ପ୍ରମୂଖ ଖବର

ପ୍ରସୂତିଙ୍କୁ ମିଳିଲା ନୂଆ ଜୀବନ: ୧୦ ମିନିଟ୍‌ ବନ୍ଦ ପରେ ଚାଲିଲା ହୃତ୍‌ପିଣ୍ଡ୍, ନବଜାତକ ସୁସ୍ଥ

Published By : Prameya | April 1, 2025 10:47 AM

ଜୟପୁର,୦୧/୦୪: ଜିଲ୍ଲା ହସ୍ପିଟାଲ୍‌ରେ ଘଟିଛି ଏକ ବିରଳ ଘଟଣା । ୧୦ ମିନିଟ୍‌ ବନ୍ଦ ହେବା ପରେ ହୃତ୍‌ପିଣ୍ଡ(ହାର୍ଟ)  ପୁଣି କାମ କରିଛି । ଡାକ୍ତର ଏବଂ କର୍ମଚାରୀଙ୍କ  ଟିମ୍‌ ୱାର୍କରୁ ମିଳିଛି ସଫଳତା । ସହରର ଜଣେ ପ୍ରସୂତି ପାଇଛନ୍ତି ନୂଆ ଜୀବନ । ନବଜାତକ(ପୁଅ) ସୁସ୍ଥ ଥିବା ବେଳେ ପ୍ରସୂତିଙ୍କୁ କୋରାପୁଟ ସହିଦ ଲକ୍ଷ୍ମଣ ନାୟକ ମେଡିକାଲ୍‌ କଲେଜ ଏବଂ ହସ୍ପିଟାଲ୍‌ରେ ଭର୍ତ୍ତି କରାଯାଇଛି ।ରାତି ୭ଟା ପର୍ଯ୍ୟନ୍ତ ତାଙ୍କୁ ଆଇସିୟୁରେ  ରଖାଯାଇଛି ।  

ସହରର ଜଣେ ମହିଳାଙ୍କ ଗର୍ଭଜନିତ ବେଦନା ଆରମ୍ଭ ହୋଇଥିଲା । ଏହାଥିଲା ମହିଳାଙ୍କ ଦ୍ୱିତୀୟ ଗର୍ଭଧାରଣ । ଗର୍ଭବତୀଙ୍କ  ଶରୀରରୁ ତରଳ ପଦାର୍ଥ କମିଯାଇଥିବା ବିଭିନ୍ନ ପରୀକ୍ଷା ପରେ ଜଣାପଡ଼ିଥିଲା ଅସ୍ତ୍ରୋପଚାର ନକଲେ ମହିଳା ଏବଂ ଗର୍ଭସ୍ଥ ଶିଶୁଙ୍କ ଅବସ୍ଥା ସଙ୍ଗିନ ହୋଇଯିବ । ପୂର୍ବାହ୍ଣରେ ଗର୍ଭବତୀଙ୍କୁ ଅପରେସନ୍‌ ଥିଏଟର(ଓଟି)କୁ ନିଆଯାଇଥିଲା । ଆନୁସଙ୍ଗିକ ବ୍ୟବସ୍ଥା ଗ୍ରହଣ ପରେ ସାଢ଼େ ୧୦ଟାରେ ଆରମ୍ଭ ହୋଇଥିଲା  ଅସ୍ତ୍ରୋପଚାର । ପ୍ରସୂତି ଓ ସ୍ତ୍ରୀ ରୋଗ ବିଶେଷଜ୍ଞ  ଡାକ୍ତର ସସ୍ମିତା ଦାସ, ନିଶ୍ଚେତକ ବିଶେଷଜ୍ଞ  ଡାକ୍ତର ଆଶିଷ ପାଣିଗ୍ରାହୀ, ଡାକ୍ତର ସୋନାଲି  ସାବତ ଏବଂ ଅନ୍ୟ କର୍ମଚାରୀମାନେ କାମରେ  ଲାଗିଥିଲେ । ସଫଳତାର ସହ ଜନ୍ମ ନେଇଥିଲା  ଶିଶୁ। ୫ ମିନିଟ୍‌ ପରେ ଓଟି ଟେବୁଲ୍‌ରେ  ଅସୁସ୍ଥ ହୋଇପଡ଼ିଥିଲେ ପ୍ରସୂତି । କୌଣସି  ପାଶ୍ୱର୍ ପ୍ରତିକ୍ରିୟା ଆଶଙ୍କାରେ ଡାକ୍ତରମାନେ  ପ୍ରତିଷେଧକ ବ୍ୟବସ୍ଥା ଗ୍ରହଣ କରିବାକୁ ପ୍ରସ୍ତୁତ  ହେଉଥିଲେ । ହଠାତ୍‌  ହୃତ୍‌ପିଣ୍ଡ କାମ କରିବା  ବନ୍ଦ(କାଡିଆକ୍‌ ଆରେଷ୍ଟ୍‌)  ହୋଇଯାଇଥିଲା। ସମସ୍ତଙ୍କ  ଚିନ୍ତା ବଢ଼ିଯାଇଥିଲା ।  ଆରମ୍ଭ ହୋଇଥିଲା ଜୀବନରକ୍ଷା ଅଭିଯାନ ।  ପ୍ରସୂତି ଓ ସ୍ତ୍ରୀ ରୋଗ ବିଶେଷଜ୍ଞ ଡାକ୍ତର  ଅରବିନ୍ଦ ନେପାକଙ୍କୁ ଡକାଯାଇଥିଲା ।  ସିଆର୍‌ଟି(କାର୍ଡିଆକ୍‌ ରିସିଙ୍କ୍ରୋନାଇଜେନସ୍‌  ଥେରାପି) ଚିକିତ୍ସା ପଦ୍ଧତି ଅବଲମ୍ବନ କରାଯାଇଥିଲା । ଡାକ୍ତର ଆଶିଷ ଭେଣ୍ଟିଲେଟ୍‌  କରିଥିବା ବେଳେ ଡାକ୍ତର ନେପାକ କାର୍ଡିଆକ୍‌ ମ୍ୟାସେଜ୍‌ ଉପରେ ଗୁରୁତ୍ୱ ଦେଇଥିଲେ ।  

