ତିହିଡ଼ି, ୩୦/୩: ଥରକୁ ଥର ଦାବି କରୁଛନ୍ତି ବରୁଣେଇବାସୀ । ଗୁପ୍ତଗଙ୍ଗା ପୀଠର ବିକାଶ କରିବା ସହ ନନ୍ଦପୁରରୁ ଭାୟା ଗୁପ୍ତଗଙ୍ଗା ଦେଇ ବରୁଣେଇ ଯାଏ ରାସ୍ତାର ପୁନରୁଦ୍ଧାର କରାଯାଉ । ମାତ୍ର କେହି ଶୁଣିବାକୁ ନାରାଜ । ନିର୍ବାଚନ ପୂର୍ବରୁ ଯେଉଁମାନେ ପ୍ରତିଶ୍ରୁତି ଦେଇଥିଲେ ତାହା ବି ସେମାନେ ଭୁଲିଗଲେଣି । ତିହିଡ଼ି ବ୍ଲକର ଅନ୍ୟତମ ପ୍ରାଚୀନ ପର୍ଯ୍ୟଟନ କ୍ଷେତ୍ର ଗୁପ୍ତଗଙ୍ଗା ପୀଠ ଆଜି ପର୍ଯ୍ୟନ୍ତ ଅବହେଳିତ ଅବସ୍ଥାରେ ଛାଡ଼ି ଦିଆଯାଇଛି । ଏହି ପୀଠକୁ ସଂଯୋଗ କରୁଥିବା ରାସ୍ତା ଅବସ୍ଥା ନକହିବା ଭଲ । ଭଦ୍ରକ-ଚାନ୍ଦବାଲି ରାଜ୍ୟ ରାଜପଥଠାରୁ ନନ୍ଦପୁର ବଜାର ଦେଇ ଉତ୍ତରବାହା ଗ୍ରାମ ଭିତରେ ପ୍ରବେଶ କରି ଏହି ପୀଠକୁ ରାସ୍ତାଟି ସଂଯୋଗ କରିଛି । ପାଖ ଆଖ ସୟା, ବାଉଁଶବାଗ, ସାଟିବାଟି, ଧୂଳିପଦା, ବାହାବଳପୁର, ଅଚକ, ମହରମପୁର, ନନ୍ଦପୁର, ଦୋଳସାହି, ମୁକୁନ୍ଦପୁର, ଭାଟପଡା, ତିହିଡ଼ି, ଫତେପୁର ଆଦି ଗ୍ରାମରୁ ଭକ୍ତମାନେ ଗୁପ୍ତଗଙ୍ଗାପୀଠକୁ ଯାତାୟାତ କରନ୍ତି । ବରୁଣେଇ ଗ୍ରାମ ଆଡ଼କୁ ଯାଇଥିବା ଏହି ରାସ୍ତା ପିଚୁ ସଡ଼କ ତ ଆଉ କେଉଁଠି କଂକ୍ରିଟ ସଡ଼କ ଥିଲା । ଏହି ରାସ୍ତାଟି କେବଳ ଗୁପ୍ତଗଙ୍ଗା ପୀଠ ନୁହଁ ବାସୁଦେବପୁର ବ୍ଲକକୁ ମଧ୍ୟ ସଂଯୋଗ କରୁଛି ।
ଗୁପ୍ତଗଙ୍ଗା ପୀଠକୁ ଯାଇଥିବା ଏହି ପିଚୁ ସଡ଼କ ଫାଟି ଆଁ କରିଛି । କୌତୁହଳର କଥା - ପିଚୁ ସଡ଼କରେ ଘାସବୁଦା ଯାହାକୁ ଯେତେ । ରାସ୍ତାର ଅବସ୍ଥା ବିପର୍ଯ୍ୟସ୍ତ ହୋଇଥିବାରୁ ବେଣାବୁଦା ଘେରି ଗଲାଣି । ଯେଉଁଥିରେ ବିଷାକ୍ତ ସାପ ରହୁଛନ୍ତି । ଫାଟ ଭିତରୁ ବିଷାକ୍ତ ସାପ ବାହାରୁ ଥିବାରୁ ଲୋକେ ଭୟ କଲେଣି ଏହି ପ୍ରାଚୀନ ପୀଠକୁ ଯିବା ପାଇଁ । ଗ୍ରାମ୍ୟ ଉନ୍ନୟନ ବିଭାଗ ଏହି ରାସ୍ତାକୁ କବ୍ଜା କରି ରଖିଥିବାବେଳେ ମରାମତି କରିବା ଦୂରର କଥା ଏହି ରାସ୍ତା କେମିତି ଅଛି ତାହାକୁ ପରିଦର୍ଶନ କରିବାକୁ କେବେବି ଯାଉନାହାନ୍ତି । ରକ୍ଷଣାବେକ୍ଷଣ ଅଭାବରୁ ଏହି ପୀଠର ଐତିହ୍ୟ ଲୋପ ପାଇବାକୁ ବସିଲାଣି । ପୀଠର ସେମିତି କିଛି ଆଖିଦୃଶିଆ ଉନ୍ନତି ହୋଇପାରିନି । ପୀଠର ଉନ୍ନତିକରଣ ପାଇଁ କୌଣସି ରାଜନେତା କିମ୍ବା ପ୍ରଶାସନ ଦୃଷ୍ଟି ଦେଉନଥିବାରୁ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି ।
