ଭଦ୍ରକ,୨୭ା୩(ଆ.ପ୍ର): ଆଉ ଦିନ କେଇଟା ପରେ ସରିବ ପବିତ୍ର ରମଜାନ ମାସ । ଦାନ, ଧର୍ମ ଓ ପୁଣ୍ୟର ପର୍ବ ଏହି ରମଜାନ । ଏକ ମାସ ଧରି ଉପବାସ ପରେ ଜହ୍ନ ଦେଖି ମୁସଲିମ ଧର୍ମାଲମ୍ବୀ ଭକ୍ତମାନେ ଫିଟାଇବେ ରୋଜା । ରୋଜା ପରେ ଇଦ୍ ପର୍ବ ପାଳିତ ହେବ । ସାମୁହିକ ନମାଜ ପାଠ କରାଯିବ । ଏଥିପାଇଁ ସହରର ସମସ୍ତ ମସଜିଦରେ ପ୍ରସ୍ତୁତି ଜୋରଦାର ଆରମ୍ଭ ହୋଇଛି । ନୂଆ ରୂପରେ ମସଜିଦ ସଜେଇ ହୋଇଛି । ଇଦ ପର୍ବ ପାଳନ ନେଇ ସହର ଉତ୍ସବ ମୁଖର ହୋଇଛି । କପଡ଼ା ଦୋକାନରେ ଅସମ୍ଭାଳ ଭିଡ଼ ଦେଖିବାକୁ ମିଳିଛି ।
ଏହି ପର୍ବକୁ ଶାନ୍ତି ଶୃଙ୍ଖଳା ସହ ପାଳନ ନେଇ ଜିଲ୍ଲା ପ୍ରଶାସନ ପକ୍ଷରୁ ଶାନ୍ତି କମିଟି ବସିଛି । ଏବେ ଆଇନ ଶୃଙ୍ଖଳା ନେଇ ଉପଲକ୍ଷେ ପୁଲିସ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ଭାଇଚାରାର ପର୍ବ ଇଦ୍ ପାଇଁ ଏଥର ୨୦ ପ୍ଲାଟୁନ ଫୋର୍ସ ଜଗିବେ । ପୁରୁଣା ବଜାର ଓ ଟାଉନ ଥାନା ଅଧୀନରେ ବ୍ୟାପକ ପୁଲିସ ମୁତୟନ ହେବେ । ସିସି କ୍ୟାମେରା ସହିତ ଅସ୍ଥାୟୀ ପୁଲିସ ପୋଷ୍ଟ ହେବ ବୋଲି ସୂଚନା ମିଳିଛି । ସେହିଭଳି ସିଆରପିଏଫ, ବିଏସଏଫ ଓ ଆରଏଏଫର ଗୋଟିଏ ଲେଖାଏଁ ସେକସନ୍ ମୁତୟନ ହେବେ । ୨ଦିନ ଭିତରେ ଏମାନେ ଆସି ପହଞ୍ଚିବେ ବୋଲି ଜଣାପଡ଼ ିଛି । ସମ୍ବେଦନଶୀଳ ଅଞ୍ଚଳରେ ଡ୍ରୋନ କ୍ୟାମେରା ଚକ୍କର ମାରିବା ନେଇ ନିଷ୍ପତ୍ତି ହୋଇଛି । ମୋବାଇଲ ଭ୍ୟାନ ସହ ସାଧା ପୋଷାକଧାରୀ ପୁଲିସ ବିଭିନ୍ନ ସ୍ଥାନରେ ମୁତୟନ ନେଇ ନିଷ୍ପତ୍ତି ହୋଇଛି ।
