ନୂଆଦିଲ୍ଲୀ,୨୭।୭: ଜଗଦୀପ ଧନଖଡ଼ଙ୍କ ଉପରାଷ୍ଟ୍ରପତି ପଦରୁ ଇସ୍ତଫା ଦେବା ପରେ ଦେଶରେ ରାଜନୀତି ଜୋର ଧରିଛି। ଏହି ସମୟରେ, କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ନିଜର ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି, ଏହା ତାଙ୍କ (ଧନଖଡ଼) ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ୟରେ ଏକ ମାମଲା। ସେ ସର୍ବଦା ସରକାରଙ୍କ ସପକ୍ଷରେ ଥିଲେ।
କଂଗ୍ରେସ ଅଧ୍ୟକ୍ଷ ଖଡଗେଙ୍କୁ ପଚରା ଯାଇଥିଲା, କୃଷକଙ୍କ ସପକ୍ଷରେ କହିବା ପାଇଁ ଧନଖଡ଼ଙ୍କୁ ଇସ୍ତଫା ଦେବାକୁ ବାଧ୍ୟ କରାଯାଇଥିଲା କି? ତେବେ ସେ ସେ ଅଭିଯୋଗ କରିଛନ୍ତି ଯେ ରାଜ୍ୟସଭାର ଅଧ୍ୟକ୍ଷ ଭାବରେ ତାଙ୍କ କାର୍ଯ୍ୟକାଳ ମଧ୍ୟରେ, ଧନଖଡ଼ ନିରନ୍ତର ସରକାରଙ୍କ ପକ୍ଷ ନେଇଥିଲେ ଏବଂ ବିରୋଧୀଙ୍କୁ ପ୍ରମୁଖ ପ୍ରସଙ୍ଗ ଉଠାଇବାର ସୁଯୋଗ ଦେଇ ନଥିଲେ।
ଉପାଧ୍ୟକ୍ଷ ପଦରୁ ଧନଖରଙ୍କ ଇସ୍ତଫା ସମ୍ପର୍କରେ ସେ କହିଛନ୍ତି, "ଆମ ପାଖରେ ଏ ବିଷୟରେ କୌଣସି ସୂଚନା ନାହିଁ। ଏହା ଧନଖଡ଼ ଏବଂ ମୋଦିଙ୍କ ଭିତରର ମାମଲା। ସେ କହିବା ଉଚିତ ଯେ କ'ଣ ଘଟିଥିଲା? ଯେତେବେଳେ ଆମେ ନୋଟିସ ଦେଇ ଗରିବ, ମହିଳା, ଦଳିତ ଏବଂ ଅବହେଳିତଙ୍କ ଉପରେ ଅତ୍ୟାଚାର ଏବଂ ହିନ୍ଦୁ-ମୁସଲିମ ସଂଘର୍ଷ ଭଳି ଘଟଣା ସହିତ ଜଡିତ ପ୍ରସଙ୍ଗ ଉଠାଇବାକୁ ଚେଷ୍ଟା କରିଥିଲୁ, ସେ ଆମକୁ ସୁଯୋଗ ଦେଇନଥିଲେ।’
ଉଲ୍ଲେଖନୀୟ ଯେ, ଜଗଦୀପ ଧନଖଡ଼ ସ୍ୱାସ୍ଥ୍ୟଗତ କାରଣ ଦର୍ଶାଇ ୨୧ ଜୁଲାଇ ସନ୍ଧ୍ୟାରେ ହଠାତ୍ ଉପରାଷ୍ଟ୍ରପତି ପଦରୁ ଇସ୍ତଫା ଦେଇଥିଲେ, ଯାହା ରାଜନୈତିକ ମହଲରେ କଳ୍ପନାଜଳ୍ପନା ବଢାଇଥିଲା। ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ପଠାଯାଇଥିବା ଇସ୍ତଫା ପତ୍ରରେ ଧନଖଡ଼ କହିଛନ୍ତି ସେ ଅସୁସ୍ଥ ଥିବାରୁ ତୁରନ୍ତ ପଦ ଛାଡି ଦେଉଛନ୍ତି।
