ପାଟନା: ନିର୍ବାଚନ କମିଶନ ବିହାରରେ ଭୋଟର ତାଲିକାର ସ୍ୱତନ୍ତ୍ର ବ୍ୟାପକ ସଂଶୋଧନ (SIR)ର ପ୍ରଥମ ପର୍ଯ୍ୟାୟର ଚୂଡ଼ାନ୍ତ ସଂଖ୍ୟା ପ୍ରକାଶ କରିଛନ୍ତି । ଭୋଟର ତାଲିକାର ସଂଶୋଧନ ପରେ ବିହାରରେ ମୋଟ ୭.୨୪ କୋଟି ଭୋଟର ଅଛନ୍ତି ବୋଲି ଜଣାପଡ଼ିଛି । ୬୫ ଲକ୍ଷ ଭୋଟରଙ୍କ ନାମ ହଟାଇ ଦିଆଯାଇଛି। ଯେଉଁମାନଙ୍କ ନାମ ବାଦ ଦିଆଯାଇଛି ସେମାନଙ୍କ ମଧ୍ୟରେ ମୃତ, ବିସ୍ଥାପିତ ଏବଂ ବିଦେଶୀ ଭୋଟର ଅନ୍ତର୍ଭୁକ୍ତ । ନିର୍ବାଚନ କମିଶନଙ୍କ ପକ୍ଷରୁ କୁହାଯାଇଛି ଯେ, ୨୪ ଜୁନ୍ ୨୦୨୫ ସୁଦ୍ଧା ବିହାରରେ ୭.୮୯ କୋଟି ଭୋଟର ଥିଲେ । ଏଥିମଧ୍ୟରୁ ୭.୨୪ କୋଟିରୁ ଅଧିକ ଭୋଟର ସେମାନଙ୍କର ଗଣନା ଫର୍ମ ଦାଖଲ କରିଛନ୍ତି । 

SIRର ପ୍ରଥମ ପର୍ଯ୍ୟାୟର ଚୂଡ଼ାନ୍ତ ସଂଖ୍ୟା ହେଉଛି ୭.୨୪ କୋଟି । ମୃତ, ବିସ୍ଥାପିତ, ବିଦେଶୀ କିମ୍ବା ସ୍ଥାୟୀ ଭାବରେ ଅନ୍ୟ ସ୍ଥାନକୁ ସ୍ଥାନାନ୍ତରିତ ହୋଇଥିବା ୬୫ ଲକ୍ଷ ଭୋଟରଙ୍କ ନାମ ବାଦ ଦିଆଯାଇଛି । SIR ବିହାରରେ ୨୪ ଜୁନ୍ ୨୦୨୫ ରେ ଆରମ୍ଭ ହୋଇଥିଲା। ମୃତ, ସ୍ଥାନାନ୍ତରିତ ଏବଂ ଦୁଇଥର ପଞ୍ଜିକୃତ ଭୋଟରଙ୍କ ନାମ ଭୋଟର ତାଲିକାରୁ ବାଦ ଦେବା ଏବଂ ଯୋଗ୍ୟ ଭୋଟରଙ୍କୁ ଅନ୍ତର୍ଭୁକ୍ତ କରିବା ଏହାର ଉଦ୍ଦେଶ୍ୟ । ଏହି ପ୍ରକ୍ରିୟା ଅଧୀନରେ, ବୁଥ୍ ସ୍ତରୀୟ ଅଧିକାରୀ (BLO) ଏବଂ ବୁଥ୍ ସ୍ତରୀୟ ଏଜେଣ୍ଟ (BLA) ଘର ଘର ଯାଇ ଭୋଟରଙ୍କଠାରୁ ଗଣନା ଫର୍ମ ସଂଗ୍ରହ କରିଥିଲେ । 

କମିଶନ ଜୁଲାଇ ୨୫ ସୁଦ୍ଧା ପ୍ରକ୍ରିୟାର ପ୍ରଥମ ପର୍ଯ୍ୟାୟ ପ୍ରାୟ ସମାପ୍ତ କରି ୯୯.୮ ପ୍ରତିଶତ ଭୋଟରଙ୍କୁ କଭର କରିଥିଲେ । କମିଶନ କହିଛନ୍ତି ଯେ, ଅଗଷ୍ଟ ୧ ରୁ ସେପ୍ଟେମ୍ବର ୧, ୨୦୨୫ ପର୍ଯ୍ୟନ୍ତ ଯେଉଁ ଯୋଗ୍ୟ ଭୋଟରଙ୍କ ନାମ ବାଦ ପଡ଼ିଛି, ସେମାନଙ୍କୁ ଡ୍ରାଫ୍ଟ ଭୋଟର ତାଲିକାରେ ଅନ୍ତର୍ଭୁକ୍ତ କରିବାର ସୁଯୋଗ ମିଳିବ । ଭୋଟର ତାଲିକାରେ ଏକାଧିକ ସ୍ଥାନରେ ପଞ୍ଜୀକୃତ ଭୋଟରଙ୍କ ନାମ କେବଳ ଗୋଟିଏ ସ୍ଥାନରେ ରଖାଯିବ । ବିହାରରୁ ଆରମ୍ଭ ହୋଇଥିବା ଏହି ଅଭିଯାନକୁ ଏବେ ସମଗ୍ର ଦେଶରେ କାର୍ଯ୍ୟକାରୀ କରିବାକୁ ଯୋଜନା କରାଯାଇଛି ।

ବିହାରରେ SIRକୁ ନେଇ ବିବାଦ ଲାଗିରହିଛି । ୨୦୦୩ ପରେ ପ୍ରଥମ ଥର ବିହାରରେ ଏତେ ବ୍ୟାପକ ସଂଶୋଧନ କରାଯାଉଛି। ଆରଜେଡି-କଂଗ୍ରେସ ସମେତ ସମସ୍ତ ବିରୋଧୀ ଦଳ ଦାବି କରୁଛନ୍ତି ଯେ, ଏସଆଇଆର ଗରିବ, ଦଳିତ, ପଛୁଆ ବର୍ଗ ଏବଂ ସଂଖ୍ୟାଲଘୁଙ୍କ ଭୋଟ ଅଧିକାର ଛଡ଼ାଇ ନେବା ପାଇଁ ଏକ ଷଡ଼ଯନ୍ତ୍ର। ବିରୋଧୀ ଦଳ SIRକୁ 'ବ୍ୟାକଡୋର୍‌ NRC' ବୋଲି କହିଛନ୍ତି । ବିରୋଧୀ ଦଳଗୁଡ଼ିକ କହିଛନ୍ତି ଯେ, ଅନେକ ପରିବାର ପାଖରେ ଜନ୍ମ ପ୍ରମାଣପତ୍ର ଭଳି ଆବଶ୍ୟକୀୟ କାଗଜପତ୍ର ନାହିଁ। ୨୦୦୧-୨୦୦୫ ମଧ୍ୟରେ ବିହାରରେ କେବଳ ୨.୮% ଲୋକଙ୍କର ଜନ୍ମ ପ୍ରମାଣପତ୍ର ଅଛି । ଫଳରେ ଲକ୍ଷ ଲକ୍ଷ ଲୋକଙ୍କୁ ଭୋଟର ତାଲିକାରୁ ବାଦ ଦିଆଯିବାର ଆଶଙ୍କା ରହିଛି । ତେଜସ୍ୱୀ ଯାଦବ କହିଛନ୍ତି ଯେ, ଏନଡିଏକୁ ଲାଭ ଦେବା ପାଇଁ ଏହା କରାଯାଉଛି ।