ମୁମ୍ବାଇ: ବଲିଉଡ ସୁପରଷ୍ଟାର ସଲମାନ ଖାନଙ୍କ ଘର ଉପରକୁ ଗୁଳିମାଡ଼ ମାମଲାରେ ବଡ଼ ଖବର ସାମ୍ନାକୁ ଆସିଛି । ମାମଲାର ଅଭିଯୁକ୍ତ ଭିକି ଗୁପ୍ତା (୨୪), ସାଗର ପାଲ (୨୧) ଏବଂ ଅନୁଜ ଥାପନ (୩୨) ପୋଲିସ ହେପାଜତରେ ଅଛନ୍ତି । ହେଲେ ଏବେ ଏବେ ମିଳିଥିବା ସୂଚନା ଅନୁସାରେ, ଅଭିଯୁକ୍ତଙ୍କ ମଧ୍ୟରୁ ଜଣେ ଆତ୍ମହତ୍ୟା କରିବାକୁ ଚେଷ୍ଟା କରିଥିଲା ଏବଂ ତାର ମୃତ୍ୟୁ ହୋଇଯାଇଛି । ମୃତ ଅଭିଯୁକ୍ତ ଅନୁଜ ଥାପନ ବୋଲି ଜଣାପଡ଼ିଛି ।
ପୋଲିସ ହେପାଜତରେ ଅଭିଯୁକ୍ତ ଅନୁଜ ଆତ୍ମହତ୍ୟା କରିଛି । ଟୟଲେଟ୍ରେ ପଶି ବେକରେ ଚାଦର ଲଗାଇ ଝୁଲିପଡ଼ିଥିଲା ଅନୁଜ। ଏହା ପରେ ତାକୁ ଆଜି ଦିନ ୧୨.୩୦ରେ ହସ୍ପିଟାଲ ନେଇଥିଲା ପୋଲିସ । ଚିକିତ୍ସିତ ଅବସ୍ଥାରେ ଅନୁଜ ଥାପନର ମୃତ୍ୟୁ ହୋଇଯାଇଛି । ପୋଲିସ ହେପାଜତରେ ଥିବା ବେଳେ ଅଭିଯୁକ୍ତ ଅନୁଜ ଆତ୍ମହତ୍ୟା କରିବା ମାମଲାରେ ଏବେ ସିଆଇଡି ଯାଞ୍ଚ କରିବ ବୋଲି ଜଣାପଡ଼ିଛି ।
ଏପ୍ରିଲ ୧୪ (ରବିବାର) ସକାଳେ ସଲମାନ ଖାନଙ୍କ ଘର ଗ୍ୟାଲାକ୍ସି ଆପାର୍ଟମେଣ୍ଟ ବାହାରେ ଫାୟାରିଂ ହୋଇଥିଲା । ଏହି ଖବର ଦେଶରେ ଚାଞ୍ଚଲ୍ୟ ଖେଳାଇ ଦେଇଥିଲା । ବାଇକରେ ଆସି ଦୁଇ ଜଣ ଦୁର୍ବୁତ୍ତ ସଲମାନଙ୍କ ଘର ବାହାରେ ୫ ରାଉଣ୍ଡ ଗୁଳିମାଡ଼ କରିଥିଲେ । ଏହା ପରେ ଉକ୍ତ ୨ ଅଭିଯୁକ୍ତ ୩ ଥର ପୋଷାକ ପରିବର୍ତ୍ତନ କରିଥିଲେ । ସେମାନଙ୍କ ପାଖରେ ୪୦ ରାଉଣ୍ଡ ଗୁଳି ଥିଲା ବୋଲି କୋର୍ଟରେ ପୋଲିସ କହିଛି ।
ସଲାମାନଙ୍କ ଘର ବାହାରେ ଗୁଳିମାଡ଼ କରାଇବା ପଛରେ ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇର ଭାଇ ଅନମୋଲ୍ର ହାତ ଥିଲା । ଏନେଇ ସେ ଖୋଦ ସୋସିଆଲ ମିଡିଆରେ ଜଣାଇଥିଲା । ସେପଟେ ଏହି ମାମଲାରେ ଅଭିଯୁକ୍ତ ଭିକି ଗୁପ୍ତା, ସାଗର ପାଲ ଏବଂ ଅନୁଜ ଥାପନକୁ ମେ’ ୮ ଯାଏଁ ବିଚାର ବିଭାଗୀୟ ହାଜତକୁ ପଠାଇଥିଲେ କୋର୍ଟ । ଆଉ ଏବେ ଜଣେ ଅଭିଯୁକ୍ତ ଅନୁଜ ଥାପନ ଆତ୍ମହତ୍ୟା କରିଦେଇଛି ।
