ଧାମରା,୨୬/୩ : ଦିନକୁ ଦିନ ବେପରୁଆ ଗାଡ଼ି ଚାଳନା ବୃଦ୍ଧି ପାଇବାରେ ଲାଗିଛି । କାହାରିକୁ ନମାନି ବେପରୁଆ ଭାବେ ଦ୍ରୁତଗତିରେ ଗାଡ଼ି ଚଳାଇବାରେ ମୁଖ୍ୟତଃ ପିଲାମାନଙ୍କୁ ଦେଖିବାକୁ ମିଳୁଛି । ପିଲାଙ୍କ ହାତରେ ଅଭିଭାବକମାନେ ବାଇକ ଚାବି ଧରାଇଦେବା ପରେ ସେମାନେ ଆଉ କାହାରିକୁ ମାନୁନାହାନ୍ତି । ନିୟମିତ ଏଭଳି ବାଇକ ଚାଳନା ପାଇଁ ଅନ୍ୟ ପଥଚାରୀ ଦୁର୍ଘଟଣାର ଶିକାର ହେଉଛନ୍ତି । ଖାସ୍ କରି ଦୁଇଚକିଆ ଯାନ ଯୋଗୁଁ ଅଧିକ ଦୁର୍ଘଟଣା ଘଟୁଛି । ତେବେ ସ୍କୁଲ ଓ କଲେଜ ଯାଉଥିବା ଛାତ୍ରଛାତ୍ରୀ ବାଇକ ଓ ସ୍କୁଟି ଚଳାଉଥିଲା ବେଳେ ଏଥିପ୍ରତି କାହାରି ନିଘା ରହୁ ନଥିବା ଅଭିଯୋଗ ହେଉଛି ।
ସରକାରୀ ନିୟମ ଅନୁସାରେ ନାବାଳକ ଓ ନାବାଳିକାଙ୍କୁ ଗାଡ଼ି ଚଳାଇବା ପାଇଁ ଲାଇସେନ୍ସ ପ୍ରଦାନ କରାଯାଇପାରିବ ନାହିଁ । କିନ୍ତୁ ଅଭିଭାବକଙ୍କ ଠାରୁ ଆରମ୍ଭ କରି ପୁଲିସ ଓ ପ୍ରଶାସନ ଏଦିଗରେ ଚୁପ । ୨୦୧୯ ଆଇନର ସେକ୍ସନ ୧୯୯(ଏ) ମୁତାବକ, ୧୮ ବର୍ଷରୁ କମ ବୟସର ଯେ କୌଣସି ଭାରତୀୟ ନାଗରିକ ଗାଡ଼ି ଚଳାଇବା ଦଣ୍ଡନୀୟ ଅପରାଧ । ଏଥିଲାଗି ସେମାନଙ୍କ ଅଭିଭାବକଙ୍କୁ ୨୫ ହଜାର ଟଙ୍କା ପର୍ଯ୍ୟନ୍ତ ଜରିମାନା ଗଣିବାକୁ ପଡ଼ିପାରେ । ଏହାକୁ ଭିତ୍ତି କରି କାଁଭାଁ ଚଢ଼ଉ ଓ ଯାଞ୍ଚ ହେଉଥିଲେ ବି ଏହା ଉପରେ ରୋକ ଲାଗି ପାରୁନି । ଆଇନରେ ଉଭୟ ଅଭିଭାବକ ଓ ଗାଡି ଚାଳକଙ୍କୁ କଠୋର ଦଣ୍ଡର ବ୍ୟବସ୍ଥା ଥାଇ ବି ବେଫିକର ଅଭିଭାବକ । ସୂଚନା ଅନୁଯାୟୀ ତିହଡ଼ିି ବ୍ଲକରେ ବହୁ ଘରୋଇ ଶିକ୍ଷାନୁଷ୍ଠାନ ରହିଛି । ସେସବୁ ସ୍ଥାନକୁ ପିଲାମାନେ ଗାଡ଼ି ନେଇ ଯାଉଛନ୍ତି । ସରକାରୀ କଲେଜ ଗୁଡ଼ିକରେ ବି ସମଦଶା ଦେଖିବାକୁ ମିଳୁଛି । ଲୋକଦେଖାଣିଆ ବାରଣ କରି ଶିକ୍ଷାନୁଷ୍ଠାନ ଚୁପ ବସୁଥିବା ବେଳେ ବିଭାଗ ପକ୍ଷରୁ ଚଢଉ ହେଉ ନଥିବାରୁ ପିଲାଙ୍କ ଡର ରହୁନି ।
ଏ ସମ୍ପର୍କରେ ତିହିଡ଼ି ବ୍ଲକର ଥିବା ସ୍ୱେଚ୍ଛାସେବୀ ସଂଗଠନ ଯୁବମଞ୍ଚ ତାଗିଦ କରିବା ଆରମ୍ଭ କରିଛି । କିନ୍ତୁ ସଚେତନତାର ଅଭାବ ଓ ଅଭିଭାବକଙ୍କ ଇଚ୍ଛା ଶକ୍ତିର ଅଭାବରୁ କିଛି ପିଲା ସରକାରୀ ନିୟମକୁ ମାନୁଥିବା ବେଳେ ଅନେକ ଏହାକୁ ମାନୁନଥିବାରୁ ଆଗାମୀ ଦିନରେ ଏହା ଏକ ବଡ଼ ସମସ୍ୟା ରୂପେ ଉଭା ହେବାର ସମ୍ଭାବନାକୁ ଏଡ଼ାଇ ଦିଆ ନଯାଇପାରେ । ତେଣୁ ପ୍ରଶାସନ ଉକ୍ତ ସମସ୍ୟାକୁ ଗମ୍ଭୀରତାର ସହ ନେଇ ସରକାରୀ ନିମୟକୁ କଡ଼ାକଡ଼ି ପାଳନ କରିବା ସହ ସଚେତନାର ବାର୍ତ୍ତା ପ୍ରଦାନ ପାଇଁ ପ୍ରୟାସ କରିବାକୁ ବୁଦ୍ଧିଜୀବୀ ମହଲରେ ଦାବି ହୋଇଛି ।
