ଭୁବନେଶ୍ୱର, ୧୩ /୦୨: ସୁବର୍ଣ୍ଣପୁର ଜିଲ୍ଲା ବିନିକା ଥାନା ଅନ୍ତର୍ଗତ ପୋଲିସ ବାରାକ୍‌ରେ ଜଣେ ରିଜର୍ବ ପୋଲିସ କର୍ମଚାରୀଙ୍କ ମୃତ୍ୟୁ ହୋଇଛି । ଶୋଇଥିବା ସମୟରେ ତାଙ୍କର ଅସ୍ୱାଭାବିକ ମୃତ୍ୟୁ ହୋଇଛି । ତାଙ୍କ ମୃତ୍ୟୁର କାରଣ ଅସ୍ପଷ୍ଟ ରହିଛି । ମୃତ ପୋଲିସ ଜଣକ ହେଉଛନ୍ତି ଦିଲ୍ଲୀପ କୁମାର ମିଶ୍ର (୫୦)। ଦିଲ୍ଲୀପ ସୁବର୍ଣ୍ଣପୁର ରିଜର୍ଭ ପୋଲିସରେ କର୍ଯ୍ୟରଟ ଥିଲେ l 

ସୂଚନା ମୁତାବକ, ବିନିକା ସହର ଠାରେ ଚାଲୁଥିବା ପାପକ୍ଷୟ ଲୋକ ମହୋତ୍ସବ ପାଇଁ କାର୍ଯ୍ୟରେ ଆସିଥିଲେ ଦିଲ୍ଲୀପ କୁମାର ମିଶ୍ର । ବୁଧବାର କାମ ସାରିବା ପରେ ପୋଲିସ ବାରାକ୍‌କୁ ଯାଇ ଶୋଇଥିଲେ । ସକାଳୁ ଅନ୍ୟ ପୋଲିସ କର୍ମଚାରୀ ତାଙ୍କୁ ଉଠାଇବା ବେଳେ ସେ ଉଠିନଥିଲେ । ଏହା ଦେଖି ତୁରନ୍ତ ତାଙ୍କ ସହକର୍ମୀ ଡାକ୍ତରଙ୍କୁ ଡାକିଥିଲେ । ବାରାକ୍‌କୁ ଡାକ୍ତର ଆସି ତାଙ୍କୁ ମୃତ ଘୋଷଣା କରିଥିଲେ । ବର୍ତ୍ତମାନ ପର୍ଯ୍ୟନ୍ତ ମୃତଦେହ ପୋଲିସ ବାରାକ୍‌ରେ ପଡ଼ି ରହିଛି ।ମାଜିଷ୍ଟ୍ରେଟଙ୍କ ଉପସ୍ଥିତିରେ ମୃତଦେହକୁ ଉଠାଯିବ ବୋଲି ପୋଲିସ ପାଖରୁ ସୂଚନା ମିଳିଛି । କେଉଁ କାରଣରୁ ମୃତ୍ୟୁ ଘଟିଛି ତାହା ଜଣା ପଡ଼ି ନଥିବା ବେଳେ, ଶବ ବ୍ୟବଚ୍ଛେଦ ପରେ ସୂଚନା ମିଳିବ ବୋଲି ଜଣା ପଡିଛି।