ପୁରୀ,୧୫/୦୬: ସ୍ନାନପୂର୍ଣ୍ଣିମାକୁ ଚାହିଁ ଚାଲିଛି ରଥ ନିର୍ମାଣ । ଶୁକ୍ରବାର ରଥର ସଂଯୁକ୍ତ ଚକ ଓ ଅଖ ଥୟ ହୋଇଛି ।ରଥ ନିର୍ମାଣ ସ୍ଥାନରୁ ସିଂହଦ୍ୱାର ସମ୍ମୁଖ ରଥ ରହଣି ସ୍ଥାନ ଆକଳନ କରିଛନ୍ତି ନିର୍ମାଣକାରୀ । ଦାଣ୍ଡି କାଠ ପୋତା ହୋଇ ଦିଗନିର୍ଣ୍ଣୟ ପରେ ରଥ ସ୍ଥାନ ନିରୁପଣ ହେଲା। ଚକ ଗଡ଼ି ନଯିବା ପାଇଁ ଚକର ଉଭୟ ପାଶ୍ୱର୍ରେ ବନ୍ଧ ଲାଗିଛି । ସେହିଭଳି ଅଖ ତଳେ ଦିଆଯାଇଛି ମେଣ୍ଢି । ଆମ୍ବ ଗଛର ଡ଼ାଳ ହୋଇଛି ବନ୍ଧ । ମେଣ୍ଢି ହେଉଛି ଅସନ ଓ ଧଉରା କାଠ ଗଡ଼ । ଅଖ ଉପରେ ରହିବ ରଥର ଭାରା । ନିର୍ମାଣକାରୀ ରଥକୁ ଚଢିବେ । ମେଣ୍ଢି ଢେରା ଦିଆଯିବାରେ ଅଖରେ ଚାପ ଓ ଭାରା କମିବ । ରଥ ନିର୍ମାଣ ଶେଷରେ ମେଣ୍ଢି ଓ ବନ୍ଧ ହଟିବ । ଏପଟେ ବଡ଼ଦାଣ୍ଡରେ ତିନି ରଥର ଦଣ୍ଡା ଫ୍ରେମ୍ ପ୍ରସ୍ତୁତ ପରେ ମାପଚୁପ ହୋଇ କଳସା ଶେଷ ହୋଇ ନମ୍ବରିଂ ହୋଇଛି । ଗୁଜଗୁଡ଼ିକ ଦଣ୍ଡାରେ ଠିକ୍ରେ ଫିଟିଂ ହେବ । ବଳକା ଅଂଶକୁ କାଟି ସାଇଜ୍ କରୁଛନ୍ତି ତିନି ରଥର ବିଶ୍ୱକର୍ମା । କଳସା ପରେ ନିରାଡ଼ିକୁ ଗୁଜ ପୁରା ଫିଟିଂ ହୋଇଛି । ଆଜି ଦଣ୍ଡା କଳସା କାର୍ଯ୍ୟ ସମ୍ପନ୍ନ ହୋଇଛି ।
ଶନିବାର ଦଣ୍ଡା ଫ୍ରେମ୍ ଅଖକୁ ଉଠିବ ବୋଲି ସୂଚନା ରହିଛି । ରଥ ଖଳାରେ ଆରମ୍ଭ ହୋଇଛି ଚଉଦନାହାକା କାମ । ବାରିସିରେ ହାଣି ପ୍ରତି ରଥ ପାଇଁ ଚଉଦଟି ଲେଖା କାଠକୁ ପ୍ରସ୍ତୁତ କରୁଛନ୍ତି ବିଶ୍ୱକର୍ମା । ଆଗକୁ ଅଖ ଉପରେ ଦଣ୍ଡା ରହିବ । ଦଣ୍ଡା ଉପରେ ଖଦିଓରା ପଡ଼ିବ । ଦଣ୍ଡା ଉପରେ ଗରଗରା ରହିଲେ ଚାରି ନାହାକା ଉଠିବ । ଚଉଦନାହାକାର ସାଲ ସବୁକୁ ଖଦିଓରାର ବିନ୍ଧରେ ସ୍ଥାପନ କରାଯିବ । ଚାରିନାହାକା ଓ ଛଅ କାଠକୁ ଦୃଷ୍ଟିଦେଇ ଚଉଦନାହାକା ବୁଲିବ । ରଥରେ ଚଉଦନାହାକା ବୁଲିଲେ ପ୍ରଥମ ଭୂଇଁ ଟୁଙ୍ଗୁରା ହେବ । ଏପଟେ ରଥ ଖଳାରେ ଗୟଳ ହାଣୁଛନ୍ତି ବିଶ୍ୱକର୍ମା । ଚାରିନାହାକା ହଣା ହୋଇ ସାଲ ସରିଛି । ଅସ୍ଥାୟୀ ରଥ ଚାଳିରେ ଗୟଳ ହଣା ଚାଲିଛି। ରୂପକାର, କରତି ଓ ଓଝା ସେବକମାନେ ଠାକୁରଙ୍କ ରଥ ନିର୍ମାଣ ଜାରି ରଖିଛନ୍ତି ।