ବରଗଡ଼, ୩୦/୩ : ଭିନ୍ନ ଜାତିରେ ବିବାହ କରିଥିବାରୁ ଅଛୁଆଁ ହେଲା ଶବ । ପାଖ ମାଡ଼ିଲେନି ଆତ୍ମୀୟ । ମଲା ପରେ ବି କାନ୍ଧ ମିଳିଲାନି । ଶେଷର ଶ୍ମଶାନ ସାଥୀଙ୍କ ସହାୟତାରେ ହେଲା ମହିଳାଙ୍କ ଶେଷକୃତ୍ୟ । କଳଙ୍କିତ ଜାତିପ୍ରଥାର ଏଭଳି କରୁଣ ଦୃଶ୍ୟ ଦେଖିବାକୁ ମିଳିଛି ବରଗଡ଼ ଜିଲ୍ଲାରେ । ପଥର୍ଲା ଗାଁର ଜଣେ ବ୍ୟକ୍ତି ସାହାଜବାହାଲର ଜଣେ ଯୁବତୀଙ୍କୁ ବିବାହ କରିଥିଲେ । ଉଭୟ ଭିନ୍ନ ସମ୍ପ୍ରଦାୟର ହୋଇଥିବାରୁ ଗାଁଲୋକଙ୍କ ବିରୋଧର ସମ୍ମୁଖୀନ ହୋଇଥିଲେ । ପୁଅକୁ ଜାତିରୁ ବାସନ୍ଦ କରାଯାଇଥିଲା । ସେପଟେ ଗ୍ରାମବାସୀଙ୍କ ଚାପରେ ବାପଘର ଲୋକେ ମଧ୍ୟ ବଞ୍ଚି ଥାଉ ଥାଉ ଝିଅର ପିଣ୍ଡଦାନ କରିଦେଇଥିଲେ । ଦୁଇ ପକ୍ଷରୁ ତୀବ୍ର ବିରୋଧ ପରେ ଦମ୍ପତି ବରଗଡ଼ ପୌରାଞ୍ଚଳର ୧୭ନଂ. ୱାର୍ଡ ଅମ୍ବାପାଲିରେ ଭଡ଼ାରେ ରହୁଥିଲେ । କୌଣସି କାରଣରୁ ସେମାନଙ୍କ ଦାମ୍ପତ୍ୟ ଜୀବନ ଠିକ୍ ନ ଥିଲା ।
ଦୁହେଁ ମାନସିକ ଦୁଃଶ୍ଚିନ୍ତାରେ ରହୁଥିଲେ । ଶନିବାର ରାତିରେ ସ୍ୱାମୀ କୁଆଡ଼େ ଚାଲିଯାଇଥିବାବେଳେ ଭଡ଼ା ଘରେ ସ୍ତ୍ରୀ ଫାଶୀ ଲଗାଇ ଜୀବନ ହାରିଥିଲେ । ବରଗଡ଼ ସଦରଥାନା ପୁଲିସ୍ ଶବ ଜବତ କରି ବ୍ୟବଚ୍ଛେଦ ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଥିଲା । ବ୍ୟବଚ୍ଛେଦ ପରେ ମୃତଦେହ ହସ୍ତାନ୍ତର କରିବା ବେଳକୁ ଉପୁଜିଥିଲା ଅଡୁଆ । କାରଣ ଉଭୟ ଝିଅ ଏବଂ ପୁଅ ଘର ଲୋକେ ମୃତଦେହ ନେବାକୁ ପଛଘୁଞ୍ଚା ଦେଇଥିଲେ । ଅମ୍ବାପାଲିରେ କେହି ଆତ୍ମୀୟ ନ ଥିବାରୁ ପଡ଼ୋଶୀ ମଧ୍ୟ ଅସହାୟତା ପ୍ରକାଶ କରିଥିଲେ । ମୃତଦେହ ସତ୍କାରକୁ ନେଇ ଅଡୁଆରେ ପଡ଼ିଥିବା ପୁଲିସ୍ ଶେଷରେ ଶ୍ମଶାନସାଥୀ ସଂଘମିତ୍ରା ପଟେଲଙ୍କ ସହାୟତା ଲୋଡ଼ିଥିଲା । ସଂଘମିତ୍ରା, ସହଯୋଗୀ ତରଣୀ ସାହୁ ପହଞ୍ଚି ମହିଳାଙ୍କ ମୃତଦେହକୁ ବରଗଡ଼ ସ୍ୱର୍ଗଦ୍ୱାରରେ ସମ୍ମାନର ସହ ଶେଷକୃତ୍ୟ କରିଥିଲେ ।
