଧିକାରୀମାନେ ନିୟମିତ ରିପୋର୍ଟ କରିବେ ।
ସ୍କୁଲ ଓ ଛାତ୍ରଛାତ୍ରୀଙ୍କୁ ସୁରକ୍ଷାକୁ ପ୍ରାଧାନ୍ୟ ଦିଆଯିବ । ନିରାପଦ ଶୈକ୍ଷିକ ପରିବେଶ ସୃଷ୍ଟି କରିବା ହେଉଛି ଏହି ସ୍କୁଲ ସୁରକ୍ଷା ସପ୍ତାହର ମୁଖ୍ୟ ଲକ୍ଷ୍ୟ । ପିଲାମାନଙ୍କ ମାନସିକ ଓ ଶାରୀରିକ ସ୍ୱାସ୍ଥ୍ୟକୁ ଗୁରୁତ୍ୱ ଦିଆଯିବ । ନିର୍ଯାତନା ମୁକ୍ତ ନୀତି, ଜରୁରିକାଳୀନ ପ୍ରସ୍ତୁତି, ସୁରକ୍ଷିତ କ୍ୟାମ୍ପସ୍ କରିବା ସହ ଏକ ସକାରାତ୍ମକ ସ୍କୁଲ ସଂସ୍କୃତି ପ୍ରତିପୋଷଣ କରିବା ହେଉଛି ଏହାର ଲକ୍ଷ୍ୟ । ଭାବପ୍ରବଣତା, ଖରାପ ଭାଷାକୁ ବିରୋଧ ପଦକ୍ଷେପ, ସୁରକ୍ଷିତ ଭିତ୍ତିଭୂମି, ସାଇବର୍ ସିକ୍ୟୁରିଟି, ସ୍ୱାସ୍ଥ୍ୟ ଓ ସ୍ୱଚ୍ଛତା, କମ୍ପ୍ୟୁନିଟି ଯୋଗଦାନ, ଆଇନଗତ ଅନୁପାଳନ ଓ ପୋଷଣକୁ ଗୁରୁତ୍ୱ ଦିଆଯିବ । ପୂର୍ବ ବର୍ଷ ପରି ଚଳିତବର୍ଷ ମଧ୍ୟ ସମସ୍ତ ସରକାରୀ ସ୍କୁଲରେ ଏହି ସୁରକ୍ଷା ସପ୍ତାହ ପାଳନ କରାଯିବ । ପ୍ରଥମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ପିଲାଙ୍କୁ ସାମିଲ କରାଯିବ । ଶିକ୍ଷାର୍ଥୀ ଯେପରି ସ୍କୁଲକୁ ଶିକ୍ଷା ପାଇଁ ଏକ ସୁରକ୍ଷିତ ସ୍ଥାନ ଭାବେ ଅନୁଭବ କରନ୍ତି ସେ ନେଇ ଧ୍ୟାନ ଦିଆଯିବ ।
ଜୁନ୍ ୧୭ ତାରିଖରୁ ସମସ୍ତ ଶ୍ରେଣୀ ଗୃହ ସମେତ କ୍ୟାମ୍ପସ୍କୁ ସମ୍ପୂର୍ଣ୍ଣ ସଫା କରାଯିବ । ସୁରକ୍ଷା ଅନୁଦାନ ସମସ୍ତ ସରକାରୀ ସ୍କୁଲକୁ ୨ହଜାର ଟଙ୍କା ଲେଖାଏଁ ଦିଆଯିବ । ‘ଆମ ସଂସ୍କୃତି ଆମ ଖେଳନା’ କାର୍ଯ୍ୟକ୍ରମ ପାଇଁ ୫୦୦୦ ଟଙ୍କା ଦିଆଯିବ । ଏଥିରେ ପିଲାଙ୍କ ସୁରକ୍ଷାକୁ ପ୍ରାଧାନ୍ୟ ଦିଆଯିବ । ସେହିପରି ଅନୁଦାନ ଓ ବେସରକାରୀ ସ୍କୁଲ କର୍ତ୍ତୃପକ୍ଷ ନିଜ ଖର୍ଚ୍ଚରେ ଏହି ସପ୍ତାହ ପାଳନ କରିବେ । ଜୁନ୍ ୧୭ରେ ଶିକ୍ଷକମାନେ ସ୍କୁଲ ଆସି କ୍ୟାମ୍ପସ ସଫେଇକୁ ସୁନିଶ୍ଚିତ କରିବେ । ୧୯ ରେ ସ୍କୁଲ ପରିଚାଳନା କମିଟି ଓ ନିରାପଦ କମିଟି କ୍ୟାମ୍ପସ ଯାଞ୍ଚ କରିବେ । ଅସମ୍ବେଦନଶୀଳ, ଅସୁରକ୍ଷିତ ସ୍ଥାନକୁ ଯାଞ୍ଚ କରି ଚିହ୍ନଟ କରିବେ । ୨୦ରେ ଅସୁରକ୍ଷିତ କୋଠାକୁ ଚିହ୍ନଟ କରିବେ । ଭାଙ୍ଗିଯାଇଥିଲେ କିମ୍ବା ଛାତରୁ ସିମେଣ୍ଟ ଖସୁଥିଲେ ଏହାର ମରାମତି ହେବ ।
ଗ୍ୟାସ୍ ଷ୍ଟୋଭ୍, କିରୋସିନି, ପେଟ୍ରୋଲ୍, ଏସିଡ୍, ଲ୍ୟାବ୍ କେମିକାଲ୍ ଆଣ୍ଡ ଟକ୍ସିକ୍ ସାମଗ୍ରୀ (ଫିନାଇଲ୍, ତରଳ ସାବୁନ୍) ଆଦି ସୁରକ୍ଷିତ ରଖାଯିବ। ୨୧ରେ ଅଗ୍ନି ନିରାପତ୍ତା ସାମଗ୍ରୀର କାର୍ଯ୍ୟକ୍ଷମତା ଯାଞ୍ଚ କରାଯିବ । ଶୌଚାଳୟ କାର୍ଯ୍ୟକ୍ଷମ ଓ ଏହାର ମରାମତି ପାଇଁ ପଦକ୍ଷେପ ନିଆଯିବ । ସ୍ୱଚ୍ଛ ପିଇବା ପାଣିକୁ ଧ୍ୟାନ ଦିଆଯିବ । ୨୪ରେ ପିଲାମାନେ କ’ଣ କରିବା ଉଚିତ୍ ଓ ଅନୁଚିତ୍ ତାକୁ ନେଇ ମକ୍ ଡ୍ରିଲ୍ କରାଯିବ । ସ୍କୁଲ ସୁରକ୍ଷା ନେଇ ଶପଥ ପାଠ କରାଯିବ । ସ୍କୁଲ ସୁରକ୍ଷା ନିର୍ଦ୍ଦେଶାବଳୀ ବହି ଓଡ଼ିଆରେ ପ୍ରସ୍ତୁତ କରାଯାଇ ଦିଆଯିବ । ୨୫ରେ ସୁରକ୍ଷା ସପ୍ତାହ ବିଷୟରେ ସମସ୍ତ ତଥ୍ୟ ପ୍ରସ୍ତୁତ କରାଯିବ । ପ୍ରତି ମାସର ପ୍ରଥମ ସପ୍ତାହରେ ସ୍କୁଲ ସ୍ୱାସ୍ଥ୍ୟ ରେଜିଷ୍ଟର୍ ଯାଞ୍ଚ କରାଯିବ।