ମୁମ୍ବାଇ ୨୧/୦୯: ଗତ ଶୁକ୍ରବାର ସିନେ ପରଦାକୁ ଆସିଛି ରୋମାଣ୍ଟିକ୍‌ କମେଡି ଫିଲ୍ମ ‘କହାଁ ସୁରୁ କହାଁ ଖତମ୍‌’ । ଏହା ଜରିଆରେ ସିନେ ଦୁନିଆରେ ଏଣ୍ଟ୍ରି କରିଛନ୍ତି ଗାୟିକା ଧ୍ୱନି ଭାନୁଶାଲୀ । ତାଙ୍କ ସହ ନାୟକ ଭୂମିକାରେ ସ୍କ୍ରିନ୍‌ ଶେୟାର କରିଛନ୍ତି ଆଶିମ ଗୁଲାଟି । ଫିଲ୍ମରେ ରାକେଶ ବେଦୀ, ସୁପ୍ରିୟାଙ୍କ ଭଳି ବରିଷ୍ଠ କଳାକାର ଅଭିନୟ କରିଛନ୍ତି । ନିର୍ଦ୍ଦେଶନା ଦେଇଛନ୍ତି ସୌରଭ ଦାସଗୁପ୍ତା । କାହାଣୀ ଲେଖିଛନ୍ତି ଲକ୍ଷ୍ମଣ ଉତେକର । 

ସଙ୍ଗୀତ ଦୁନିଆରେ ସଫଳତା ହାସଲ କରିଥିବା ଧ୍ୱନି ଗାୟିକାରୁ ନାୟିକା ହେବାର ଯାତ୍ରା ବିଷୟରେ ନିଜ ଇନ୍‌ଷ୍ଟା ପୋଷ୍ଟ୍‌ ମାଧ୍ୟମରେ ଫ୍ୟାନ୍‌ଙ୍କ ସହ ଶେୟାର କରିଛନ୍ତି । ସେ କହିଛନ୍ତି, ଅଗଣିତ ଦିନ ଓ ରାତି ଅନିଦ୍ରା ରହି, ୬୦୦ ଘଣ୍ଟାର ଅଭିନୟ କ୍ଲାସ୍‌ କରି ଏବଂ ନିଜର ସବୁ ଶକ୍ତି-ସାମର୍ଥ୍ୟକୁ ବାଜି ଲଗାଇଦେବା ପରେ ସେ ବୁଝିପାରିଲେ ଯେ ଜଣେ କଳାକାର ହେବାକୁ କ’ଣ କରିବାକୁ ପଡ଼େ । ଯେଉଁ ମୁହୂର୍ତ୍ତକୁ ସେ ଦୀର୍ଘ ଦିନ ଧରି ଅପେକ୍ଷା କରିଥିଲେ, ଶେଷରେ ତାହା ଆସିଛି । ନାୟିକା ରୂପେ ନିଜର ପ୍ରଥମ ପଦାର୍ପଣକୁ ନେଇ ଧ୍ୱନି ଖୁବ୍‌ ଉତ୍ସାହିତ ଅଛନ୍ତି ।