ଖଲ୍ଲିକୋଟ, ୩/୪ : ପୋଖରୀରେ ଗାଧୋଇ ସାରି ଘରକୁ ଫେରୁଥିଲେ। ରାସ୍ତାରେ ଟଳିପଡିଲେ । ମୃତ ଶ୍ରମିକ ଜଣକ ହେଉଛନ୍ତି କେଶପୁର ପଞ୍ଚାୟତ ଅନ୍ତର୍ଗତ ଫାସିଡି ଗ୍ରାମର ଏମ. ରଘୁ ପାତ୍ର (୬୦) । ତେବେ ଅଂଶୁଘାତରେ ମୃତ୍ୟୁ ହୋଇଥିବା ଅଭିଯୋଗ ହୋଇଛି।
କେଶପୁର ପଞ୍ଚାୟତ ଅନ୍ତର୍ଗତ ଫାସିଡି ଗ୍ରାମର ଏମ. ରଘୁ ପାତ୍ର ଶ୍ରମିକ ଭାବେ କାମ କରନ୍ତି। ଗୁରୁବାର ମଧ୍ୟାହ୍ନରେ କାମ ସାରି ଘର ପାଖ ପୋଖରୀକୁ ଗାଧୋଇବାକୁ ଯାଇଥିଲେ । ଗାଧୋଇ ସାରି ପ୍ରବଳ ଖରାରେ ଘରକୁ ଫେରୁଥିବା ବେଳେ ହଠାତ ମୁଣ୍ଡ ବୁଲାଇ ହୋଇ ଘର ଆଗରେ ଟଳି ପଡିଲେ । ତାଙ୍କୁ ସଙ୍ଗେ ସଙ୍ଗେ ପରିବାର ଲୋକ ଏକ ଅଟୋ ଯୋଗେ ଖଲ୍ଲିକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଚିକିତ୍ସା ପାଇଁ ଆଣିଥିଲେ। ସେତେବେଳକୁ ତାଙ୍କର ପ୍ରାଣ ବାୟୁ ଉଡି ଯାଇଥିଲା। ମେଡିକାଲରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପ୍ରବଳ ଖରା ଓ ଅସହ୍ୟ ଗ୍ରୀଷ୍ମ ପ୍ରବାହ କାରଣରୁ ଅଂଶୁଘାତ ହୋଇଥିବା ପରିବାର ଲୋକ ସନ୍ଦେହ କରୁଥିବା ବେଳେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣା ପଡ଼ିବ ବୋଲି ଡାକ୍ତର କହିଛନ୍ତି ।
