ନୂଆଦିଲ୍ଲୀ,୨୫।୧୨: ବଡ଼ ଦିନରେ ପୂର୍ବାଞ୍ଚଳ ରାଜ୍ୟ ମଣିପୁର ଅଶାନ୍ତ। ଗୁଳିକାଣ୍ଡରେ ଥରିଲା ରାଜଧାନୀ ଇମ୍ଫାଲ। ଇମ୍ଫାଲ ଇଷ୍ଟ ଓ କାଙ୍ଗପୋକପି ଜିଲ୍ଲାର ସୀମାବର୍ତ୍ତୀ ଦୁଇ ଗାଁରେ ପ୍ରବଳ ଗୁଳିମାଡ ଘଟଣା ଦେଖିବାକୁ ମିଳିଛି। ତେବେ ଏହି ଗୁଳିମାନେ କେତେ ଲୋକ ହତାହତ ହୋଇଛନ୍ତି, ଏହାର ସଠିକ ସୂଚନା ମିଳିପାରିନି। ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ପ୍ରବଳ ଉତ୍ତେଜନା ସୃଷ୍ଟି ହୋଇଛି। ଏହାକୁ ଦେଖି ପ୍ରଭାବିତ ଗାଁକୁ ସୁରକ୍ଷାକର୍ମୀଙ୍କୁ ପଠାଯାଇଛି।
ଅନ୍ୟପକ୍ଷେ ଚୁରାଚାନ୍ଦପୁର ଜିଲ୍ଲାରେ ସୁରକ୍ଷା ବଳ ଏକ ବ୍ରିଜ ତଳେ ୩.୬ କିଲୋଗ୍ରାମ ବିସ୍ଫୋରକ ଜବତ କରିଛନ୍ତି। ଏନେଇ ସେନା ପକ୍ଷରୁ ସୂଚନା ଦିଆଯାଇଛି। କୁହାଯାଇଛି ଯେ, ଆସାମ ରାଇଫଲ୍ସ ଓ ମଣିପୁର ପୋଲିସର ଏକ ମିଳିତ ଅଭିଯାନରେ ଇମ୍ଫାଲ-ଚୁରାଚାନ୍ଦପୁର ମାର୍ଗରେ ଥିବା ଲିସାଙ୍ଗ ଗାଁରୁ ବିସ୍ଫୋରକ ଜବତ କରାଯାଇଛି।
‘ସ୍ପିୟର କୋର’ ସୋସିଆଲ ମିଡିଆ ମଞ୍ଚ ‘ଏକ୍ସ’ରେ ଏକ ପୋଷ୍ଟରେ କହିଛି ‘ମଣିପୁରର ଚୁରାଚାନ୍ଦପୁର ଜିଲ୍ଲାର ଲିସାଙ୍ଗ ଗାଁରେ ଆଇଆଇଡି ଥିବାର ଗୁଇନ୍ଦ ସୂଚନା ମିଳିଥିଲା। ଏହା ଆଧାରରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା। ଆସାମ ରାଇଫଲ୍ସ ଏକ ମିଳିତ ତଲାସୀ ଅଭିଯାନ ଆରମ୍ଭ କରିଥିଲା। ଟିମ୍ ଇମ୍ଫାଲ-ଚୁରାଚାନ୍ଦପୁରରେ ଏକ ବ୍ରିଜ୍ ତଳୁ ୩.୬ କେଜି ବିସ୍ଫୋରକ, ଡିଟୋନେଟର, କାର୍ଡଟେକ୍ସ ଓ ଅନ୍ୟ ଜିନିଷ ଜବତ କରିଛି।’
