ଭୁବନେଶ୍ୱର, ୨୫/୧୨: ମଞ୍ଚେଶ୍ୱର ଶିଳ୍ପାଞ୍ଚଳର ଗଳିକନ୍ଦିରେ ଗୋଦାମ ଛାଇ ହୋଇଛି। ଛୋଟବଡ଼ ହୋଇ ପ୍ରାୟ ୮୦୦ରୁ ଅଧିକ ଗୋଦାମ ଅଛି। ପ୍ରାୟ ସବୁ ଗୋଦାମରେ କୁଇଣ୍ଟାଲ କୁଇଣ୍ଟାଲ ଓଜନର ଦହନଶୀଳ ସାମଗ୍ରୀ ଗଦା ହୋଇଛି। ବାରୁଦ ଗଦାରେ ପୁରା ଶିଳ୍ପାଞ୍ଚଳ ପଡି଼ଛି । କିନ୍ତୁ ଅଳ୍ପ କେଇଟାକୁ ଛାଡି଼ଦେଲେ, ବାକି ସବୁ ଗୋଦାମରେ ଫାୟାର ସେଫ୍ଟି ନାହିଁ ।
ସୋମବାର ସନ୍ଧ୍ୟାରେ ସତ୍ୟନଗରସ୍ଥିତ ପିଏସ୍ପି ଡିଷ୍ଟ୍ରିବ୍ୟୁଟର୍ସର ଗୋଦାମରେ ଘଟିଥିବା ଭୟାବହ ଅଗ୍ନିକାଣ୍ଡରେ କୋଟି କୋଟି ମୂଲ୍ୟର ଘରକରଣା ସାମଗ୍ରୀ ଜଳିଗଲା । ଅଗ୍ନିଶମ ବାହିନୀର ଅଢ଼େଇ ଶହ ଆଗ୍ନିକ, ୧୫ଟି ଦମକଳ ବାହିନୀ ନିଆଁ ଲିଭାରେ ଲାଗିଥିଲେ । ଏମିତିକି ରୋବଟିକ୍ ମିନିଟର ବି ଗୋଦାମ ଭିତରେ ପଶି ନିଆଁ ଲାଭାଇଲା । ତଥାପି ନିଆଁକୁ ସମ୍ପୂର୍ଣ୍ଣ ଆୟତ୍ତ କରିବାରେ ୫ ଘଣ୍ଟା ସମୟ ଲାଗିଲା । ଏହା ପଛର ମୁଖ୍ୟ କାରଣ ଥିଲା, ପ୍ରାୟ ସବୁ ଦମକଳରୁ ପାଣି ସରିଯାଇଥିଲା । ୧୦ଟି ଦମକଳ ଗୋଦାମ ଚାରିପାଖେ ପାଣି ସ୍ପ୍ରେ କରୁଥିଲେ । ବାକି ରିଜର୍ଭ ଥିବା ୫ଟି ଗାଡି଼ ଜରିଆରେ କଳ୍ପନା, ସଚିବାଳୟ ଦମକଳ କେନ୍ଦ୍ର ସହ ବରମୁଣ୍ଡାସ୍ଥିତ ଓଫଡ୍ରାରୁ ପାଣି ଅଣାଯାଇଥିଲା । ଫୋରମ ମାର୍ଟରେ ଥିବା ପାଣି ଟ୍ୟାଙ୍କରରୁ ମଧ୍ୟ ପାଣି ସରିଯାଇଥିଲା । ଯଦି ଉକ୍ତ ଗୋଦାମରେ ପାଣି ଟାଙ୍କି ଥାନ୍ତା, ତେବେ ଅଗ୍ନିକାଣ୍ଡକୁ ସହଜରେ ଆୟତ୍ତ କରାଯାଇ ପାରିଥାନ୍ତା ବୋଲି ଅଗ୍ନିଶମ ବାହିନୀ କହିଛି ।
