ଭୁବନେଶ୍ୱର, ୧୮/୦୬: ସୋମବାର ଯୁକ୍ତ ୩ ନାମଲେଖା ଆବେଦନ ଶେଷ ହୋଇଛି । ରାଜ୍ୟର ୧୦୫୬ କଲେଜ ଓ ବିଶ୍ୱବିଦ୍ୟାଳୟରେ ୨ ଲକ୍ଷ ୭୪ ହଜାର ୫୦୭ ସିଟ୍ରେ ନାମଲେଖା ହେବ । ସୋମବାର ରାତି ୧୨ଟା ସୁଦ୍ଧା ୨ ଲକ୍ଷ ୩୫ ହଜାର ୪୬୮ ବିଦ୍ୟାର୍ଥୀ ଆବେଦନ କରିଥିବା ବେଳେ ଏଥିରୁ ୨ ଲକ୍ଷ ୩୩ ହଜାର ୪୪୧ ଜଣ ଅନ୍ଲାଇନ୍ରେ ଫି ଦାଖଲ କରିଛନ୍ତି । ତେବେ ଚଳିତ ବର୍ଷ ସିଟ୍ ସଂଖ୍ୟା ଠାରୁ ୩୯ ହଜାର କମ୍ ପିଲା ଆବେଦନ କରିଛନ୍ତି । ଆଶଙ୍କା କରାଯାଉଛି ସିଟ୍ ଫାଙ୍କା ପଡ଼ିବ । ଗତବର୍ଷ ଭଳି ଚଳିତବର୍ଷ ମଧ୍ୟ ସିଟ୍ ଖାଲି ରହିବ ।
ଆବେଦନ ସୋମବାର ଶେଷ ହୋଇଛି । ୧୮ ଓ ୧୯ ତାରିଖରେ ଫର୍ମ ସଂଶୋଧନର ସୁଯୋଗ ଦିଆଯିବ । ୨୫ ତାରିଖରେ ପ୍ରଥମ ରାଉଣ୍ଡ ଚୟନ ତାଲିକା ପ୍ରକାଶ ପାଇବ । ୨୬ରୁ ୨୯ ତାରିଖ ପର୍ଯ୍ୟନ୍ତ ଏହି ରାଉଣ୍ଡରେ ଚୟନ ହୋଇଥିବା ପିଲାମାନେ ନାମ ଲେଖାଇବେ। ସେହିପରି ଜୁଲାଇ ୫ରେ ଦ୍ୱିତୀୟ ରାଉଣ୍ଡ ନାମଲେଖା ପାଇଁ ଚୟନ ତାଲିକା ପ୍ରକାଶ ପାଇବ । ୬ରୁ ୯ ତାରିଖ ମଧ୍ୟରେ ନାମଲେଖା ହେବ । ଜୁଲାଇ ୧୫ରେ ତୃତୀୟ ରାଉଣ୍ଡ ନାମଲେଖା ପାଇଁ ଚୟନ ତାଲିକା ପ୍ରକାଶ ପାଇବ । ୧୮ ତାରିଖ ମଧ୍ୟରେ ନାମ ଲେଖାଇବେ ଚୟନ ହୋଇଥିବା ଶିକ୍ଷାର୍ଥୀ । ଏନେଇ ସମସ୍ତ ସୂଚନା ସାମ୍ସ ୱେବ୍ସାଇଟ୍ samsodisha.gov.in ରେ ରହିଛି ।
ସୂଚନାଯୋଗ୍ୟ, ୨ଟି ପର୍ଯ୍ୟାୟରେ ନାମଲେଖା ହେବ । ଗତ ବର୍ଷ ୨ଲକ୍ଷ ୭୧ ହଜାର ୯୧ ସିଟ୍ ଥିବା ବେଳେ ମୋଟ ୧ ଲକ୍ଷ ୮୭ ହଜାର ୩୧୯ ପିଲା ନାମ ଲେଖାଇଥିଲେ । ୮୩ ହଜାର ୭୭୨ ସିଟ୍ ଖାଲି ପଡ଼ିଥିଲା । ସେହିପରି ୨୦୨୨-୨୩ ଶିକ୍ଷାବର୍ଷରେ ୨ ଲକ୍ଷ ୫୫ ହଜାର ୯୮୦ ସିଟ୍ ଥିବା ବେଳେ ୧ ଲକ୍ଷ ୯୩ ହଜାର ୪୨ ସିଟ୍ରେ ନାମଲେଖା ହୋଇଥିଲା । ତେବେ ଆହୁରି ୬୨ ହଜାର ୯୩୮ ସିଟ୍ ଖାଲି ପଡ଼ିଥିଲା । ଚଳିତବର୍ଷ ନାମଲେଖା ପାଇଁ ଥିବା ସିଟ୍ ସଂଖ୍ୟା ଠାରୁ ୩୯ ହଜାର କମ୍ ପିଲା ଆବେଦନ କରିଛନ୍ତି । ଏହା ଭିତରୁ ପୁଣି କିଛି ପିଲା ନାମ ମଧ୍ୟ ଲେଖାଇ ନପାରନ୍ତି ବୋଲି ଆଶଙ୍କା ରହିଛି ।
