ବିନିକା,୨୫/୧୨: ହାତୀର ଫଟୋ ଉଠାଇବା ହେଲା କାଳ । ହାତୀ ଆକ୍ରମଣରେ ଯୁବକ ଗୁରୁତର । ଗୁରୁତର ହୋଇଥିବା ଯୁବକ ଜଣକ ଉଲୁଣ୍ଡା ବ୍ଲକ ଏସପତ୍ରାପାଳି ପଞ୍ଚାୟତ କୁଦପାଳି ଗ୍ରାମର ସୁଶୀଲ ବାଗ ବୋଲି ଜଣାପଡ଼ିଛି । ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ରେଞ୍ଜ କେଉଟିପାଳି ବ୍ରିଜ ନିକଟରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, କୁଦପାଲି ଗ୍ରାମର ସୁଶୀଲ ବାଗ ଏକ ବାଇକ୍ ଯୋଗେ ଆଇଁଲାଛାଟ ଆସୁଥିଲେ । ସେହି ସମୟରେ ହାତୀପଲ କେଉଟିପାଲି ବ୍ରିଜ ନିକଟରେ ଥିବାରୁ ସହ ସହ ଲୋକ ହାତୀପଲଙ୍କୁ ଦେଖୁଥିଲେ । ସେଠାରେ ଫଟୋ ଉଠାଇବା ସମୟରେ ହାତୀଟି ଆକ୍ରମଣ କରି ସୁଶୀଲଙ୍କୁ ଶୁଣ୍ଢରେ ଠେଲି ଦେଇଥିଲା । ଫଳରେ ସେ ଛିଟିକି ପଡ଼ିଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ସୁଶୀଲଙ୍କୁ ଉଦ୍ଧାର କରି ଉଲୁଣ୍ଡା ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରିଛନ୍ତି ।
