ପାଟନା: ଦିଲ୍ଲୀ ବିଧାନସଭା ନିର୍ବାଚନ ପରେ ଏବେ ବିହାରରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ଯଦିଓ ନିର୍ବାଚନ ଲାଗି ତାରିଖ ଘୋଷଣା ହୋଇନାହିଁ କିନ୍ତୁ ରାଜନୈତିକ ଦଳଗୁଡ଼ିକ ଭିନ୍ନ ଭିନ୍ନ ବୟାନ ଜାରି କରୁଛନ୍ତି । ଏସବୁ ମଧ୍ୟରେ ରାଷ୍ଟ୍ରୀୟ ଜନତା ଦଳ(ଆରଜେଡି) ନେତା ଏବଂ ପୂର୍ବତନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବଙ୍କ ବଡ଼ ପୁଅ ତେଜପ୍ରତାପ ଯାଦବ ଆଗାମୀ ବିହାର ବିଧାନସଭା ନିର୍ବାଚନ ସମ୍ପର୍କରେ ଏକ ବଡ଼ ଭବିଷ୍ୟବାଣୀ କରିଛନ୍ତି । ତେଜ୍ପ୍ରତାପ ଯାଦବ ଦାବି କରିଛନ୍ତି ଯେ, ଆରଜେଡି ନେତା ତେଜସ୍ୱୀ ଯାଦବ ଖୁବ୍ ଶୀଘ୍ର ବିହାରର ମୁଖ୍ୟମନ୍ତ୍ରୀ ହେବେ।
କ’ଣ କହିଲେ ତେଜପ୍ରତାପ ?
ଗୁରୁବାର ଗଣମାଧ୍ୟମକୁ ପ୍ରତିକ୍ରିୟା ଦେଇ ତେଜପ୍ରତାପ ଯାଦବ କହିଛନ୍ତି ଯେ, ତେଜସ୍ୱୀ ଯାଦବ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ଏବଂ ପଲଟୁରାମ୍ (ନୀତୀଶ କୁମାର) ଖୁବଶୀଘ୍ର ସିଂହାସନ ଛାଡିବେ। ଏହା ମୋର ଭବିଷ୍ୟବାଣୀ ଯେ, ତେଜସ୍ୱୀ ଯାଦବ ମୁଖ୍ୟମନ୍ତ୍ରୀ ହେବେ ଏବଂ ଲଲନ ସିଂହଙ୍କ ଯେଉଁ ସ୍ୱପ୍ନ ରହିଛି ତାହା ଫେଲ୍ ହେବାକୁ ଯାଉଛି ।
ବିହାରରେ ନିର୍ବାଚନ କେବେ ?
ବିହାରରେ ବିଧାନସଭା ନିର୍ବାଚନ ୨୦୨୫ ବର୍ଷ ଶେଷରେ ଅନୁଷ୍ଠିତ ହେବାକୁ ଯାଉଛି । ନୀତୀଶ କୁମାରଙ୍କ ନେତୃତ୍ୱାଧୀନ ସରକାରଙ୍କ କାର୍ଯ୍ୟକାଳ ୨୩ ନଭେମ୍ବର ୨୦୨୦ ରୁ ଆରମ୍ଭ ହୋଇଥିଲା । ବର୍ତ୍ତମାନ ସରକାରଙ୍କ କାର୍ଯ୍ୟକାଳ ୨୨ ନଭେମ୍ବର ୨୦୨୫ ଶେଷ ହେବ । ବିହାରରେ ନିର୍ବାଚନ ପାଇଁ ମତଦାନ ନଭେମ୍ବର ଆରମ୍ଭରେ ହୋଇପାରେ । ବିହାରରେ ବିଜେପି, ଜେଡିୟୁ, ଏଲଜେପି (ରାମ ବିଳାସ), ଜିତନ ରାମ ମାଞ୍ଝି ଏବଂ ଉପେନ୍ଦ୍ର କୁଶବାହାଙ୍କ ଦଳକୁ ନେଇ ଏନଡିଏ ଏବଂ ଆରଜେଡି ଓ କଂଗ୍ରେସର ମେଣ୍ଟ ମଧ୍ୟରେ ଟକ୍କର ହେବ।
