ବାଲିଆପାଳ,୨୯/୩: ଘାସ ଚାଷ ଦେଇଛି ଆତ୍ମ ନିଯୁକ୍ତି ଓ ରୋଜଗାର । ଘାସ ଚାଷ ଯୋଗୁଁ ଉମାକାନ୍ତ ବିଶ୍ୱାଳଙ୍କୁ ଗୋ ପାଳନର ନୂଆ ଦିଶା ମିଳିଛି । ପରିବାର ପ୍ରତିପୋଷଣ ସାଙ୍ଗକୁ ଗାଁ ଲୋକମାନେ ଉମାକାନ୍ତଙ୍କ ଦ୍ୱାରା ପ୍ରଭାବିତ ହୋଇ ଘାସ ଚାଷ ଆରମ୍ଭ କରିଛନ୍ତି । ପୂର୍ବରୁ ଆନ୍ଦ୍ର, ପଶ୍ଚିମବଙ୍ଗ, ଝାଡ଼ଖଣ୍ଡ, ୟୁପି, ଛତିଶଗଡ଼ ଆଦି ରାଜ୍ୟର ଚାଷୀମାନେ ଘାସ ଚାଷ କରି ଆସୁଥିବା ବେଳେ ଏବେ ବାଲିଆପାଳ ବ୍ଲକ ଦେଉଳା ପଞ୍ଚାୟତ ବାସୁଦେବପୁର ଗାଁର ଉମାକାନ୍ତ ଓ ତାଙ୍କ ସହଯୋଗୀ ଚାଷୀମାନେ ଘାସ ଚାଷ କରି ଲାଭବାନ ହେଉଛନ୍ତି । ବାଜରାର ସୁପର ଭେରାଇଟି ଘାସ ହେଉଛି ନେପିଆର ଘାସ । ନେପିଆର ଘାସ ସାଧାରଣତଃ ୯ ଡିଗ୍ରୀ ତାପମାତ୍ରାରେ ଚାଷ କରାଯାଇ ପାରିବ । ଏହା ଉଭୟେ ଢିପ ଓ ଗହୀର କିସମ ଜମିରେ ଚାଷ ହୋଇପାରିବ । ଏକ ଏକର ଜମିରୁ ୩ ଶହରୁ ୪ଶହ କ୍ୱିଣ୍ଟାଲ ପର୍ଯ୍ୟନ୍ତ ଘାସ ଅମଳ କରାଯାଉଛି ।
ବର୍ଷର ସବୁ ସମୟରେ ଏହି ଚାଷ କରାଯାଉଥିଲେ ବି, ମୁଖ୍ୟତଃ ଫେବ୍ରୁଆରୀରୁ ମାର୍ଚ୍ଚ ମାସ ମଧ୍ୟରେ ଅଧିକ ପରିମାଣରେ ଚାଷ ହୋଇଥାଏ । ଚାଷର ୪୫ ଦିନ ପରେ ଅମଳ ଆରମ୍ଭ ହୁଏ । ପ୍ରାୟେ ୮ରୁ ୧୦ ବର୍ଷ ପର୍ଯ୍ୟନ୍ତ ଏହା ଅମଳ ହୋଇ ଚାଲେ । ସାଧାରଣ ଘାସରୁ ୪ରୁ ୫ ପ୍ରତିଶତ ପ୍ରୋଟିନ ମିଳୁଥିବା ବେଳେ ନେପିଆର ଘାସରୁ ୧୬ରୁ ୧୮ ପ୍ରତିଶତ ପ୍ରୋଟିନ ମିଳିଥାଏ । ଏହି ଘାସ ଖାଇ ଗୋଟିଏ ଗାଈର କ୍ଷୀର ଦେବା ପରିମାଣ ୨ରୁ ୩ ଗୁଣ ପର୍ଯ୍ୟନ୍ତ ବୃଦ୍ଧି ପାଇଥାଏ । ଏହି ଘାସ ଚାଷ ପାଇଁ ଜମିରେ ପାଣି ଓ ଉର୍ବରତା କମ୍ ଦେବାକୁ ପଡ଼େ । ଏହି ଘାସକୁ ଉପଯୋଗ କରି ବୈଜ୍ଞାନିକ ପଦ୍ଧତିରେ ବାୟୁ ଅଏଲ, ବାୟୁ ସିଏନଜି ଗ୍ୟାସ୍ ମଧ୍ୟ ପ୍ରସ୍ତୁତ କରାଯାଇ ପାରିବ । ଉମାକାନ୍ତ ଓ ତାଙ୍କର ସହଯୋଗୀମାନେ ମିରଟ୍ରୁ ଅନ୍ଲାଇନରେ ଘାସ ମଞ୍ଜି ମଗାଇ ଏବେ ଘାସ ଚାଷ କରୁଛନ୍ତି । ଏଥିରୁ ସେମାନେ ମାସକୁ ପାଖାପାଖି ୫୦ ହଜାର ଟଙ୍କା ରୋଜଗାର କରି ପାରୁଛନ୍ତି । ତାହାଛଡ଼ା ଗୋ ପାଳନ କରି ଅଧିକ ୨୦ରୁ ୨୫ହଜାର ପର୍ଯ୍ୟନ୍ତ ଅଧିକ ରୋଜଗାର କରି ପାରୁଛନ୍ତି । ଅମଳ ଘାସକୁ ସେମାନେ ଗୋ ପାଳନ କରୁଥିବା ସ୍ଥାନୀୟ ଅଞ୍ଚଳର ଚାଷୀମାନଙ୍କୁ ବିକ୍ରି କରୁଛନ୍ତି । ସରକାର ଚାଷୀଙ୍କୁ ସହାୟତା ଦେବା ସହିତ ବିକ୍ରିବଟାର ସୁବିଧା ସୁଯୋଗ ସୃଷ୍ଟି କଲେ, ଚାଷୀମାନେ ଅଧିକ ଉତ୍ସାହିତ ହୁଅନ୍ତେ ବୋଲି ଅଗ୍ରଣୀ ଚାଷୀ ରାଜୁ ମୁଖୀ, ଶରତ ଚନ୍ଦ୍ର ପ୍ରଧାନ, ଅନନ୍ତ କୁମାର ରାଉତ, ସଦାନନ୍ଦ ବେହେରା, ବୈରାଗୀ କୁମାର ବାରିକ, ବସନ୍ତ କୁମାର ନନ୍ଦୀ ପ୍ରମୁଖ କହିଛନ୍ତି ।
