ନୂଆଦିଲ୍ଲୀ: ଉତ୍ତର ଗୋଆର କାଲାଙ୍ଗୁଟ୍ ବିଚରେ ଇଞ୍ଜିନ ଖରାପ ହେବା କାରକଣରୁ ଆଜି (ବୁଧବାର) ଏକ ପର୍ଯ୍ୟଟନ ଡଙ୍ଗା ବୁଡ଼ିଯାଇଛି । ଏହି ଦୁର୍ଘଟଣାରେ ଜଣଙ୍କର ମୃତ୍ୟୁ ଘଟିଥିବା ବେଳେ ପ୍ରାୟ ୨୦ ଜଣ ଆହତ ହୋଇଛନ୍ତି । ପୋଲିସ ଏହି ସୂଚନା ଦେଇଛି ।
ନ୍ୟୁଜ୍ ଏଜେନ୍ସି ପିଟିଆଇ ଅନୁଯାୟୀ ଲାଇଫଗାର୍ଡ ଦାୟିତ୍ୱରେ ଥିବା ସଞ୍ଜୟ ଯାଦବ କହିଛନ୍ତି ଯେ, "କାଲାଙ୍ଗୁଟ ବେଳାଭୂମିରେ ଏକ ଡଙ୍ଗା ବୁଡ଼ିଯାଇଛି । ଏହି ଘଟଣାରେ ଆମେ ୧୩ ଜଣଙ୍କୁ ଉଦ୍ଧାର କରିଛୁ। ଆମେ ପ୍ରକୃତ ସଂଖ୍ୟା ଜାଣି ନାହୁଁ, କିନ୍ତୁ ଡଙ୍ଗା ତଳେ ଫସି ରହିଥିବା ଗୋଟିଏ ପରିବାରର ୬ ଜଣଙ୍କ ଅବସ୍ଥା ଗୁରୁତର ରହିଛି । ଏହି ଘଟଣାର କାରଣ ଆମେ ଜାଣି ନାହୁଁ। ବର୍ତ୍ତମାନ ପୋଲିସ ବୁଡ଼ିଯିବା କାରଣରୁ ଅସ୍ୱାଭାବିକ ମୃତ୍ୟୁ ମାମଲା ରୁଜୁ କରିଛି ଏବଂ ଦୁର୍ଘଟଣାର ତଦନ୍ତ କରୁଛି।
ବୁଧବାର ଅପରାହ୍ନରେ ଏହି ଘଟଣା ଘଟିଛି । ତେବେ ଡଙ୍ଗାରେ ପ୍ରାୟ ୨୦ ଜଣ ଯାତ୍ରୀ ଥିଲେ। ଏମାନଙ୍କ ବୟସ ୬ ରୁ ୬୫ ବର୍ଷ ମଧ୍ୟରେ ରହିଛି। ମହାରାଷ୍ଟ୍ରର ଖେଡରୁ ଗୋଟିଏ ପରିବାରର ୧୩ ଜଣ ଲୋକ ଏଥିରେ ଅନ୍ତର୍ଭୂକ୍ତ ଥିଲେ। ସମୁଦ୍ର କୂଳରୁ ପ୍ରାୟ ୬୦ ମିଟର ଦୂରରେ ଡଙ୍ଗାଟି ବୁଡ଼ିଛି ।
