ଭୁବନେଶ୍ୱର, ୦୩/୦୭ : ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ (ଓୟୁଏଟି)କୁ ମିଳିଲା ଡ଼. ଏପିଜେ ଅବଦୁଲ କଲାମ ପ୍ରେରଣାଦାୟକ ସମ୍ମାନ । ନୂଆଦିଲ୍ଲୀର ଭାରତ ମଣ୍ଡପମରେ ଟପ ନୋଚ ଫାଉଣ୍ଡେସନ୍‌ ଦ୍ୱାରା ଆୟୋଜିତ ଏକ କାର୍ଯ୍ୟକ୍ରମରେ କୃଷି ଓ ବୈଷୟିକ ଜ୍ଞାନକୌଶଳ ପାଇଁ ଓୟୁଏଟିକୁ ଏହି ସମ୍ମାନ ଦିଆଯାଇଛି । ସାଂସଦ ତଥା ଅଭିନେତ୍ରୀ ହେମାମାଳିନୀ ଓୟୁଏଟିର ଯୋଜନା ଓ ତଦାରଖ ନିର୍ଦ୍ଦେଶକ ଡ଼. ଦୟାନିଧି ମିଶ୍ରଙ୍କୁ ଏହି ପୁରସ୍କାର ପ୍ରଦାନ କରିଛନ୍ତି । ଏଥିରେ ଦେଶର ବିଭିନ୍ନ କୋଣରୁ ଶିକ୍ଷଣୀୟ ସଂସ୍ଥା ଯୋଗ ଦେଇଥିଲେ । ସେମାନଙ୍କ ମଧ୍ୟରୁ ଉତ୍କୃଷ୍ଟ ସଂସ୍ଥାଗୁଡିକୁ ସମ୍ମାନିତ କରାଯାଇଛି । କୃଷି କ୍ଷେତ୍ରରେ ଓୟୁଏଟିର ଅବଦାନ, ଉଚ୍ଚତର ଗବେଷଣା, ଜ୍ଞାନ ପ୍ରସାରଣ ଏବଂ ଶିକ୍ଷାକ୍ଷେତ୍ରରେ ଉତ୍କର୍ଷତା ହାସଲ ନିମନ୍ତେ ବିଶ୍ୱବିଦ୍ୟାଳୟକୁ ଏହି ସଫଳତା ମିଳିଛି । ଏହି ଉତ୍ସବରେ ଉତ୍ତରପ୍ରଦେଶର ମନ୍ତ୍ରୀ ସତିଶ ଚନ୍ଦ୍ର ଦ୍ୟୁବେ ଓ ମନୋହର ଲାଲ ମନ୍ନୁ କୋରି, ବିଜେପି ଜାତୀୟ ମୁଖପାତ୍ର ସୟଦ ଜାଫର ଇସଲାମ, ସାଂସଦ ବାଂଶୁରୀ ସ୍ୱରାଜ ପ୍ରମୁଖ ଉପସ୍ଥିତ ଥିଲେ । ଏହି ସମ୍ମାନ ଆଗାମୀ ଦିନରେ ଛାତ୍ରଛାତ୍ରୀ ତଥା ଗବେଷକଙ୍କୁ ଉତ୍ସାହିତ କରିବ ବୋଲି ଓୟୁଏଟି କୁଳପତି ପ୍ରଫେସର ପ୍ରଭାତ କୁମାର ରାଉଳ କହିଛନ୍ତି ।