ନ୍ୟାସନାଲ ବିଲ୍ଡିଂ କୋର୍ଡ ଅଫ୍ ଇଣ୍ଡିଆ ଓ ବ୍ୟୁରୋ ଅଫ୍ ଇଣ୍ଡିଆନ୍ ଷ୍ଟାଣ୍ଡାର୍ଡର ଗାଇଡ୍ଲାଇନ୍ ଅନୁସାରେ ଗୋଦାମ ନିର୍ମାଣ କରାଯିବା ବାଧ୍ୟତାମୂଳକ । ଏହି ନିୟମ ଅନୁସାରେ, ଏକ ଛୋଟ ଆକାରର ଗୋଦାମରେ ଅତିକମ୍ରେ ୫ ହଜାର ଲିଟର ପାଣିଟାଙ୍କି ରହିବ । ଗୋଦାମ ଆକାର ଅନୁସାରେ ପାଣିଟାଙ୍କିର କ୍ଷମତା ବଢ଼ିବ । ସର୍ବାଧିକ ଏକ ଲକ୍ଷ ୨୫ ହଜାର ଲିଟର କ୍ଷମତା ବିଶିଷ୍ଟ ପାଣି ଟାଙ୍କି ରହିପାରିବ । କିନ୍ତୁ ଶିଳ୍ପାଞ୍ଚଳର ଅଧିକାଂଶ ଗୋଦାମରେ ପାଣି ଟାଙ୍କି ବ୍ୟବସ୍ଥା ନାହିଁ । ଗାଇଡ୍ଲାଇନ୍ କହୁଛି, ଗୋଦାମରେ ପର୍ଯ୍ୟାପ୍ତ ମାତ୍ରାରେ ଅଗ୍ନି ନିରାପତ୍ତା ଯନ୍ତ୍ର ରହିବ । ଗୋଦାମ ପରିସରରେ ପାଣି ପମ୍ପ ବ୍ୟବସ୍ଥା ନିହାତି ଦରକାର । ବଡ଼ ଗୋଦାମରେ ଫାୟାର ଆଲାର୍ମ ସହ ଅଟୋମେଟିକ୍ ସ୍ପ୍ରିଙ୍କଲର୍ ବ୍ୟବସ୍ଥା ରଖିବା ବାଧ୍ୟତାମୂଳକ । ଏକ ଦମକଳ ଗାଡି଼ ଯିବା ଭଳି ଗୋଦାମ ଚାରିପାଖେ ବାଟ ରହିବା ନିହାତି ଦରକାର ।
ଖାଲି ମଞ୍ଚେଶ୍ୱର ଶିଳ୍ପାଞ୍ଚଳ ନୁହେଁ ରସୁଲଗଡ଼, ଭଗବାନପୁର ଓ ଚନ୍ଦକା ଶିଳ୍ପାଞ୍ଚଳରେ ଥିବା ଗୋଦାମଗୁଡିକ ମଧ୍ୟ ଏସବୁ ଗାଇଡ୍ଲାଇନ୍କୁ ଦଳିମକଚି ଦେଇଛନ୍ତି । ଅଧିକାଂଶ ଗୋଦାମରେ କୁଇଣ୍ଟାଲ କୁଇଣ୍ଟାଲ ପ୍ଲାଏ, ଟାୟାର, କପଡ଼ା, ଘରକରଣା ସାମଗ୍ରୀ, କାଠ ଫର୍ଣ୍ଣିଚର, ପେଟି, ବୈଦ୍ୟୁତିକ ସାମଗ୍ରୀ, ପ୍ଲାଷ୍ଟିକ୍ ସରଞ୍ଜାମ ଗଚ୍ଛିତ ରହୁଛି । ସାମାନ୍ୟ ଅଗ୍ନିକାଣ୍ଡରୁ ଏସବୁ ଶିଳ୍ପାଞ୍ଚଳରେ କୌଣସି ମୁହୂର୍ତ୍ତରେ ବି ବଡ଼ ଅଘଣଟ ଘଟିବାର ଆଶଙ୍କା ରହିଛି । ଅଗ୍ନିଶମ ବିଭାଗ ମଧ୍ୟ ଏ ଦିଗରେ ତତ୍ପର ହେଉନାହିଁ ।