ପ୍ରସୂତିଙ୍କ କଟାଯାଇଥିବା ସ୍ଥାନ ସିଲେଇ(ଷ୍ଟିଚିଂ) ରେ ଲାଗିଥିଲେ ଡାକ୍ତର ସସ୍ମିତା । ଡାକ୍ତର ସୋନାଲି ଏବଂ ଅନ୍ୟ କର୍ମଚାରୀ ସହଯୋଗ କରିଥିଲେ । ଜନ୍ମିତ ଶିଶୁକୁ ସୁରକ୍ଷିତ  ରଖାଯାଇଥିଲା । ଲଗାତାର ଉଦ୍ୟମ ଯୋଗୁ  ପ୍ରାୟ୧୦ ମିନିଟ୍‌ ପରେ ହୃତ୍‌ପିଣ୍ଡ ପୁଣି ଚାଲିବା  ଆରମ୍ଭ କରିଥିଲା । ଏହାର ପ୍ରାୟ ଘଣ୍ଟାଏ ପରେ ନିଶ୍ଚଳ ଶରୀରରେ ପ୍ରାଣ ସଂଚାର ହୋଇଥିଲା ।  ସମସ୍ତଙ୍କ ମୁହଁ ଉଜ୍ଜ୍ୱଳ ହୋଇଥିଲା । ଏ ଭିତରେ କୋରାପୁଟ ମେଡିକାଲ କଲେଜ  ସହ ଯୋଗାଯୋଗ କରାଯାଇ ଏକ ଆଇସିୟୁ  କୋଠରି ସଂରକ୍ଷିତ କରାଯାଇଥିଲା । ଅକ୍ସିଜେନ୍‌ ମାସ୍କ୍‌ ଲଗାଇ ଭେଣ୍ଟିଲେଟ୍‌ କରି  ଡାକ୍ତର ଆଶିଷ ପ୍ରସୂତିଙ୍କୁ ସ୍ୱତନ୍ତ୍ର ଆମ୍ବୁଲାନ୍ସକୁ  ଆଣିଥିଲେ । କୋରାପୁଟ ବଡ଼ ମେଡିକାଲ୍‌ରେ  ଚିକିତ୍ସା ପରେ ମହିଳାଙ୍କ ସ୍ୱାସ୍ଥ୍ୟାବସ୍ଥାରେ  ସାମାନ୍ୟ ସୁଧାର ଆସିଥିଲା । ତଥାପି ସେ  ସମ୍ପୂର୍ଣ୍ଣ ବିପଦମୁକ୍ତ ନ ଥିବା ଜଣାପଡ଼ିଛି ।   

ସୂଚନାଥାଉ କି, ଡିଏଚ୍‌ଏଚ୍‌ରେ କାର୍ଡିଆକ୍‌  ଆରେଷ୍ଟ୍‌ ଭଳି ଘଟଣା ଅନେକଥର ଘଟିଛି । ମାତ୍ର ୧ରୁ ୨ ମିନିଟ୍‌ ଉଦ୍ୟମ ପରେ ସଫଳତା ମିଳିଛି। ପ୍ରଥମ ଥର ଲାଗି କୌଣସି  ରୋଗୀଙ୍କ ହାର୍ଟ ୧୦ ମିନିଟ୍‌ ବନ୍ଦ ରହିଥିଲା ।

Prameya Is Now On WhatsApp Join And Get Latest News Updates Delivered To You Via WhatsApp

ରାଜନୀତି

ମନୋରଞ୍ଜନ

Copyright © 2024 - Summa Real Media Private Limited. All Rights Reserved.