ବାଲେଶ୍ୱର,୩୦/୩ : ବାଲେଶ୍ୱର ଭଦ୍ରକ କେନ୍ଦ୍ର ସମବାୟ ବ୍ୟାଙ୍କ (ବିବିସିସି) ଜମାକାରୀଙ୍କ ଆକାଉଣ୍ଟ୍ରୁ ଅର୍ଥ ଆତ୍ମସାତ ଅଭିଯୋଗରେ ଜଣେ ଆକଉଣ୍ଟାଣ୍ଟଙ୍କୁ ଗିରଫ କରିଛି ଭିଜିଲାନ୍ସ । ଗିରଫ ଅଭିଯୁକ୍ତ ହେଲେ ବାଲିଆପାଳ ଶାଖା ଅଧୀନସ୍ଥ ଲଙ୍ଗଳେଶ୍ୱରସ୍ଥିତ ବଣିଆଡିହା ସୋସାଇଟିରେ ସତ୍ୟଅଞ୍ଜନ ଦେ । ସତ୍ୟଅଞ୍ଜନ ଦୀର୍ଘ ୯ ବର୍ଷ ଧରି ଜାଲ୍ ଦସ୍ତଖତ ଜରିଆରେ ପ୍ରାୟ ୨୨ ଲକ୍ଷ ଟଙ୍କା ଚଳୁ କରିଥିବା ଜଣାପଡ଼ିଛି । ବଣିଆଡିହା ସୋସାଇଟିରେ ସତ୍ୟଅଞ୍ଜନ ଦୀର୍ଘ ଦିନ ଧରି ଆକାଉଣ୍ଟାଣ୍ଟ କାର୍ଯ୍ୟ କରୁଥିଲେ । ସମ୍ପୃକ୍ତ ସୋସାଇଟିର ଜମାକାରୀଙ୍କ ଆକାଉଣ୍ଟରୁ ସରକାରୀ ଅନୁଦାନ ଅର୍ଥକୁ ସେ ଜାଲ୍ ଦସ୍ତଖତ ଜରିଆରେ ଉଠାଇ ନେଉଥିଲେ । ସେହି ବାବଦରେ ଜାଲ ଉଠାଣ ରସିଦ୍ ବ୍ୟାଙ୍କ୍ରେ ଜମା କରୁଥିଲେ ।
୨୦୧୪ରୁ ୨୦୨୩ ପର୍ଯ୍ୟନ୍ତ ଦୀର୍ଘ ୯ ବର୍ଷ ଯାଏ ଏହି ଭଳି ଜାଲ୍ କାର୍ଯ୍ୟ ମାଧ୍ୟମରେ ସେ ୨୨ ଲକ୍ଷ ୧୮ ହଜାର ୬ଶହ ଟଙ୍କା ଚଳୁ କରିଥିବା ଅଭିଯୋଗ ହୋଇଥିଲା । ଏହାକୁ ନେଇ ଭିଜିଲାନ୍ସ ବିଭାଗ ପକ୍ଷରୁ ଖୋଳତାଡ଼ ପରେ ସତ୍ୟଅଞ୍ଜନଙ୍କୁ ଗିରଫ କରାଯାଇଛି । ଏ ସମ୍ପର୍କରେ ଦୁର୍ନୀତି ନିବାରଣ (ସଂଶୋଧିତ) ଆଇନ ୨୦୧୮ ଅନୁସାରେ ବାଲେଶ୍ୱର ଭିଜିଲାନ୍ସ ଥାନା ନଂ୩/୨୦୨୫ ମାମଲା ରୁଜୁ କରାଯାଇଛି । ଅଭିଯୁକ୍ତ ସତ୍ୟଅଞ୍ଜନଙ୍କୁ ବିଭାଗ ପକ୍ଷରୁ କୋର୍ଟ ଚାଲାଣ କରାଯାଇଥିବା ବେଳେ ମାମଲାର ଅଧିକ ତଦନ୍ତ ଜାରି ରହିଥିବା ବିଭାଗ ପକ୍ଷରୁ ସୂଚନା ଦିଆଯାଇଛି ।
