କେନ୍ଦ୍ରାପଡ଼ା,୩୦ା୩ : ଘରେ ଭଉଣୀ ଭିଣୋଇଙ୍କ ପାଇଁ ଚିକେନ୍ ରୋଷେଇ କରି ସାରିଥିଲେ । ମା’ଙ୍କ ପାଇଁ ଘର ସାମ୍ନା ପୋଖରୀ କୂଳରେ ଥିବା ନିମ୍ବ ଗଛରୁ କଢ଼ ତୋଳିବାକୁ ଆସିଥିଲେ । ନିମ୍ବକଢ଼ ତୋଳି ନେଇଥିଲେ ଘରେ ରୋଷଇ କରି ଖିଆ ହୋଇଥା’ନ୍ତା । ଗଛରେ ଚଢ଼ି ନିମ୍ବ କଢ଼ ତୋଳୁଥିବା ବେଳେ ହଠାତ୍ ବାତ ମାରିଲା । ଖରାତାତି ସାଙ୍ଗକୁ ବାତ ମାରିବାରୁ ପୋଖରିକୁ ଖସିପଡ଼ିଥିଲେ । ଘରକୁ ଫେରିବାରେ ବିଳମ୍ବ ହେବାରୁ ପରିବାର ଲୋକେ ଖୋଜିବାକୁ ଆସିବାରୁ ପୋଖରୀରେ ଭାସୁଥିବା ଦେଖିଥିଲେ । ତୁରନ୍ତ ତାଙ୍କୁ ଉଦ୍ଧାର କରି କେନ୍ଦ୍ରାପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ପ୍ରାଥମିକ ଚିକିତ୍ସା ପରେ ଡାକ୍ତର ମୃତ ଘୋଷଣା କରିଥିଲେ । ଏଭଳି ଏକ ଅଭାବନୀୟ ଘଟଣା କେନ୍ଦ୍ରାପଡ଼ା ପୌରପାଳିକା ୧୨ ନଂ. ୱାର୍ଡ ହଜାରିବଗିଚାରେ ଦେଖିବାକୁ ମିଳିଛି ।
ହଜାରିବଗିଚା ଗ୍ରାମର ସ୍ୱର୍ଗତ ଜଗନ୍ନାଥ ରାଉତଙ୍କ ପୁଅ ରମାକାନ୍ତ ରାଉତ ଓରଫ ବଣ୍ଟି (୨୮ ବର୍ଷ) ରବିବାର ମଧ୍ୟାହ୍ନ ପ୍ରାୟ ସାଢ଼େ ୧୨ଟା ବେଳେ ଘର ସାମ୍ନା ପୋଖରୀ ହୁଡ଼ାରେ ଥିବା ନିମ୍ବଗଛରୁ କଢ଼ ଆଣିବାକୁ ଯାଇଥିଲେ । ସେତେବେଳକୁ ଖରା ତାତି ପ୍ରଖର ଥିଲା । ସେ ନିମ୍ବଗଛରେ ଚଢ଼ି କଢ଼ ସଂଗ୍ରହ କରୁଥିବାବେଳେ ତାଙ୍କୁ ବାତ ମାରିବାରୁ ସେ ଖସିପଡ଼ିଥିଲେ । ଏଣେ ପରିବାର ଲୋକ ଅପେକ୍ଷା କରି ବସିଛନ୍ତି ବଣ୍ଟି ନିମ୍ବକଢ଼ ନେଇ ଫେରିଲେ ଘରେ ରୋଷେଇ ହେବ । ବଣ୍ଟିଙ୍କ ଫେରିବାରେ ବହୁ ବିଳମ୍ବ ହେବାରୁ ପରିବାର ଲୋକେ ଖୋଜାଖୋଜି କରିବାରୁ ପୋଖରୀରୁ ଉଦ୍ଧାର କରିଥିଲେ । ଜଗନ୍ନାଥଙ୍କର ୩ ଝିଅଙ୍କ ମଧ୍ୟରେ ବଣ୍ଟି ଥିଲେ ଏକମାତ୍ର ପୁଅ । ବାପାଙ୍କ ମୃତ୍ୟୁ ହୋଇ ସାରିଥିବାବେଳେ ଘରେ ମା’ଙ୍କ ସହ ରହୁଥିଲେ । ତାଙ୍କର ବାହାଘର ପାଇଁ ବି ବୁଝାଶୁଝା ଚାଲିଥିଲା । ବଣ୍ଟିଙ୍କର ଅକାଳ ବିୟୋଗରେ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ଛାଇଯାଇଛି । ଅଭିଯୋଗ ପାଇ ଟାଉନ୍ ପୁଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଛି ।
