ବ୍ରହ୍ମପୁର,୧/୪ : ଗଞ୍ଜାମ ଜିଲ୍ଲାର ପାରମ୍ପରିକ ପ୍ରସିଦ୍ଧ ଦଣ୍ଡ ଯାତ୍ରା ପାଇଁ ଉତ୍ସବ ମୁଖର ହୋଇଉଠିଛି ଗାଁ ଠୁ ସହର। ନାଚ ଗୀତ ପୂଜା ପାଠରେ ପ୍ରକମ୍ପିତ ହେଉଛି ପରିବେଶ। ହେଲେ ଏହାରି ଭିତରେ କେତେବେଳେ କେଉଁଠି ଅଶ୍ଳୀଳତାର ଛାପ ଦେଖିବାକୁ ମିଳିଛି ତ ଆଉ କେତେବେଳେ କେଉଁଠି ରକ୍ତର ଛିଟା । ଏ ନେଇ ଦଣ୍ଡ ନାଚରେ ଲଗାମ ଲଗାଇବାକୁ ପୋଲିସ ଉଦ୍ୟମ ଆରମ୍ଭ କରିଛି ।
ଦଣ୍ଡ ନାଚ କମିଟିକୁ ଏଥିପାଇଁ ପୋଲିସ ପରାମର୍ଶ ନେଇଛି । ଯେଉଁଥିରେ କୁହାଯାଇଛି ଦଣ୍ଡ ନାଚ ସମୟରେ ସୁପ୍ରିମକୋର୍ଟ ଗାଇଡଲାଇନକୁ ଅନୁକରଣ କରାଯାଉ । ନ ହେଲେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ । ପରମ୍ପରା ନାଁରେ ଅପ ସଂସ୍କୃତିକୁ ପ୍ରଶୟ ଦିଆଯିବ ନାହିଁ ବୋଲି ଚରମ ବାଣୀ ଶୁଣାଇଛି ବ୍ରହ୍ମପୁର ପୋଲିସ।
ଏ ନେଇ ବ୍ରହ୍ମପୁର ଏସପି କହିଛନ୍ତି, ଦଣ୍ଡ ନାଚ ସମୟରେ ଯେଉଁଭଳି ଭାବେ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହେଉଛି ଏହାକୁ ନେଇ ପୋଲିସ ଏବେ କଡ଼ା ଆଭିମୁଖ୍ୟ ଗ୍ରହଣ କରିଛି । ଏଥିପାଇଁ ସୁପ୍ରିମକୋର୍ଟ ଗାଇଡଲାଇନକୁ ଅନୁକରଣ କରି ନାଚ କରିବାକୁ ଦଣ୍ଡ ନାଚ କମିଟିକୁ ପରାମର୍ଶ ଦେଇଛି ପୋଲିସ । ଏହାର ବ୍ୟତିକ୍ରମ ହେଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ସୂଚନାଯୋଗ୍ୟ, ଦଣ୍ଡନାଚ ପାଇଁ ମାନସିକଧାରୀ ଦଣ୍ଡୁଆମାନେ ବିଭିନ୍ନ ଦଣ୍ଡ ପ୍ରଦର୍ଶନ କରୁଥିବା ବେଳେ ରାତିରେ ଅନିଦ୍ରା ରହିବା ବିଧି ରହିଛି । ଅନିଦ୍ରା ସମୟକୁ ଅତିବାହିତ କରିବା ପାଇଁ ବିଭିନ୍ନ ପୌରାଣିକ କଥାବସ୍ତୁକୁ ନାଚ ମାଧ୍ୟମରେ ପ୍ରଦର୍ଶନ କରିବା ପରମ୍ପରା ରହିଛି । ହେଲେ ଏହି ପରମ୍ପରାର ବ୍ୟତିକ୍ରମ ଘଟିଥିବା ଦେଖିବାକୁ ମିଳିଛି । ସାମାଜିକ ନାଟକ, ରେକର୍ଡ ଡ୍ୟାନ୍ସ, ଆଧୁନିକ ନାଚ ଗୀତ ମଧ୍ୟରେ ଅଶ୍ଲୀଳତା ଛାପ ଦେଖିବାକୁ ମିଳିଥିବା ନଜିର ରହିଛି । ଗତ ୨୭ ତାରିଖରେ ଗାନ୍ଧିନଗର ଅଞ୍ଚଳରେ ରାତିରେ ନାଚରେ ଅଶ୍ଳୀଳତା ପ୍ରଦର୍ଶନ କରିବାବେଳେ ଗଣ୍ଡଗୋଳ ପରିସ୍ଥିତି ସୃଷ୍ଟି ହୋଇଥିଲା। ପୁଣି ୩୦ ତାରିଖରେ ମଧ୍ୟ ଜେନା ସାହିରେ ହତ୍ୟାକାଣ୍ଡ ଘଟିଥିଲା ।
