ଭୁବନେଶ୍ୱର ୨୨/୦୭: ଇଂରାଜୀ ମାସ ଜୁଲାଇ ୨୨ ତାରିଖରୁ ଦେବ ଦେବ ମହାଦେବଙ୍କ ପ୍ରିୟ ମାସ ଶ୍ରାବଣ ଆରମ୍ଭ ହୋଇଯିବ। ଶିବଙ୍କ ଦିବସ ଭାବେ ଗଣ୍ୟ ହେଉଥିବା ସୋମବାରରୁ ହିଁ ଶ୍ରାବଣ ମାସ ଆରମ୍ଭ ହୋଇ ସେହି ସୋମବାର ଅଗଷ୍ଟ ୧୯ ତାରିଖରେ ଶେଷ ହେବ ବୋଲି ଜଣାଯାଏ । ଏଥର ୨୯ଦିନିଆ ଶ୍ରାବଣ ମାସରେ ୫ଟି ସୋମବାର ରହିଛି ।
ଏଥର ଶ୍ରାବଣ ମାସଟି ଗ୍ରହନକ୍ଷତ୍ର ଯୋଗାଯୋଗ ଦୃଷ୍ଟିରୁ ବିଶେଷ ବୋଲି ଜ୍ୟୋତିର୍ବିଦଙ୍କର ମତ । ଶ୍ରାବଣରେ ସର୍ବାର୍ଥ ସିଦ୍ଧି ଯୋଗ,ପ୍ରୀତି ଯୋଗ,ଆୟୁଷ୍ମାନ ଯୋଗ ସହ ଚନ୍ଦ୍ର ଏବଂ ମଙ୍ଗଳ ଯୁକ୍ତ ନବପଞ୍ଚମ ଯୋଗ ତଥା ଶଶ ଯୋଗ ପଡ଼ିବାକୁ ଯାଉଛି । ଏହି ଦୁର୍ଲଭ ଯୋଗ ଦୀର୍ଘ ୭୨ବର୍ଷ ପରେ ପଡିବ ବୋଲି ଜଣାପଡିଛି । ଏହି ମାସରେ ଶିବଙ୍କ ଜଳାଭିଷେକ କରିବା ସହିତ ଦ୍ୱାଦଶ ଜ୍ୟୋତିର୍ଲିଙ୍ଗ ଦର୍ଶନ କରିବା ମହାପୁଣ୍ୟଦାୟୀ ଅଟେ ।