ପାତ୍ରପୁର,୪/୪ : ଜାତୀୟସ୍ତରରେ ଚିକିଟି ବିଜ୍ଞାପିତ ପରିଷଦ ପୁରସ୍କାର ପ୍ରାପ୍ତ । ଏହି ପରିଷଦରେ ହୋଇଛି ବିଭିନ୍ନ ଉନ୍ନୟନମୂଳକ କାର୍ଯ୍ୟର ସଫଳ ରୂପାୟନ । କିଭଳି ଭାବେ କାର୍ଯ୍ୟ ଖସଡ଼ା ପ୍ରସ୍ତୁତ ହୁଏ, କିଭଳି କାର୍ଯ୍ୟର ମାନ ଏବଂ କେମିତି ପ୍ରକଳ୍ପ ଗୁଡ଼ିକର ସଫଳ ରୂପାୟନ ହୋଇଛି ସେ ନେଇ ଶୁକ୍ରବାର ସନ୍ଧ୍ୟାରେ ପରିଦର୍ଶନରେ ଚିକିଟି ଏନଏସିରେ ପହଂଚିଛନ୍ତି ରାୟଗଡ଼ା ନଗର ନିଗମର ଟିମ୍ । ଏକ୍ସପୋଜର ଭିଜିଟରେ ଆସିଥିବା ରାୟଗଡ଼ା ନଗର ନିଗମର ଅଧ୍ୟକ୍ଷ ମହେଶ ପଟ୍ଟନାୟକ, ଉପାଧ୍ୟକ୍ଷ ଶୁଭ୍ରା ପଣ୍ଡା, କାର୍ଯ୍ୟନିର୍ବାହୀ ଅଧିକାରୀ କୁଲଦୀପ ପ୍ରମୁଖଙ୍କ ସହ ନଗର ନିଗମର ସମସ୍ତ କାଉନସିଲର, ସ୍ବଛ ସାଥି, ସ୍ୱଚ୍ଛ କର୍ମୀ ଚିକିଟିରେ ପହଂଚିବା ପରେ ଚିକିଟି ଏନଏସି ତରଫରୁ ତାଙ୍କୁ ଭବ୍ୟ ସ୍ୱାଗତ କରାଯାଇଥିଲା । ସମସ୍ତଙ୍କୁ ପୁଷ୍ପ ଗୁଚ୍ଛ ସହ ଉତ୍ତରୀୟ ଦେଇ ସ୍ୱାଗତ କରାଯାଇ ସଭାଗୃହରେ ପ୍ରୋଜେକ୍ଟର ମାଧ୍ୟମରେ ପ୍ରଥମେ ପ୍ରକଳ୍ପ ଗୁଡ଼ିକ ପ୍ରଦର୍ଶିତ କରାଯାଇଥିଲା ।
ଚିକିଟି ଏନଏସି କାର୍ଯ୍ୟ ନିର୍ବାହୀ ଅଧିକାରୀ ସାଶ୍ବତୀ ଷଡ଼ଙ୍ଗୀ ଏବଂ ତାଙ୍କ ପୁରା ଟିମ୍ ଓ ସମସ୍ତ କାଉନସିଲ ଟିମ୍, ସ୍ୱଚ୍ଛ ସାଥି, ସ୍ୱଚ୍ଛ କର୍ମୀଙ୍କ ସହ ରାୟଗଡ଼ା ନଗର ନିଗମ ଟିମ୍ ଚିକିଟି ଏନଏସିରେ ସଫଳ ରୂପାୟନ ହୋଇଥିବା ବିଭିନ୍ନ ପ୍ରକଳ୍ପ ଯାଇ ବୁଲି ଦେଖି ଖୁସି ପ୍ରକଟ କରିବା ସହ ଚିକିଟି ଟିମର କାର୍ଯ୍ୟକୁ ଭୁୟସୀ ପ୍ରଶଂସା କରିଥିଲେ । ଏକ୍ସପୋଜର ଭିଜିଟ କାର୍ଯ୍ୟକ୍ରମ ଆୟୋଜନରେ ଚିକିଟି ଏନଏସି ଟିମର ସମସ୍ତ କର୍ମକର୍ତ୍ତା ବିଶେଷ ସହଯୋଗ କରିଥିଲେ ।
