ନୂଆଦିଲ୍ଲୀ: କମ୍ପାନିରେ ଆର୍ଥିକ ହେରଫେର ମାମଲାରେ ଭାରତ ପେ’ର ସହ-ପ୍ରତିଷ୍ଠାତା ଅଶନୀର ଗ୍ରୋଭରଙ୍କ ପରିବାର ସଦସ୍ୟ ଦୀପକ ଗୁପ୍ତାଙ୍କୁ ଗିରଫ କରିଛି ଦିଲ୍ଲୀ ପୋଲିସର ଅର୍ଥନୈତିକ ଅପରାଧ ଶାଖା (EOW) । ଦୀପକ ଗୁପ୍ତାଙ୍କୁ ପଚରା ଉଚରା ପରେ ଶୁକ୍ରବାର ନିୟମ ଅନୁଯାୟୀ ତାଙ୍କୁ ଗିରଫ କରାଯାଇଛି ବୋଲି ଇଓଡବ୍ଲୁ ଡିସିପି ରାଜା ବାନ୍ଥିଆ କହିଛନ୍ତି । ମେ’ ୨୦୨୩ରେ  ଅଶନୀର ଗ୍ରୋଭର ଏବଂ ପତ୍ନୀ ମାଧୁରୀ ଜୈନଙ୍କ ବିରୋଧରେ ହୋଇଥିବା ମାମଲାରେ ଦୀପକ ଗୁପ୍ତାଙ୍କ ନାଁ ସାମିଲ ଥିଲା ।  

ସେପ୍ଟେମ୍ବର ୧୯ ରାତିରେ ଗିରଫ ହୋଇଥିବା ଦୀପକ ଗୁପ୍ତା, ମାଧୁରୀ ଜୈନଙ୍କ ଭଉଣୀଙ୍କ ସ୍ବାମୀ ।  ମିଳିଥିବା ସୂଚନା ଅନୁସାରେ, ଦୀପକ ଗୁପ୍ତା ଭାରତ ପେ’ର କ୍ରୟ ପ୍ରମୁଖ ଥିଲେ । ତାଙ୍କ ସମୟରେ କମ୍ପାନିରେ ହେରଫେର ହୋଇଥିବା ନେଇ ଅଭିଯୋଗ ହୋଇଥିଲା । ପୂର୍ବରୁ ଏହି ମାମଲାରେ ଅନ୍ୟ ଜଣେ ଅଭିଯୁକ୍ତ ଅମିତ ବଂଶଲଙ୍କୁ ଗିରଫ କରିଥିଲା ଅର୍ଥନୈତିକ ଅପରାଧ ଶାଖା । 

ଅମିତ ବଂଶଲଙ୍କ ବୟାନ କ୍ରମେ ମାମଲାରେ ଦୀପକ ଗୁପ୍ତାଙ୍କ ସଂପୃକ୍ତି ସଂପର୍କରେ ଜଣାପଡ଼ିଥିଲା । ଭାରତ ପେ’ରେ ପ୍ରାୟ ୮୧ କୋଟି ଟଙ୍କାର ଦୁର୍ନୀତି ହୋଇଥିଲା । ଏହାକୁ ନେଇ ଡିସେମ୍ବର ୨୦୨୨ରେ କମ୍ପାନି ପକ୍ଷରୁ ଅଶନୀର ଗ୍ରୋଭର, ମାଧୁରୀ ଜୈନ,   ଶ୍ବେତାଙ୍କ ଜୈନ( ମାଧୁରୀଙ୍କ ଭାଇ), ସୁରେଶ ଜୈନ (ଅଶନୀରଙ୍କ ଶ୍ବଶୁର) ଏବଂ ଦୀପକ ଗୁପ୍ତା (ମାଧୁରୀଙ୍କ ଭିଣୋଇ)ଙ୍କ ବିରୋଧରେ ମାମଲା ଦାଏର କରାଯାଇଥିଲା ।