ଭାପୁର ୨୪।୧୨: ଫତେଗଡ ଥାନା ଅନ୍ତର୍ଗତ ବନମାଳିପୁର ପଞ୍ଚାୟତରେ ନିର୍ମାଣଧୀନ ମେଗା ପାନୀୟଜଳ ପ୍ରକଳ୍ପ ଓ ଭାପୁର ବ୍ଲକ ଅନ୍ତର୍ଗତ ପଦ୍ମାବତୀ ମହାନଦୀ କୂଳରେ ନିର୍ମାଣ ହୋଇଥିବା ଇନଟେକ୍ ୱଲ ସମୀକ୍ଷା କରିଛନ୍ତି ପଞ୍ଚାୟତି ରାଜ ବିଭାଗ ଉଚ୍ଚ କର୍ତ୍ତୃପକ୍ଷ । ସୂଚନା ଅନୁଯାୟୀ ସୋମବାର ଅପରାହ୍ନରେ ପ୍ରଥମେ ଭାପୁର ବ୍ଳକ ପଦ୍ମାବତୀ ଗ୍ରାମ ନିକଟସ୍ଥ ମହାନଦୀ କୂଳରେ ନିର୍ମାଣ ହୋଇଥିବା ଇନଟେକ୍ ୱେଲର ସ୍ଥିତି ଅନୁଧ୍ୟାନ କରିଥିଲେ । ସମୀକ୍ଷା ବେଳେ ନୟାଗଡ଼ ଅଧିକ୍ଷଣ ଯନ୍ତ୍ରୀ ସରଫରାଜ ଖାଁ, ଏସଡିଓ ସୁବାଷ ଚନ୍ଦ୍ର ସ୍ଵାଇଁ, ଜିଭିପିଆର ଏଜିଏମ ଏମ. ମୁରଲୀ ନାଇଡୁ, ଭାପୁର ଗୋଷ୍ଠୀ ଉନ୍ନୟନ ଅଧିକାରୀ ଶାରଦା ପ୍ରଶନ୍ନ ପଣ୍ଡା, ଗ୍ରାମ୍ୟ ପାନୀୟଜଳ ଯୋଗାଣ କନିଷ୍ଠ ଯନ୍ତ୍ରୀ ସ୍ୱାଧୀନ କୁମାର ପାଣିଗ୍ରାହୀ, ନୃସିଂହ ଚରଣ ଦାସ ପ୍ରମୁଖ ଉପସ୍ଥିତ ରହିଥିଲେ । ପରେ ସନ୍ଧ୍ୟା ୬ ଟାରେ ପଞ୍ଚାୟତିରାଜ ଓ ପାନୀୟଜଳ ବିଭାଗ ପ୍ରିନ୍ସିପାଲ ସେକ୍ରେଟାରୀ ଗିରିଶ ଏସ ଏନ ବନମାଳୀପୁର ପଞ୍ଚାୟତ ଅଧୀନ ପୁରୁଷୋତ୍ତମପୁରରେ ମେଗା ପାନୀୟ ଜଳ ପ୍ରକଳ୍ପ ଅଧୀନରେ ତିଆରି ହେଉଥିବା ଟ୍ରିଟମେଣ୍ଟ ପ୍ଳାଣ୍ଟ କାମ ବୁଲି ଦେଖିଥିଲେ।
ଏ ଅବସରରେ କାର୍ଯ୍ୟରେ ଅହେତୁକ ବିଳମ୍ବ ହୋଇଥିବାରୁ ଶ୍ରୀ ଏସ ଏନ ଅସନ୍ତୋଷ ପ୍ରକାଶ କରିବା ସହିତ ବିଭାଗୀୟ ଅଧିକାରୀଙ୍କୁ ପ୍ରକଳ୍ପ ବାବଦରେ ସବିଶେଷ ତଥ୍ୟ ପଚାରି ବୁଝିଥିଲେ । ବିଶେଷକରି କାମ ନେଇଥିବା ଘରୋଇ ସଂସ୍ଥା ଜିଭିପିଆର ଇଞ୍ଜିନିୟରର୍ସ ଲିମିଟେଡ ପ୍ରକଳ୍ପ ନିର୍ମାଣରେ ଅହେତୁକ ବିଳମ୍ବ କରିଥିବା ବେଳେ ବହୁ ପଞ୍ଚାୟତରେ ଉଚ୍ଚ ସମ୍ପନ୍ନ ପାଣି ଟାଙ୍କି କାର୍ଯ୍ୟ ଶେଷ ହୋଇନଥିବା ସୂଚନା ମିଳିଛି । ଅନ୍ୟପକ୍ଷରେ ନୂତନ ବିଦ୍ୟୁତ ଖୁଣ୍ଟ ପୋତାଯିବା କାର୍ଯ୍ୟ ଚାଲିଥିବା ନେଇ ଅଧିକାରୀ ମାନେ ଶ୍ରୀ ଏସ ଏନ ଙ୍କୁ ସୂଚନା ଦେଇଥିଲେ । ୱାଟର ଟ୍ରିଟମେଣ୍ଟ ପ୍ରକଳ୍ପ କାର୍ଯ୍ୟ ଚାଲୁରହିଥିବା ରହିଥିବା ବେଳେ ଆସନ୍ତା ମାର୍ଚ୍ଚ ସୁଦ୍ଧା ପ୍ରକଳ୍ପ ସମ୍ପୂର୍ଣ ଶେଷ ହେବା ସହ ପ୍ରତ୍ୟେକ ଘରେ ଜଳ ଯୋଗାଣ ପ୍ରଦାନ କରାଯିବ ବୋଲି ବିଭାଗ ପକ୍ଷରୁ କୁହାଯାଇଛି। ପ୍ରକଳ୍ପ ପରିସର ମଧ୍ୟରେ ଥିବା ଅଫିସ ଗୃହରେ ଶ୍ରୀ ଏସ ଏନ ଙ୍କୁ ଏହି ପ୍ରକଳ୍ପ ଅଧୀନରେ ଚାଲିଥିବା କାମ ସମ୍ପର୍କରେ ଗୋଲାପି ଚିତ୍ର ଦେଖାଇଥିଲା । ଅନ୍ୟପକ୍ଷରେ ଖୁବଶୀଘ୍ର କାମ ତ୍ୱରାନ୍ୱିତ କରିବା ପାଇଁ ପ୍ରିନ୍ସିପାଲ ସେକ୍ରେଟାରୀ କମ୍ପାନୀ କର୍ତୃପକ୍ଷ ଓ ବିଭାଗୀୟ ଅଧିକାରୀଙ୍କୁ ନିର୍ଦ୍ଧେଶ ଦେଇଥିବା ସୂଚନା ମିଳିଛି। ଅନ୍ୟମାନଙ୍କ ମଧ୍ୟରେ ବନମାଳୀପୁର ଠାରେ ଖଣ୍ଡପଡ଼ା ବିଡିଓ ଅଙ୍କୁର ଅଭିଳାଷ, ସହକାରୀ ଯନ୍ତ୍ରୀ ଆଶୁତୋଷ ମହାନ୍ତି, କନିଷ୍ଠ ଯନ୍ତ୍ରୀ ପ୍ରତିଭା ମଞ୍ଜରୀ ବାରିକ ପ୍ରମୁଖ ଉପସ୍ଥିତ ରହିଥିବା ସୂଚନା ମିଳିଛି।
