ଭୁବନେଶ୍ୱର,୨୫/୧୨ : କେନ୍ଦ୍ର ଶିକ୍ଷା ମନ୍ତ୍ରଣାଳୟ ପଞ୍ଚମ ଓ ଅଷ୍ଟମ ଶ୍ରେଣୀରେ ପିଲାମାନେ ଫେଲ୍ ହେଲେ ସେମାନଙ୍କୁ ଫେଲ୍ ସହ ପୁନଃ ସେହି ଶ୍ରେଣୀରେ ପଢିବାକୁ ଘୋଷଣା କରିଛନ୍ତି । ଏଥିସହିତ ପିଲାକୁ ଦୁଇ ମାସ ଭିତରେ ଆନୁସଙ୍ଗିକ କୋଚିଂ ଓ ପ୍ରସ୍ତୁତି ପାଇଁ ସ୍କୁଲ କର୍ତ୍ତୃପକ୍ଷ ସବୁ ସୁବିଧା ଯୋଗାଇଦେବେ । ପିଲାଟି ରିଟେଷ୍ଟ ପରୀକ୍ଷା ପୁଣି ଥରେ ଦେଇ ପାସ୍ କରିବାକୁ ପଡିବ । ଯଦି ସେଥିରେ ଫେଲ୍ ହୁଏ ତେବେ ସେହି ବର୍ଷ ଫେଲ୍ ବୋଲି ଧରାଯିବ । ପୂର୍ବରୁ ଅଷ୍ଟମ ପର୍ଯ୍ୟନ୍ତ କୌଣସି ଫେଲ୍ ନଥିଲା । ଶିକ୍ଷା ଅଧିକାର ଆଇନରେ ପରିବର୍ତ୍ତନ ଆଣି ସରକାର ଏହି ନିୟମ ଲାଗୁ କରିବେ ବୋଲି ଘୋଷଣା କରିଛନ୍ତି । ଯାହାକି ପିଲାଟିର ଶିକ୍ଷା ଅଧିକାରକୁ କ୍ଷୂର୍ଣ୍ଣ କରୁଛି । ଏହାଦ୍ୱାରା ଅଧାରୁ ପାଠ ଛାଡୁଥିବା ପିଲାଙ୍କ ସଂଖ୍ୟା ବୃଦ୍ଧି ପାଇବ ଏବଂ ଶିଶୁ ଶ୍ରମିକ ଓ କନ୍ୟା ଶିକ୍ଷା ଗ୍ରହଣ କ୍ଷେତ୍ରରେ ଏହି ନିଷ୍ପତ୍ତି ବ୍ୟାପକ ଖରାପ ପ୍ରଭାବ ପକାଇବ ବୋଲି ଓଡ଼ିଶା ଅଭିଭାବକ ମହାସଂଘ କହିଛି ।
ଓଡିଶା ଅଭିଭାବକ ମହାସଂଘ ପକ୍ଷରୁ କୁହାଯାଇଛି ଯେ, ଶିକ୍ଷା ଅଧିକାର ଆଇନ ଅନୁଯାୟୀ ପ୍ରତ୍ୟେକ ପିଲାକୁ ତା’ର ଘର ପାଖରେ ଉତ୍ତମ ଓ ଗୁଣାତ୍ମକ ଶିକ୍ଷା ପ୍ରଦାନ ସରକାରଙ୍କ ମୌଳିକ ଦାୟିତ୍ୱ । ଆଜିବି ସବୁ ପିଲାଙ୍କ ପାଖରେ ଶିକ୍ଷା ଉପଲବ୍ଧ ନାହିଁ । ସରକାର କେବଳ ଦିଲ୍ଲୀ, ଭୁବନେଶ୍ୱର ସ୍କୁଲକୁ ଶିକ୍ଷା ଦାନ ସ୍ୱରୂପ ନିଭାଇବା ଉଚିତ । ଏଠାରେ ମାଲକାନଗିରି, ଶୁକମା ଓ ଲଦାଖର ଉପାନ୍ତ ଅଂଚଳର ସ୍କୁଲକୁ ବିଚାରକୁ ନେଇ ସରକାର ନିଷ୍ପତ୍ତି ନେବା ଉଚିତ । ଯେଉଁଠି ପାଞ୍ଚଟି ଶ୍ରେଣୀକୁ ଜଣେ ଶିକ୍ଷକ, ହିନ୍ଦୀ ଶିକ୍ଷକରେ ଗଣିତ ପାଠ ପଢା ଚାଲିଛି । ସେଠାରେ ଏପରି ହାସ୍ୟାସ୍ପଦ କଥା କହି ସରକାର କାହାକୁ ବୋକା ବନାଉଛନ୍ତି । ସରକାର ତୁରନ୍ତ ଏହି ନିଷ୍ପତିର ପୁନର୍ବିଚାର କରିବାକୁ ମହାସଂଘ ଦାବୀ କରିଛି ।
