ପୁରୀ, ୨୦/୦୯: ଫେସ୍ବୁକ୍ରୁ ଆରମ୍ଭ ହେଲା ପ୍ରେମ । ସୋସିଆଲ୍ ମିଡିଆରେ ଖାକି ବର୍ଦ୍ଦି ପିନ୍ଧା ଭେଳିକି ଭେଳି ଫଟୋ ଛାଡ଼ି ଜଣେ କନ୍ଷ୍ଟେବଲ କିଣି ନେଲେ ଯୁବତୀଙ୍କ ମନ । ପ୍ରେମ ଏଭଳି ସ୍ତରକୁ ଗଲା ଯେ, ଯୁବତୀଙ୍କ ସହ କନ୍ଷ୍ଟେବଲ ଜଣକ ନିବିଡ଼ ସମ୍ପର୍କ ବି ସ୍ଥାପନ କରିଦେଲେ । କିନ୍ତୁ ପରେ ବିବାହକୁ ଅରାଜି ହୋଇଥିଲେ । ଶେଷରେ ଲୁଚିକି ଅନ୍ୟତ୍ର ବିବାହ କରିଦେଲେ। ଯାହାକୁ ଯୁବତୀ ଜଣକ ବର୍ଦାସ୍ତ କରିପାରିଲେ ନାହିଁ । ଶେଷରେ ଟାଉନ୍ ଥାନାରେ ଅଭିଯୋଗ କରିଥିଲେ । ପୁଲିସ କନ୍ଷ୍ଟେବଳଙ୍କ ବିରୋଧ ରୁଜୁ ହେଲା ମାମଲା । ବନ୍ଧା ହେଲେ କନ୍ଷ୍ଟେବଲ ଗୋବିନ୍ଦ ଚନ୍ଦ୍ର ସାହୁ(୩୦) । ସେ କୋଣାର୍କ ଥାନାରେ ଏବେ କାର୍ଯ୍ୟ କରୁଥିଲେ । ଏଭଳି ଏକ ଘଟଣା ପୁରୀ ସହ ସମେତ କୋଣାର୍କ ଓ ବ୍ରହ୍ମଗିରି ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
ଖବର ଅନୁସାରେ ବ୍ରହ୍ମଗିରି ଅଞ୍ଚଳରେ କନ୍ଷ୍ଟେବଳ ଗୋବିନ୍ଦ ଓ ଯୁବତୀଙ୍କ ଘର । ଯୁବତୀ ଜଣକ ଟାଉନ୍ ଥାନା ଅଞ୍ଚଳରେ ଭଡ଼ାଘରେ ରହି ଚାକିରି ପାଇଁ ପଢ଼ାପଢ଼ି କରୁଥିଲେ । ୨୦୨୧ ସେପ୍ଟେମ୍ବରରେ ଯୁବତୀଙ୍କ ଫେସ୍ବୁକ୍କୁ ଗୋବିନ୍ଦ ଫ୍ରେଣ୍ଡ ରିକ୍ୟୁଏଷ୍ଟ ପଠାଇଥିଲେ । ନିଜ ଅଞ୍ଚଳର ହୋଇଥିବାରୁ ସେମାନଙ୍କ ପରିଚୟ ଖୁବ୍ଶୀଘ୍ର ହୋଇଯାଇଥିଲା । ମେସେଞ୍ଜର୍ ମାଧ୍ୟମରେ ଆରମ୍ଭ ହୋଇଥିଲା ଉଭୟଙ୍କ ମଧ୍ୟରେ ବାର୍ତ୍ତାଳାପ । ଏହାପରେ ମୋବାଇଲ୍ ନମ୍ବର ଦେବା ନେବା ହୋଇ କଥା ଆଗକୁ ବଢିଥିଲା । ଏହା ପ୍ରେମରେ ପରିଣତ ହେଲା । ଭାବର ଆଦାନ ପ୍ରଦାନ ହେଲା । ପୁଲିସ ଲାଇନ୍ରେ ଭେଟ ହେଲେ । ଏହାପରେ ଯୁବତୀଙ୍କ ଭଡ଼ାଘରକୁ ସୁରକ୍ଷିତ ସ୍ଥାନ ଭାବେ ବାଛିନେଲେ ଗୋବିନ୍ଦ । ଭଡ଼ାଘରକୁ ଯାଇ ଗୋବିନ୍ଦ ବିବାହ କରିବାକୁ ଯୁବତୀଙ୍କୁ ପ୍ରସ୍ତାବ ଦେଲେ । ବିବାହର ପ୍ରଲୋଭନ ଦେଖାଇ ଯୁବତୀଙ୍କ ସହ ସମ୍ପର୍କ ରଖିଲେ ।
ଦୀର୍ଘ ଅଢ଼େଇ ବର୍ଷ ସମ୍ପର୍କ ରଖିବା ପରେ ଗତ ଏପ୍ରିଲ୍ ମାସରେ ଯୁବତୀଙ୍କଠାରୁ ଗୋବିନ୍ଦ ଦୂରେଇ ଯାଇଥିଲେ । କିଛିଦିନ ତଳେ ହଠାତ୍ ତାଙ୍କ ହ୍ୱାଟ୍ସ ଆପ୍ ଡିପି ଦେଖି ମାନସିକ ଭାରସାମ୍ୟ ହରାଇ ବସିଥିଲେ ଯୁବତୀ । ବିଶ୍ୱାସ ଥିଲା କିଛିଦିନର ନିରବତା ପରେ ଗୋବିନ୍ଦ ତାଙ୍କୁ ନିଜର କରିନେବେ । କିନ୍ତୁ ହ୍ୱାଟ୍ସ ଆପ୍ ଡିପିରେ ଗୋବିନ୍ଦଙ୍କ ସହ ଥିଲା ଆଉ ଜଣେ ମହିଳାଙ୍କ ଫଟୋ । ସେହି ମହିଳା ଗୋବିନ୍ଦଙ୍କ ପତ୍ନୀ ବୋଲି ଜାଣିବା ପରେ ଯୁବତୀଙ୍କ ସବୁ ସ୍ୱପ୍ନ ଭାଙ୍ଗି ଯାଇଥିଲା । ଗୋବିନ୍ଦ ଅନ୍ୟତ୍ର ବିବାହ କରିସାରିଥିବା ଜାଣି ଶେଷରେ ଥାନାର ଦ୍ୱାରସ୍ଥ ହୋଇଥିଲେ ସେ । ଅନୁସନ୍ଧାନ ପରେ ମାମଲା ରୁଜୁ କରିଥିଲେ ଆଇଆଇସି ସୁନୀଲ ପ୍ରଧାନ । ମାମଲାର ତଦନ୍ତ ଦାୟିତ୍ୱ ଗ୍ରହଣ କରିଥିଲେ ଆଇୟୁସିଏଡବ୍ଲ୍ୟୁ ଡିଏସ୍ପି କଳ୍ପନା କାଉରୀ । ବୁଧବାର କୋଣାର୍କ ଥାନାରୁ କନ୍ଷ୍ଟେବଲ୍ ଗୋବିନ୍ଦଙ୍କୁ ଉଠାଇ ଆଣିଥିଲା ଟାଉନ୍ ଥାନା ପୁଲିସ । ଗୁରୁବାର ତାଙ୍କୁ ଗିରଫ କରାଯାଇଥିବା ସହ ରାତିରେ କୋର୍ଟ ଚାଲାଣ କରାଯାଇଛି । ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲ୍ ପଠାଇ ଦିଆଯାଇଛି ।
