ନବରଙ୍ଗପୁର,୨୫/୧୨ : ବୟସ ୭୦ ଟପିଲାଣି । ଶଯ୍ୟାରୁ ଉଠିବାକୁ ଶକ୍ତି ନାହିଁ । ଘର ଅଗଣାରେ ଚାଲିବାକୁ ସାହାରା ଖୋଜୁଛନ୍ତି । ଅଥଚ ଗାଁଠୁ ୨କିମି ଦୂରରେ ମନରେଗା କାମରେ କୋଡ଼ି କୋଦାଳ ଧରି ଶ୍ରମିକ ଭାବେ କାମ କରୁଛନ୍ତି । ଏମିତି ଦର୍ଶାଇ ବୃଦ୍ଧାଙ୍କ ଟଙ୍କା ଉଠାଣ ହୋଇଛି । କାରସାଦି କରିଛନ୍ତି ସ୍ଥାନୀୟ ଦଲାଲ । ବୃଦ୍ଧାଙ୍କୁ ଫୁସୁଲାଇ ସତ ମିଛ କହି ମନରେଗା ସମେତ ତାଙ୍କର ଆବାସ ଯୋଜନା ଟଙ୍କା ଲୁଟି ନେଇଛନ୍ତି ଦଲାଲ । ଏଭଳି ଠକେଇ ଘଟଣା ଦେଖିବାକୁ ମିଳିଛି ପାପଡ଼ାହାଣ୍ଡି ଥାନା ପାତ୍ରି ପଞ୍ଚାୟତ ଜାନୀଗୁଡ଼ାରେ । ଠକେଇର ଶିକାର ହୋଇଛନ୍ତି ଗାଁର ତୁଳସା ଜାନୀ । ଅଭିଯୋଗ ପରେ ଠକେଇ ସମ୍ପର୍କରେ ତଦନ୍ତ ହେବ ବୋଲି ବିଡିଓ ପ୍ରତିଶ୍ରୁତି ଦେଇଛନ୍ତି । ହେଲେ ଠକେଇ ସମ୍ପର୍କରେ ଖୁଲାସା ହୋଇନି । ଏପରିକି ଦଲାଲଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ହୋଇନି । ପ୍ରଶାସନ ପକ୍ଷରୁ ଅବହେଳା କଲେ ଏଭଳି ଠକେଇ ବଢ଼ିବ ଏବଂ ଅସହାୟ ଲୋକେ ଶୋଷଣର ଶିକାର ହେବେ ବୋଲି ମତପ୍ରକାଶ ପାଇଛି ।
ଅଭିଯୋଗ ଅନୁସାରେ, ତୁଳସା ଜାନୀ ଗାଁଠୁ ୨ କିମି ଦୂର ଖଇରା ଗାଁରୁ ପଣ୍ଡରିପାଣି ଗାଁ ପର୍ଯ୍ୟନ୍ତ ଏକ ଡ୍ରେନ୍ ନିର୍ମାଣରେ ୧୩ ଦିନ ଧରି କାମ କରିଥିବା ଦର୍ଶାଯାଇଛି । ୨ ଥରରେ ତାଙ୍କ ବ୍ୟାଙ୍କ ଖାତାରେ ୪ ହଜାର ୫୭୬ ଟଙ୍କା ଜମା କରାଯାଇଛି । ଏହି ଟଙ୍କାକୁ ଦଲାଲମାନେ ବୃଦ୍ଧାଙ୍କ ଟିପଚିହ୍ନ ନେଇ ବ୍ୟାଙ୍କରୁ ଉଠାଇଛନ୍ତି । କେବଳ ମନରେଗା ନୁହେଁ, ଏହାପୂର୍ବରୁ ଗତ ନଭେମ୍ବର ୨୬ରେ ତାଙ୍କ ଆବାସଗୃହ ଟଙ୍କା ମଧ୍ୟ ଅନୁରୂପ ଭାବେ ହଡ଼ପ କରାଯାଇଥିବା ନେଇ ପରିବାର ଲୋକଙ୍କ ସହଯୋଗରେ ବୃଦ୍ଧା ପାପଡ଼ାହାଣ୍ଡି ବିଡିଓଙ୍କ ନିକଟରେ ଅଭିଯୋଗ କରିଛନ୍ତି । ଅଭିଯୋଗ ଶୁଣି ବିଡିଓ ତଦନ୍ତ କରାଯିବ ବୋଲି ପ୍ରତିଶ୍ରୁତି ଦେଇଥିଲେ ମଧ୍ୟ ସୁଫଳ ମିଳି ନ ଥିବା ବୃଦ୍ଧା କହିଛନ୍ତି । ବୃଦ୍ଧାଙ୍କ ପୁଅ ସୁଦର୍ଶନ ଜାନୀ ଓ ବୋହୂ ଆସମତୀ ଜାନୀ କହିଛନ୍ତି, ବୟସାଧିକ୍ୟ କାରଣରୁ ଦୀର୍ଘଦିନ ହେଲା ବୃଦ୍ଧାଜଣଙ୍କ କୌଣସି କାମ କରିପାରୁ ନାହାନ୍ତି । ସେମାନେ ଗରିବ ଜମିହୀନ ପରିବାରର । ବୃଦ୍ଧାଙ୍କୁ ଏବେ ମାସିକ ୧ ହଜାର ଟଙ୍କା ଭତ୍ତା ଓ ସରକାରଙ୍କ ତରଫରୁ ଚାଉଳ ମିଳୁଛି । ପୁଅ ଏକ ଦୋକାନରେ କାମ କରି ମାସିକ ୭ ହଜାର ଟଙ୍କା ରୋଜଗାର କରୁଛନ୍ତି । ଅଭାବ ଅନଟନରେ ଚଳୁଥିବା ବୃଦ୍ଧାଙ୍କ ନାଁରେ ମନରେଗା ଟଙ୍କା ହଡ଼ପ କରାଯାଇଛି ।
ଅନ୍ୟପକ୍ଷରେ ପାପଡ଼ାହାଣ୍ଡି ବ୍ଲକରୁ ଦାଦନ ଶ୍ରମିକଙ୍କ ସୁଅ ରୋକିବା ଲାଗି ଅନ୍ୟ ବ୍ଲକ ଅପେକ୍ଷା ପାପଡ଼ାହାଣ୍ଡି ବ୍ଲକରେ ମନରେଗା ମଜୁରି ଅଧିକ ରହିଛି । ଅନ୍ୟ ବ୍ଲକଗୁଡ଼ିକରେ ଦୈନିକ ୨୩୭ଟଙ୍କା ମଜୁରି ମିଳୁଥିବା ବେଳେ ପାପଡ଼ାହାଣ୍ଡି ବ୍ଲକରେ ମନରେଗାରେ ୩୫୨ ଟଙ୍କା ପ୍ରଦାନ କରାଯାଉଛି । ଅଥଚ ଏହାର ସୁଯୋଗ ପ୍ରକୃତ ଶ୍ରମିକଙ୍କୁ ମିଳୁ ନାହିଁ । ଜିଆର୍ଏସ୍ ଓ ଠିକାଦାରଙ୍କ ମଧୁଚନ୍ଦ୍ରିକାରେ ମନରେଗା ଯୋଜନା ଚାଲିଥିବାରୁ ପ୍ରଶାସନ ଦାଦନ ରୋକିବାରେ ବିଫଳ ହୋଇଛି । ଏନେଇ ଜିଲ୍ଲା ପରିଷଦ ସିଡିଓ ବିରଞ୍ଚି ନାରାୟଣ ଦରୱାନଙ୍କୁ ଯୋଗାଯୋଗ କରିବାରୁ ଘଟଣା ତଦନ୍ତ କରି ପଦକ୍ଷେପ ନିଆଯିବ ବୋଲି କହିଛନ୍ତି ।
