ଭୁବନେଶ୍ୱର,୨୫/୧୨ : ଭୁବନେଶ୍ୱରରେ ଫାଟ । ବ୍ରହ୍ମପୁରରେ ଫାଳ ଫାଳ । ବାଲେଶ୍ୱରରେ ବି ଗଡ଼ବଡ଼। ଏବେ ରାଜ୍ୟର ବିଭିନ୍ନ ନିର୍ବାଚନମଣ୍ଡଳୀରେ ଏଭଳି ସ୍ଥିତି ଦେଇ ଗତି କରୁଛି ବିଜୁ ଜନତା ଦଳ (ବିଜେଡି) । ନେତା, କର୍ମୀଙ୍କ ଭିତରେ ପୁଞ୍ଜିଭୂତ ଅସନ୍ତୋଷ କୁହୁଳିବାରେ ଲାଗିଛି । କେଉଁଠି ଫାଟ ପଦାକୁ ବାହାରିଲାଣି, ଆଉ କେଉଁଠି ଭିତରେ ଭିତରେ ତୁତୁମେଁମେଁ ଆରମ୍ଭ ହୋଇଯାଇଛି । ୨୪ ବର୍ଷର ଲମ୍ବା ରାଜୁତି ପରେ କ୍ଷମତାଚ୍ୟୁତ ବିଜେଡି ଭିତରେ ଏବେ ମାଡ଼ିଯାଇଛି ନିରାଶାର କଳାବାଦଲ । ନିର୍ବାଚନରେ ବିପର୍ଯ୍ୟୟ ପରେ ଦଳର ଅଧିକାଂଶ ବଡ଼ ନେତା ନିରବ । କାଁ ଭାଁ ନେତାଙ୍କୁ ଛାଡ଼ିଦେଲେ, ଅନେକ ପରାଜିତ ନେତା ସ୍ଥାଣୁ । ଟିକଟ ଦୌଡ଼ରୁ ବାଦ୍ ପଡ଼ିଥିବା ଆଶାୟୀ ମୁହଁ ଫେରାଇଲେଣି । ତୃଣମୂଳସ୍ତରରେ ସରପଞ୍ଚ, ସମିତିସଭ୍ୟ, ବ୍ଲକ ଅଧ୍ୟକ୍ଷ ଦଳ ଡେଇଁଲେଣି । ଅନେକଙ୍କୁ ଅନାସ୍ଥା ଭୟ ଗୋଡ଼ାଇଲାଣି । ମମତା ମହାନ୍ତ, ସୁଜିତ କୁମାରଙ୍କ ଭଳି ରାଜ୍ୟସଭା ସାଂସଦ ବିଜେଡି ଛାଡ଼ିବା ପରେ ରାଜ୍ୟସ୍ତରରୁ ନେଇ ତୃଣମୂଳ ଯାଏଁ ବିଜେଡି ନେତା ଓ କର୍ମୀଙ୍କ ବିଶ୍ୱାସ ଦୋହଲି ଯାଇଛି । ଗୋଟିଏ ପଟେ ‘ଅପରେସନ ଲୋଟସ୍’ ଡର ଓ ଅନ୍ୟପଟେ ଅନିଶ୍ଚିତତାର ଆଶଙ୍କାରେ ନେତା, କର୍ମୀ ସବୁ ପୀଡ଼ିତ । କେହି କାହାକୁ ଭରସା କରିପାରୁନାହାନ୍ତି ।
ଏଭଳି ସ୍ଥିତିରେ ଆସନ୍ତା ୨୬ ତାରିଖରେ ବିଜେଡି ପାଳିବ ୨୮ତମ ପ୍ରତିଷ୍ଠା ଦିବସ । ପ୍ରଥମ ପ୍ରତିଷ୍ଠା ଦିବସରୁ ଏଯାବତ୍ ଏଭଳି କଠିନ ପରିସ୍ଥିତିକୁ କେବେ ସାମ୍ନା କରିନଥିଲା ଦଳ । ସୁପ୍ରିମୋ ନବୀନ ପଟ୍ଟନାୟକ ନିଜ ୨୭ ବର୍ଷର ଲମ୍ବା ରାଜନୈତିକ ଯାତ୍ରାରେ ସବୁଠାରୁ ବଡ଼ ଆହ୍ୱାନର ସାମ୍ନା କରୁଛନ୍ତି । ନବୀନଙ୍କ ଆଗରେ ବଡ଼ ଆହ୍ୱାନ-କେମିତି ଦଳକୁ ସଂଗଠିତ କରି ପୁଣି ଥରେ ଛିଡ଼ା କରିବେ? କର୍ମୀ, ନେତାଙ୍କ ଭିତରେ କିଭଳି ଫେରାଇ ଆଣିବେ ଆତ୍ମବିଶ୍ୱାସ? ବିଜେଡିକୁ ନେଇ ଯେଉଁ ଅନିଶ୍ଚିତତା ଓ ଆଶଙ୍କା ନେତା, କର୍ମୀଙ୍କ ଭିତରେ ପଶିଗଲାଣି, କେମିତି ତାହାକୁ ଦୂର କରିବେ? ପ୍ରତିଷ୍ଠା ଦିବସରେ ଏଥର କୌଣସି ରାଜ୍ୟସ୍ତରୀୟ କାର୍ଯ୍ୟକ୍ରମ କରିବ ନାହିଁ ବିଜେଡି । ପ୍ରତି ନିର୍ବାଚନମଣ୍ଡଳୀ ସ୍ତରରେ ସଭା/ସମିତି ହେବ । ହେଲେ ଟିକଟକୁ ନେଇ ନିର୍ବାଚନ ପୂର୍ବରୁ ବିଜେଡିରେ ଯେଉଁଭଳି ଟଣାଓଟରା ସ୍ଥିତି ଦେଖିବାକୁ ମିଳିଥିଲା, ପ୍ରତିଷ୍ଠା ଦିବସ ଆୟୋଜନରେ ତା’ର ପ୍ରଭାବ ପଡ଼ିପାରେ । ଏମିତିକି ଗୋଟିଏ ଗୋଷ୍ଠୀ ଆୟୋଜନର ମଙ୍ଗ ଧରିଲେ, ଆଉ କିଛି ଗୋଷ୍ଠୀ ଏଥିରୁ ଦୂରେଇ ଯାଇପାରନ୍ତି । ସଙ୍କଟ ସମୟରେ ଦଳକୁ ଏକାଠି ରଖିବାକୁ ନବୀନ ଅଣ୍ଟା ଭିଡ଼ିଛନ୍ତି ।
ବ୍ରହ୍ମପୁର ବିବାଦ ତୁଟାଇବା ପରେ ନବୀନ ବାଲେଶ୍ୱର ଜିଲ୍ଲାର ନେତାଙ୍କୁ ଡାକି ଆଲୋଚନା କରିଛନ୍ତି । ଟିକଟ କଟିଥିବା ନେତାଙ୍କୁ ବୁଝାଇଛନ୍ତି । ମାତ୍ର ଅସନ୍ତୁଷ୍ଟ ନେତାମାନଙ୍କ ସହ ନିୟମିତ ଯୋଗାଯୋଗରେ ରହି ସମନ୍ୱୟ ରଖିବା ଭଳି ଟାଣୁଆ ସଂଗଠକ ଓ ରଣନୀତିକାର ଭୂମିକା କିଏ ନେବ? ଏଭଳି ଏକ ସମୟରେ ବିଜେଡି ସାଂଗଠନିକ ନିର୍ବାଚନକୁ ଓହ୍ଲାଇବାକୁ ଯାଉଛି । ଇତିମଧ୍ୟରେ ସଭ୍ୟ ସଂଗ୍ରହ ଅଭିଯାନ ଗତ ୨୧ ତାରିଖରେ ଶେଷ ହୋଇଛି । ଦଳୀୟ ସୂତ୍ର ଅନୁସାରେ ପ୍ରାୟତଃ ସବୁ ନିର୍ବାଚନମଣ୍ଡଳୀରୁ ସଭ୍ୟ ସଂଗ୍ରହ ତାଲିକା ଆସି ପହଞ୍ଚିଛି । ପ୍ରତିଷ୍ଠା ଦିବସ ପରେ ଚୂଡ଼ାନ୍ତ ସଂଖ୍ୟା ହିସାବ କରାଯିବ । ଏହାପରେ ପଞ୍ଚାୟତ, ବ୍ଲକ, ଜିଲ୍ଲା ସ୍ତରରେ ସାଂଗଠନିକ ନିର୍ବାଚନ ହେବ । ତା’ପରେ ରାଜ୍ୟସ୍ତରୀୟ ସାଂଗଠନିକ ନିର୍ବାଚନ ହେବ ପୂର୍ବରୁ ଦଳର ସଭ୍ୟ ସଂଖ୍ୟା ୧ କୋଟି ଥିବାବେଳେ ଏଥର ଏ ସଂଖ୍ୟା ଟପିବ ବୋଲି ଦଳ ଆଶା ରଖିଛି । ମାତ୍ର ଏହି ସଂଖ୍ୟା ଛୁଇଁବା ନେଇ ଅନେକ ଆଶଙ୍କା ମନରେ ରହିଛି ।
