ନୂଆଦିଲ୍ଲୀ,୦୯/୧୦: ମହଙ୍ଗା ଇଏମ୍ଆଇରୁ କୌଣସି ଆସ୍ବସ୍ଥି ନାହିଁ। ଭାରତର ରିଜର୍ଭ ବ୍ୟାଙ୍କ ଏହାର ନୀତିଗତ ହାରକୁ ୬.୫୦ ପ୍ରତିଶତରେ ରଖିଛି। ଆରବିଆଇ ମୁଦ୍ରା ନୀତି କମିଟିର ବୈଠକରେ ନିଆଯାଇଥିବା ନିଷ୍ପତ୍ତି ଅନୁଯାୟୀ ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ଏହି ଘୋଷଣା କରିଛନ୍ତି। ଆରବିଆଇ ଗଭର୍ଣ୍ଣର କହିଛନ୍ତି ଯେ, ମୁଦ୍ରା ନୀତି କମିଟିର ୬ ଜଣ ସଦସ୍ୟଙ୍କ ମଧ୍ୟରୁ ୫ ଜଣ ସଦସ୍ୟ ରେପୋ ହାର ହ୍ରାସ ନକରିବାକୁ ମତ ଦେଇଛନ୍ତି। ଜୁଲାଇ ଏବଂ ଅଗଷ୍ଟ ମାସରେ ଖୁଚୁରା ମୁଦ୍ରାସ୍ଫୀତି ଆର୍ବିଆଇର ଟଲରେନ୍ସ ବ୍ୟାଣ୍ଡର ୪ ପ୍ରତିଶତ ତଳେ ରହିଥିବା ସତ୍ତ୍ବେ ରେପୋ ରେଟ୍ରେ କୌଣସି ପରିବର୍ତ୍ତନ କରାଯାଇନାହାଁନ୍ତି।
ଆର୍ବିଆଇ ଗଭର୍ଣ୍ଣର ତାଙ୍କ ଅଭିଭାଷଣରେ କହିଛନ୍ତି ଯେ ମୁଦ୍ରାସ୍ଫୀତି ପାଇଁ ସର୍ବଭାରତୀୟ ସ୍ତରରେ ଉତ୍ତେଜନା ଦେଖାଦେଇଛି। ସାମ୍ପ୍ରତିକ ସମୟରେ ବସ୍ତୁ ଏବଂ ଖାଦ୍ୟ ମୂଲ୍ୟରେ ବୃଦ୍ଧି ହେତୁ ଖୁଚୁରା ମୁଦ୍ରାସ୍ଫୀତି ପାଇଁ ବିପଦ ରହିଛି। ସେ କହିଛନ୍ତି, ଜୁଲାଇ ଏବଂ ଅଗଷ୍ଟରେ ମୂଳ ମୁଦ୍ରାସ୍ଫୀତି ବୃଦ୍ଧି ପାଇଛି ଏବଂ ମୂଳ ପ୍ରଭାବ ହେତୁ ଖୁଚୁରା ମୁଦ୍ରାସ୍ଫୀତି ହାରରେ ତୀବ୍ର ବୃଦ୍ଧି ହେବାର ସମ୍ଭାବନା ରହିଛି। ୨୦୨୪-୨୫ ପାଇଁ ଖୁଚୁରା ମୁଦ୍ରାସ୍ଫୀତି ହାର ୪.୫ ପ୍ରତିଶତ ହେବ ବୋଲି ଆରବିଆଇ ଗଭର୍ଣ୍ଣର ପୂର୍ବାନୁମାନ କରିଛନ୍ତି। ଚଳିତ ଆର୍ଥିକ ବର୍ଷର ଦ୍ୱିତୀୟ ତ୍ରୈମାସରେ ମୁଦ୍ରାସ୍ଫୀତି ୪.୧ ପ୍ରତିଶତ, ତୃତୀୟ ତ୍ରୈମାସରେ ୪.୮ ପ୍ରତିଶତ ଏବଂ ଚତୁର୍ଥ ତ୍ରୈମାସରେ ୪.୨ ପ୍ରତିଶତ ହେବ ବୋଲି ଆଶା କରାଯାଉଛି।
ବ୍ୟାଙ୍କିଙ୍ଗ ସମ୍ବନ୍ଧୀୟ ବିଶେଷଜ୍ଞ ତଥା ଭଏସ୍ ଅଫ୍ ବ୍ୟାଙ୍କିଙ୍ଗର ପ୍ରତିଷ୍ଠାତା ଅଶ୍ୱିନୀ ରାଣା କହିଛନ୍ତି ଯେ 'ରେପୋ ରେଟ୍ରେ କୌଣସି ପରିବର୍ତ୍ତନ ହୋଇନାହିଁ, ରିଜର୍ଭ ବ୍ୟାଙ୍କ ୨୦୨୪ରେ କ୍ରମାଗତ ପଞ୍ଚମ ଥର ପାଇଁ ରେପୋ ରେଟ୍ରେ କୌଣସି ପରିବର୍ତ୍ତନ କରିନାହିଁ। ମୁଦ୍ରାସ୍ଫୀତି ହାରକୁ ନିୟନ୍ତ୍ରଣରେ ରଖିବା ପାଇଁ ରିଜର୍ଭ ବ୍ୟାଙ୍କର ଉଦ୍ୟମ ଜାରି ରହିଛି, କିନ୍ତୁ ରିଜର୍ଭ ବ୍ୟାଙ୍କ ଅନୁଯାୟୀ ଖାଦ୍ୟ ମୁଦ୍ରାସ୍ଫୀତି ଲକ୍ଷ୍ୟଠାରୁ ଅଧିକ ରହିଛି। ତେଣୁ ରେପୋ ରେଟକୁ ୬.୫୦ ପ୍ରତିଶତରେ ରଖିବାକୁ ନିଷ୍ପତ୍ତି ନିଆଯାଇଛି। ସେ କହିଛନ୍ତି, ରେପୋ ରେଟ୍ ହ୍ରାସ ପାଇଁ ଅପେକ୍ଷା କରିଥିବା ବ୍ୟାଙ୍କ ଗ୍ରାହକମାନେ ଆରବିଆଇର ଏହି ନିଷ୍ପତ୍ତିରେ ନିରାଶ ହୋଇଛନ୍ତି। ଫେଡେରାଲ ରିଜର୍ଭର ସୁଧ ହାର ହ୍ରାସ ହେବା ପରେ ଅନୁଭବ ହେଲା ଯେ ରିଜର୍ଭ ବ୍ୟାଙ୍କ ମଧ୍ୟ ରେପୋ ରେଟ୍ରେ ପରିବର୍ତ୍ତନ ଆଣିବ ଏବଂ ପାର୍ବଣ ପୂର୍ବରୁ ମହଙ୍ଗା ଇଏମ୍ଆଇ ଦେଉଥିବା ଲୋକଙ୍କୁ ଏକ ଆଶ୍ବସ୍ତିକର ଖବର ଦେବ କିନ୍ତୁ ଏହା ହୋଇପାରିନାହିଁ।
