ଖଲ୍ଲିକୋଟ - ପୋଖରୀକୁ ଗାଧୋଇବାକୁ ଯାଇ ଯୁବକ ନିଖୋଜ। ପୋଖରୀ ପାଣି ଭିତରେ ଦେଢ଼ ଘଣ୍ଟା ଧରି ଖୋଜାଖୋଜି କରିବା ପରେ କୌଣସି ପତ୍ତା ନମିଳିବାରୁ ନିରାଶ ହୋଇ ଫେରିଲେ ଦମକଳ କର୍ମଚାରୀ। ଏଭଳି ଏକ ଘଟଣା ଘଟିଛି ଖଲ୍ଲିକୋଟ ଥାନା ଅନ୍ତର୍ଗତ ଭରସା ଗ୍ରାମରେ।
ମିଳିଥିବା ସୂଚନା ଅନୁସାରେ, ଭରସା ଗ୍ରାମର ପ୍ରଭାତ ଓରଫ ସିଲୁ ମହାନ୍ତି। ବୟସ ପ୍ରାୟ ୨୮ ବର୍ଷ ହେବ। ଆଜି ଅପରାହ୍ନ ୪ଟାରେ ଗ୍ରାମର ମଶାଣି ବନ୍ଧକୁ ଗାଧୋଇବାକୁ ଯାଇଥିବା କିଛି ଲୋକ ଦେଖି ଥିଲେ। ତେବେ ଦୀର୍ଘ ସମୟ ଧରି ନଫେରିବାରୁ ଲୋକଙ୍କ ମନରେ ସନ୍ଦେହ ହୋଇଥିଲା। ଏ ସମ୍ପର୍କରେ ସେମାନେ ଦମକଳ କେନ୍ଦ୍ରକୁ ଖବର ଦେଇ ଥିଲେ। ଖଲ୍ଲିକୋଟ ଅଗ୍ନିଶମ ବାହିନୀର କର୍ମଚାରୀମାନେ ପହଞ୍ଚି ପୋଖରୀ ଭିତରେ ସନ୍ଧ୍ୟା ୬ଟା ପର୍ଯ୍ୟନ୍ତ ଖୋଜାଖୋଜି କରି ଥିଲେ ମଧ୍ୟ କୌଣସି ପତ୍ତା ମିଳି ନଥିଲା।
ଏହି ସମୟରେ ସେଠାରେ ଖଲ୍ଲିକୋଟ ପୁଲିସ ମଧ୍ୟ ପହଞ୍ଚି ତଦନ୍ତ ଆରମ୍ଭ କରିଥିଲେ। ପୋଖରୀର ପାହାଚ ଉପରେ ସିଲୁର ପ୍ୟାଣ୍ଟ, ସାର୍ଟ, ଚପଲ, ମୋବାଇଲ ଫୋନ, ବ୍ଲୁ ଟୁଥ ପ୍ରଭୃତି ରଖା ଯାଇଥିବା ଦେଖିବାକୁ ମିଳିଛି। ତେବେ କୁଆଡେ ଗଲେ ସିଲୁ ବୋଲି ଗ୍ରାମରେ ଆଲୋଚନା ହେଉଛି।
