କଟକ,୨/୪ : କଟକରେ ଖାଦ୍ୟ ମାନ ଯାଞ୍ଚ ପାଇଁ ଚଢଉବେଳେ ଉତ୍ତେଜନା । କଟକର ହରିପୁର ରୋଡ଼ରେ ଖାଦ୍ୟ ମାନ ଯାଞ୍ଚ ପାଇଁ ଆଜି ସଂଧ୍ୟାରେ ପହଞ୍ଚିଥିଲେ ସିଏମସି ସ୍ବାସ୍ଥ୍ୟ ବିଭାଗର ଅଧିକାରୀ ଓ ଫୁଡ୍ ସେଫ୍ଟି ଅଧିକାରୀ, କର୍ମଚାରୀ । ତେବେ ଲର୍ଡସ୍ ହୋଟେଲ ନିକଟରେ ଏକ ଚିକେନ ପକୋଡା ଠେଲାରେ ଖାଦ୍ୟର ମାନ ଯାଞ୍ଚବେଳେ ସମ୍ପୃକ୍ତ ଵ୍ୟଵସାୟୀ ଓ ସିଏମସି ଅଧିକାରୀମାନଙ୍କ ମଧ୍ୟରେ ଉଚ୍ଚବାଚ ଓ ଠେଲାପେଲା ହୋଇଥିଲା।

ସିଏମସି ଅଧିକାରୀ ଓ କର୍ମଚାରୀମାନେ ବ୍ୟବସାୟୀଙ୍କୁ ଖରାପ ବ୍ୟବହାର ପ୍ରଦର୍ଶନ କରିବା ନେଇ ସମ୍ପୃକ୍ତ ବ୍ୟବସାୟୀ ଅଭିଯୋଗ କରିଛନ୍ତି । ସେପଟେ ଖାଦ୍ୟର ମାନ ଯାଞ୍ଚବେଳେ ଅପମିଶ୍ରଣ କଥା ଧରାପଡିବାରୁ ବ୍ୟବସାୟୀ ଜଣଙ୍କ ଉତକ୍ଷିପ୍ତ ହୋଇ ଅଶାଳୀନ ଭାଷାରେ ଅଧିକାରୀମାନଙ୍କୁ ଗାଳି ଗୁଲଜ କରିବା ସହ କାମରେ ବାଧା ସୃଷ୍ଟି କରିଥିବା ସି ଏମସି ସ୍ବାସ୍ଥ୍ୟ ଅଧିକାରୀ କହିଛନ୍ତି । ପୁରୀ ଘାଟ ପୋଲିସ ଘଟଣାସ୍ଥଳରେ ପହଞ୍ଚି ସମ୍ପୃକ୍ତ ବ୍ୟବସାୟୀଙ୍କୁ ଥାନାକୁ ନେଇଯାଇଛି।