ଧୁଷୁରୀ,୩୧/୩: ଭଦ୍ରକ ଜିଲ୍ଲା ଧାମନଗର ବ୍ଲକ୍ ମଧ୍ୟଦେଇ ପ୍ରବାହିତ ରେବ ନଦୀ ଏବେଠୁ ଶୁଖିଗଲାଣି । ନଦୀ ସଂସ୍କାର ଯୋଜନାରେ ପ୍ରାୟ ୯ କୋଟିରୁ ଊର୍ଦ୍ଧ ଟଙ୍କାରେ ଏହା ଖନନ କରାଯାଇଥିଲେ ମଧ୍ୟ ଏହା ଯଥାପୂର୍ବ ତଥା ପରଂ ଅବସ୍ଥାରେ ରହିଛି । ଫଳରେ ନଦୀଉପକୂଳବର୍ତ୍ତୀ ଅଞ୍ଚଳର ଚାଷୀ ଏବେ ଚିନ୍ତାରେ । ଅପରପକ୍ଷେ ନିଲାମ ଧରି ମାଛ ମାରୁଥିବା ମତ୍ସ୍ୟଜୀବୀଙ୍କ କୁଳବେଉସା ମଧ୍ୟ ବୁଡ଼ିଯିବାକୁ ବସିଲାଣି । କେନ୍ଦୁଝର ଜିଲ୍ଲା ହାଟଡିହି ବ୍ଲକ୍ ନନ୍ଦିପଦା ଅଞ୍ଚଳର ଧାନ ବିଲରୁ ନାଳ ଭଳି ବାହାରିଥିବା ରେବ ନଦୀ ବନ୍ତ, ଭଣ୍ଡାରିପୋଖରୀ ବ୍ଲକ୍ ଦେଇ ଧାମନଗର ମଧ୍ୟ ଦେଇ ତିହିଡ଼ି ବ୍ଳକ ଶ୍ୟାମସୁନ୍ଦରପୁର ଦପାନାୟକାଣିରେ ଗେଙ୍ଗୁଟି ନଦୀରେ ମିଶିଛି । ୫୨ କିଲୋମିଟର ଲମ୍ବର ଏହି ନଦୀ ଉପରେ ଭଦ୍ରକ ଜିଲ୍ଲାର ୫ଟି ବ୍ଲକର ପ୍ରାୟ ୯ ଶହ ଗ୍ରାମର ଲୋକ ଏହା ଉପରେ ନିର୍ଭରଶୀଳ । କେବଳ ଧାମନଗର ବ୍ଲକର ୧୦ ଗ୍ରାମର ୫ହଜାରରୁ ଊଦ୍ଧ୍ୱର୍ ଚାଷୀ ଏହା ଉପରେ ନିର୍ଭରଶୀଳ । ଚାଷୀମାନେ ପ୍ରାୟ ୭ ଶହ ହେକ୍ଟରରୁ ନଦୀ ଶୁଖିବାକୁ ବସିବାରୁ ଚାଷୀଙ୍କ ମୁଣ୍ଡରେ ଚଡ଼କ ପଡ଼ିଛି । ନିଜ ଚାଷକୁ କେମିତି ବଞ୍ଚାଇ ରଖିବେ, ସେହି ଚିନ୍ତାରେ ପଡ଼ିଛନ୍ତି ଚାଷୀ ।
ଅନ୍ୟପକ୍ଷରେ, ନଦୀ ସଂସ୍କାର ଯୋଜନାରେ ପ୍ରାୟ ୧୨ ବର୍ଷ ପୂର୍ବେ ରେବ ନଦୀ ଶଯ୍ୟା ଖନନ କରାଯାଇଥିଲା । ୯କୋଟିରୁ ଊଦ୍ଧ୍ୱ ର୍ ଟଙ୍କା ଏଥି ନିମନ୍ତେ ଖର୍ଚ୍ଚ ହୋଇଥିଲା । କିନ୍ତୁ ନଦୀ ଖନନ ସମୟରୁ ଆଡ଼ିବନ୍ଧ ଅଧିକ ଜମିରେ ଧାନ, ମୁଗ, ବିରି ସମେତ ରବି ଋତୁରେ ପନିପରିବା ଚାଷ କରିଥାନ୍ତି । ମାତ୍ର ଗ୍ରୀଷ୍ମ ଋତୁ ଆରମ୍ଭରୁ ରେବ ସବୁ ମୁକୁଳା ପଡ଼ିଛି । ନଦୀଗର୍ଭ ପୋତି ହୋଇଗଲାଣି । ନଦୀ ଖନନ ଠିକ ଭାବେ ହୋଇନଥିବାରୁ ବନ୍ୟା ସମୟରେ ବହୁ ପଞ୍ଚାୟତର ପ୍ରଭୂତ କ୍ଷତି ଘଟୁଛି । କାକୁଡ଼ିଗଡ଼ିଆ ଠାରେ ରେବ ନଦୀରେ ଏକ ଚେକ୍ଡ୍ୟାମ୍ ନିର୍ମାଣ ହେଲେ ବହୁ ଚାଷୀ ଉପକୃତ ହୋଇପାରନ୍ତେ ବୋଲି ମତ ପ୍ରକାଶ ପାଇଛି । ଏ ନେଇ ଭଦ୍ରକ ଜଳ ନିଷ୍କାସନ (ଡ୍ରେନେଜ୍) ବିଭାଗ ଯନ୍ତ୍ରୀ ପ୍ରଦୀପ୍ତ କୁମାର ମଲ୍ଲିକ କହିଛନ୍ତିଯେ, ଖୁବ୍ଶୀଘ୍ର ସର୍ଭେ କରାଯାଇ ଆବଶ୍ୟକ ପଦକ୍ଷେପ ଗ୍ରହଣ କରାଯିବ ।
